Токио-2020: Айаал Лазарев американец Стивесонныын тустуоҕа

Япония киин куоратыгар XXXII сайыҥҥы Олимпийскай оонньуу көҥүл тустууга күрэхтэһиитин 125 кг ыйааһыҥҥа сэрэбиэйэ таҕыста. Олимпийскай мэтээл иһин барыта 16 бөҕөс күөн көрсүөҕэ. Кинилэр ортолоругар саха тустууга кыһатын иитиллээччитэ, Азия чемпиона, Аан дойду Кубогын биирдиилээн бастыыр иһин түһүлгэтин призера Айаал Лазарев баар.

Балаһыанньа быһыытынан үрдүк рейтиннээхтэрин иһин грузин Гено Петриашвили уонна казах Юсуп Батырмурзаев итиэннэ украинец Александр Хоцяновскай, турок Таха Акгуль туспа бөлөхтөргө араарыллыбыттар.

Биһиги бөҕөспүт иккис бөлөххө, Батырмурзаевы уонна Акгулу кытта бииргэ түбэспит. Айаал сэрэбиэй быһыытынан американец Гейбл Стивесонныын тустуоҕа. Онно ким хоппута, Акгуль (Турция) – Дхеси (Канада) пааратын кыайыылааҕар тахсыаҕа.

Гейбл Стивесон туһунан билиһиннэрдэххэ, кини сааһа – 21-рэ. Кадеттарга, юниордарга аан дойду чемпиона буола сылдьыбыта. Быйыл саас АХШ Олимпиадаҕа сүүмэрдиир күрэхтэһиитигэр кыайыыны ситиһэн, олимпиец аатын ылбыта. Итиэннэ Панамерика континенын чемпионатыгар бастаабыта.

Ханныгын да иһин, уолбутугар ситиһиилээх тустууну баҕарабыт! Олимпиадаҕа туох баҕарар буолуон, ким баҕарар кыайыан сөп.

Бу ыйааһыҥҥа россиянин Сергей Козырев бастаан китаецтыын тустар буолбут. Онно кыайдаҕына, сэрэйдэххэ, Петриашвилига тахсыаҕа.

Айаал Лазарев тустуута сарсын, атырдьах ыйын 5 күнүгэр күнүс, биһиги бириэмэбитинэн 11:00 чаастан саҕаланыаҕа. Чулуу бөҕөспүтүгэр «ыалдьабыт»! Этэргэ дылы, саалаахтан самныма, охтоохтон охтума диэн алгыыбыт!

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *