Токио-2020: Россия хамаандата 71 мэтээллээх бэһис буолла

Япония киин куоратыгар XXXII сайыҥҥы Олимпийскай оонньуулар ыытыллан түмүктэннилэр. Өссө бэҕэһээ, Россия Олимпийскай комитетын (ОКР) хамаандата 69, ол иһигэр 20 кыһыл көмүс мэтээллээх, официальнайа суох хамаанданан ааҕыыга төрдүс миэстэ этэ.

Оттон бүгүн, биһиги дойдубут хамаандата уус-уран гимнастикаҕа уонна гандболга (дьахталлар) кыһыл көмүс мэтээлгэ суоттаммыта, итинэн төрдүс миэстэни бигэтик ыларга суоттаммыта. Ол эрээри, гимнасткаларбыт соһуйуох иһин, Болгария хамаандатын кэнниттэн иккис миэстэни ыллылар. Оттон гандболисткаларбыт, ааспыт Олимпиада кыайыылаахтара – 25:30 ахсаанынан французкаларга хомолтолоохтук хоттордулар.

Онон хамаанданан түмүккэ Англияны иннилэригэр түһэрдилэр. Россия хамаандата, инники Олимпиадаларга тэҥнээтэххэ, төһө да ситэтэ суох састаабынан кыттыбытын үрдүнэн, сыыппара-чахчы (статистика) быһыытынан, урукку көрдөрүүлэрин тупсарда. Ол үрдүнэн, ис кыахтар өссө да ситэ туһаныллыбатылар диэххэ сөп.

Ким төһө мэтээллэннэ?

(Бүтэһиктээх түмүк)

  1. АХШ – 39+41+33 = 113

2. Кытай – 38+32+18 = 88

3. Япония – 27+14+17 = 58

4. Великобритания – 22+21+22 = 65

5. ОКР (Россия) – 20+28+23 = 71

6. Австралия – 17+7+22 = 46

7. Нидерланды – 10+12+14 = 36

8. Франция – 10+12+11 = 33

9. Германия – 10+11+16 = 37

10. Италия – 10+10+20 = 40.

Барыта 86 дойду спортсменнара мэтээлгэ тигистэ, ол иһигэр 65 хамаанда чемпионнаах. Россия олимпиецтара — 20 кыһыл көмүс, 28 үрүҥ көмүс, 23 боруонса, барыта 71 мэтээли ылла итиэннэ хамаанданан түмүккэ бэһис буолла. Эһиги санааҕытыгар, Россия хамаандата бу Олимпиадаҕа хайдах кытынна?

Түмүктээн эттэххэ, Россия хамаандатыгар 8-тыы мэтээли аҕалбыт тустууктар, фехтовальшиктар, ытааччылар, гимнастар, 5 мэтээллээх харбааччылар үчүгэйдик кытыннылар, туруоруммут соруктар толордулар диэххэ сөп. Оттон уус-уран гимнастикаҕа суоттаммыт көрдөрүү ситиһиллибэтэ. Ити курдук, академическай эрдиниигэ олох мөлтөхтүк кытыннылар.

Мантан инньэ дьэ, ырытыылар, санаалар, түмүктээһиннэр оҥоһуллуохтара. Сүрүнэ, хамаанда Олимпиадаҕа кыттыытын сөптөөхтүк ырытан, итэҕэстэри-быһаҕастары ыйан, бэйэ иннигэр чопчу соруктары, уларыйыылары туруоруу ирдэнэр. Биһиги республикабыт эмиэ, бу буолан ааспыт Токиотааҕы Олимпиаданан сибээстээн, үрдүкү спорка үлэтин хайысхатыгар, бэлэмнэнии ситимигэр сөптөөх түмүктэри оҥостон, көдьүүстээх үлэни ыытара эрэйиллэр.

«Дьулурҕан».

Добавить комментарий

Ваш адрес email не будет опубликован. Обязательные поля помечены *