Токио-2020: Абдулрашид Садулаев – икки төгүллээх олимпийскай чемпион!

Япония киин куоратыгар XXXII сайыҥҥы Олимпийскай оонньуу спортивнай тустууга күрэхтэһиитэ түмүктэннэ. Бүгүн үс ыйааһыҥҥа олимпийскай мэтээллэр оонньоннулар.

Финаллар, боруонса мэтээллэр иһин киирсиинэн саҕаланнылар. Онуоха, бэҕэһээ японец Такута Отогуроҕа хотторбут Гаджи Рашидов (65 кг) Венгрия хамаандатын аатыттан кыттар балкарец Исмаил Мусукаевы 5:0 ахсаанынан кыайан, Россия хамаандатыгар боруонса мэтээли аҕалла.

Бу күн саамай кэтэһиилээх киирсиинэн, эрдэттэн сэрэйиллибитин да быһыытынан, икки олимпийскай чемпионнар: Садулаев – Снайдер киирсиилэрэ буолла. Онуоха сүрдээх тыҥааһыннаахтык барбыт хапсыһыыга кыайыыны 6:3 ахсаанынан Абдулрашид Садулаев (97 кг) ситиһэн, икки төгүллээх олимпийскай чемпионунан буолла.

Дагестантан көҥүл тустууга олимпийскай чемпион элбэх. Ол эрээри, Садулаев – Мавлет Батыров кэнниттэн иккис киһинэн икки төгүллээх олимпийскай чемпионунан буолла.

Бу ыйааһыҥҥа биир интэриэһинэй түгэн буолла. Икки боруонса мэтээли кубинецтар ыллылар. Ол хайдах, диэтэххитинэ, Кубаттан кыттыбыт Рейнерис Салас Перес уонна Италияттан тустубут Абрахам Руана Коньедо, быһаарыылаах хапсыһыыларга туһааннааҕынан Шариф Шарифовы (Азербайджан) уонна Сулейман Карадениһы (Турция) хоттулар. Кэрэхсэбиллээҕэ баар, Салас бу Олимпиадаҕа эрчиллиитин биир түһүмэҕин биһиги куораппытыгар, «Триумф» Спорка бэлэмнэнии киинигэр, Куба хамаандатын кытта бииргэ барбыта.

Дьиэлээхтэртэн, аан дойду чемпиона Такуто Отогуро финалга сүрдээх тыҥааһыннаах киирсиигэ азербайджанец Хаджи Алиевы 5:4 ахсаанынан кыайан, олимпийскай чемпионунан буолла.

Бүгүҥҥү финаллар түмүктэрэ:

65 кг

1.Такуто Отогуро – Япония

2.Хаджи Алиев – Азербайджан

3.Гаджи Рашидов – Россия

3.Бажранг Пуния – Индия.

97 кг

1.Абдулрашид Садулаев – Россия

2.Кайл Снайдер – АХШ

3.Рейнерис Салас – Куба

3.Абрахам Коньедо Руано – Италия.

50 кг

1.Юи Сусаки – Япония

2.Сун Янань – Кытай

3.Мария Стадник – Азербайджан.

3.Сара Хильдебранд – АХШ.

Санатан эттэххэ, Токиотааҕы Олимпиада көҥүл тустууга күрэхтэһиитин хаамыыта хас биирдии күнүнэн http://dzulurgan.ru сайтка барыта сырдатыллан испитин киирэн көрүөххүтүн, ааҕыаххытын, билсиэххитин сөп.

«Дьулурҕан».

Добавить комментарий

Ваш адрес email не будет опубликован. Обязательные поля помечены *