Тимофей Сивцев: “Кыайыыбын ийэбэр аныыбын!”

Биһиги республикабытыгар кикбоксиҥҥа улахан дьоҥҥо уонна обургу оҕолорго Россия чемпионата ыытыллан түмүктэннэ. Онно дьиэлээхтэр – Саха сирин сүүмэрдэммит хамаандата барыта 18 мэтээли, ол иһигэр 5 кыһыл көмүһү ылан, үчүгэй көрдөрүүлэннэ.

Өссө саамай күүстээх киһибит – Россия уонна Европа чемпиона Вадим Колтовской кыттыахтаах этэ да, эчэйиилээх буолан киирсибэтэ. Ол оннугар хата, кини ыйааһыныгар – эдэр маастар Тимофей Сивцев кыайыы көтөллөннө! Онон Колтовскойу суохтаппата диэххэ сөп, үс чечены сабырыйан, пьедестал үрдүкү үктэлигэр таҕыста.

-Тимофей, бастатан туран, эйигин кыайыыгынан эҕэрдэлиибин! Бэйэҥ тускунан кылгастык билиһиннэр эрэ.

-Мин куоракка төрөөбүтүм. Ол эрэн, бастаан Уус Алдаҥҥа олорбутум, улааппытым. Бастакыттан төрдүс кылааска диэри онно үөрэммитим. Бэһис кылааска үөрэнэрбэр, манна куоракка көһөн кэлбиппит. Дьокуускай сэттэ нүөмэрдээх оскуолатыгар үөрэммитим. Бастаан спордунан дьарыктаныым – тустуу уонна гимнастика этэ. Онтон куоракка кэлээт, кикбоксинынан эрчиллиибин саҕалаабытым. Бастакы тренерим – Охлопков Сергей Владимирович, онтон Колесов Иван Олегович.

Дьиэ-кэргэниҥ, төрөппүттэриҥ тустарынан… Кинилэр спорка сыһыаннара хайдаҕый?

-Бииргэ төрөөбүт үһүөбүт. Эдьиийдээхпин уонна бырааттаахпын. Быраатым эмиэ спортсмен, боксанан дьарыктанар. Билигин Дьокуускайдааҕы промышленнай техникумҥа үөрэнэ сылдьабын.

Кикбоксиҥҥа бу иннинээҕи ситиһиилэриҥ ханныктарый?

-Оҕолорго Россия күрэхтэһиитигэр үһүстээбитим, Европаҕа иккис буолбутум, Аан дойду кубогар кыайбытым, Россия кубогар эмиэ бастаабытым уонна Дальнай Восток федеральнай уокуругар хаста даҕаны чемпионнаабытым.

Спорт бу көрүҥэр нормативыҥ ханныгый?

-Кикбоксиҥҥа Россия спордун маастарабын. Быйыл кыһын толорбутум. Ону бу чемпионакка ситиһиилээхтик кыттан, өссө бигэргэтэн биэрдим.

Киирсэриҥ саҕана ханнык ыйааһыннарга кыттар этигиний?

-Бастаан өссө оҕо сылдьан – 42, салгыы 45, 48, 51, 54, билигин 57 киилэҕэ киирсэбин. Бу күрэхтэһиигэ ситиһиилээхтик кыттар инниттэн алта киилэни түһэринэн кииристим.

Тимофей, киирсиилэрин тустарынан сырдата түс эрэ…

-Бу чемпионакка барыта түөрт бойу оҥордум. Бастакы утарсааччым чечен уола этэ, спорт маастара. Кинини 3:0 ахсаанынан эрэллээхтик кыайбытым. Иккис бойум – Москва уолун кытта этэ. Ону эмиэ эрэллээхтик хоппутум. Үһүскэ чечен уолун 2:1 ахсаанынан кыайбытым. Ыарахан соҕус бой этэ. Финалга эмиэ Чечня кикбоксерун эрэллээхтик 3:0 кыайдым. Ыарахан, кытаанах уол этэ.

Маннык түгэҥҥэ, “Кыайыыгын кимиэхэ аныаҥ этэй”? диэн ыйытааччылар.

-Бу кыайыыбын мин ийэбэр Айна Тимофеевнаҕа аныыбын. Сарсын, муус устар 11 күнүгэр кини төрөөбүт күнэ буолар. Онно мин Россия чемпионатыгар кыайыыбынан саамай чугас киһибэр бэлэх оҥоробун.

Инники туох сыалы-соругу туруорунаҕыҥ?

-Бу күрэхтэһии түмүгүнэн аан дойду чемпионатыгар кыттар хамаанда састааба сүүмэрдэнэр диэбиттэрэ. Онон мин чемпион аатын ыламмын, хамаандаҕа киирдим. Ол эрээри, эрдэ сэрэппиттэрин курдук, ол путевка иһин эбии киирсии оҥоруохтаахтар, Россия былырыыҥҥы чемпиона Вадим Колтовскойу кытта. Прикидкаҕа ким кыайбыт – ол барар, аан дойду чемпионатыгар.

-Оттон чемпионат Дьокуускайга тэриллибитин туох дии саныыгын?

-Олох үчүгэй буоллаҕа. Атын сиргэ барарбытыгар, биһиэхэ спортсменнарга акклиматизация сүрдээҕин дьайар, тыынарга эҥин ыарахан буолааччы. Күнэ-дьыла эҥин атын буолан. Ол иһин Дьокуускайга буолбута үчүгэй. Уонна көрөөччүлэр ыһыылара-хаһыылара, эйиэхэ кыайыыны баҕараллара сүрдээҕин дьайар дии саныыбын.

-Чэ, Тимофей, махтал! Салгыы ситиһиилэри баҕарабын.

Сэһэргэстэ Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *