Тимофей Цзю аҕатын туйаҕын хатарыа дуо?

Костя Цзю аҕата Борис Цзю кэриэй, ийэтэ Валентина Цзю – нуучча. Борис Свердловскай уобаласка, Серов куоракка тимир собуотугар үлэлээбитэ. Кэргэнэ Валентина эмиэ Серов куоракка медсиэстэрэнэн үлэлээбитэ. 1969 сыллаахха Костяны төрөппүттэрэ. Костя аҕатыгар майгынныыр да буоллар, нуучча ийэтигэр эмиэ саха бааһынайын курдук, сырдык ыраас хааннаах, майгынныыр. Икки өттүттэн баар. Костя кыыс кэрэ сэбэрэлээх, кыра хатыҥыр уолчаан этэ. Аҕата Борис бэйэтэ эмиэ кыра уҥуохтаах буолан, уола эмиэ кыра этэ.

«Костя кылааһыгар барыларыттан кыра буолан, бокса секциятыгэр биэрбитим», — диэн кэпсиир Борис. Бэйэтэ эмиэ боксаҕа дьарыктанан, түөртэ киирсибит. Ол эрээри, дьиэ кэргэнин иитээри, үлэлээри боксатын бырахпыт. Костя оскуолаҕа кыра уҥуохтааҕын, сэнииллэрин иһин эбитэ дуу, эбэтэр Борис бэйэтэ боксатын эрдэ бырахпытыттан эбитэ дуу, тоҕус саастаах уолун Костяны үлүһүйэн туран бэйэтэ дьарыктыыр. Ону таһынан бокса секцийэтигэр сырытыннарар. Костя бастакы тренерэ Владимир Черня диэн киһи.  Любительскэй боксаҕа Костя уопсайа 282 киирсиилээх, 270 хотуулаах. Дьэ элбэх ситиһии.

Онтон Костя талааннааҕын бэлиэтии көрөн Австралияҕа Сидней куоракка ыҥыраллар. Онтон ыла профессиональнай карьерата саҕаланар, тренерэ Джон Льюис диэн эбит. Костя 22 саастааҕар аҥардастыы аатырар, соҕотохтуу сураҕырар. Утарылаһааччыларын от курдук охтортуур, сылбах курдук сытыартыыр. Биллэр-көстөр боксердары: Даррел Хайлз, Родригез, Роджер Майвезер, Мигель Гонзалес, Шарма Митчелл, Хулио Цезарь Чавес диэн аан дойду чемпионнарын боҕутуннаран, педьестал үрдүк чыпчаалыгар, кыайыы өрөгөйүн билэр. Уу харахтааҕы утары көрдөрбөт буола аатырар. Ийэлээх аҕатын Австралияҕа көһөртөөн ылар. Оҕобут үтүө киһи буолан улаатыа диэн ииппиттэрэ, уоллара үп-харчы бөҕөнү өлөрөн, дьиэлиирэ-уоттуура төрөппүккэ дэлэлээх үчүгэй буолуо дуо.

Костя 2001 сыллаахха, хотторуу хомолтотун билбэтэх, сутурук сокуоннааҕы иннигэр көрбөтөх Заб Джуда диэн негры кытта киирсэр. Заб Джуданы чулуу боксер Майк Тайсон, илэ бэйэтинэн арыаллаан киллэрбитэ. Джуда тилэҕэр пружиналаах курдук чэпчэкитик тэйиэккэлээн, салгыны хайыта сутурҕаан уол оҕо одьунааһа, аҕыс кырыылааҕа, түөрт уһуктааҕа быһыылааҕа.

Ол эрээри, аһара бэйэтигэр эрэнэн, аһаҕастык киирэн, Костяттан табыллан умса туруйалаабыта. Сыҥаахха табыллан мэктиэтигэр сүнньэ эргийэн ылбыта. Аттыы түһээт, итирик киһилии иккиһин тэмтэриҥнээн эмиэ охтубута. Онуоха рефери тохтотон кэбиспитэ. Онтон Заб Джуда дьэ өйдөнөн судьуйаны буруйдаабыта, тиийэн бэрчээккэнэн, судьуйа сирэйин сутурҕаабыта. Ол быһыытыгар кэнники ыстарааптаммыта. Биир даҕаны хотторуута суох Джуданы Костя кэбирэхтик бүдүрүппүтэ. Судьуйа кэмигэр тохтоппотоҕо буоллар, Джуданы уотун умулларан, дириҥ далай хараҥаҕа ыытыахтаах этэ. Онно махтаммакка, Джуда реферини хабарҕалыыр.

Ол кэннэ Костя сааһыран, 2005 сыллаахха Британия боксеругар 38-0 киирсиилээх Рикки Хаттоҥҥа хотторбута.

Костя киирсэрин мэлдьи көрөр этим. Онно аттыгар аҕата баар буолара. Борис мэлдьи жвачка ыстыыр идэлээх.

Билигин Костя Цзю уола Тимофей Цзю эмиэ боксаҕа үрдүк ситиһиилэнэн хотторуута суох тахсан эрэр. Костя киэҥ сирдэринэн тэлэһийэ сылдьар буолан, сиэнин аттыгар билигин эһээтэ Борис мэлдьи баар. Эмиэ ыас ыстаан ыллаҥнатар. Костя этэринэн, киирсэр кэмнэригэр чуолаан, ыас ыстыыр идэлээх диир. Бука кырдьаҕас ыас ыстаан, ыгылыйар түгэннэрин аһарынара буолуо.

Борис Тимофеевич сиэнэ Тимофей 25 саастаах. Дьон бастаан «аата эрэ Костя Цзю уола диэн өрө туталлар ини» дии санаабыттара. Онтулара Тимофей Мени Пакьяоны кыайбыт,  Джеф Хорн диэн боксеры хоппут эбит. Онтон ыла аанньа ахтар буоллулар. Тим Цзю Деннис Хоган диэн күүстээх боксеру эмиэ кыайбыта. Онон эмиэ аҕатын курдук үрдүк чыпчаалга тахсар чинчилээх.

Костя уола Тима эмиэ аҕатын курдук киэҥ көҕүстээх киһиргэһэ суох, үтүө майгылаах. Эрдэ суруйан турабын, Арассыыйа боксердара, Поветкин, Лебедев, Трояновскай курдук киһиргэһэ суох боксердар өр тулуһаллар, аатыраллар диэн. Омуктар киһиргээн, тиэриллэҥнээн, уруһуйданан дьону үөхсэн онтулара бэйэлэригэр тиийэр. Костя Цзю эмиэ Майк Тайсон курдук, чыпчаалга тахсан биллэр, көстөр. Уола Тимофей Цзю аҕатын туйаҕын хатарарыгар баҕарыаҕыҥ.

Ородьумаан.

Добавить комментарий

Ваш адрес email не будет опубликован. Обязательные поля помечены *