Теоретическай өттүнэн бэлэмнэнии эрэ ситиһиигэ тиэрдиэ

Биһиги, М.К. Аммосов аатынан Хотугулуу-Илиҥҥи федеральнай университет физкультурнай институтун иһинэн “Биомеханические основы специальной физической подготовки борцов вольного стиля” диэн, тустууга аналлаах үөрэтэр үлэни бэлэмнээтибит.

Бу үөрэтэр үлэҕэ физкультура уонна спорт специалистарыгар, тренердэргэ, спортсменнарга, студеннарга туһулаан – биомеханика көмөтүнэн тустууктары бэлэмнээһин ньымаларын ырытыы киирдэ.

Онно уҥуох, сүһүөх, иҥиир күүһүн өйдөбүллэригэр, ытаhа күүһүн, “вилкалаан” күүһү хайытыы, тустууга оруоллаах сүрүн кииннэр тустарынан киллэрдим.

Тренердэри, тустууктары саҥа, инники хардыы өйдөбүллэригэр иитиигэ теоретическай база бэлэмнээтим. Онон научнай-практическай семинардары, таһымы үрдэтэр курстары оҥорорго бэлэм буоллум дии саныыбын.

Россия чемпионатыгар Константинов Петр ыгааhыҥҥа, силовой прессиҥҥа хотторбокко, үксүн көбүөр киинигэр туhунна, бастакы периодка Угуевка техническай действие почти оҥотторбото, сэрэтиинэн уонна биирдэ көбүөр таhыгар ыктаран, уопсайа 2 балы биэрдэ. Иккис периодка Угуев саҕаланыаҕыттан турунан киирэн атакалаабытын балачча утарыласта, үрдүк таhымнаах тустууктары утары тустар эффективнай техниката тиийбэтэ көhүннэ.

Кини – Угуевтан, Сайдулаевтан туох да итэҕэhэ суоҕун көрдөрдө, өйдөбүлэ ситтэҕинэ уонна сборнай усулуобуйатыгар, аан дойдуга саамай күүстээх састаап кэккэтигэр дьарыктаннаҕына, лидердэргэ тэҥнээх таһымҥа тахсыан сөптөөх буолбут диэн көрдүм.

Уопсай хартыына уруккуттан биллэр этэ, Виктор Лебедев Россияҕа лидер буолан, тустуу баар курдук көстөрө. Арыыйда тустар Арыйаан Тютрин суоҕар, таhыммыт лаппа көhүннэ. Сөптөөх выводтары ылан, сборнайы, тренердэри теоретическай өттүнэн сайыннаран, саҥа суолга киирдэххэ эрэ, туох эмэ кэлиэ. Дагестан мировой лидерствоҕа сылдьар, ону ситэр уустуктардаах. Туора-маара хардыылаабакка, бэлэмнэммит теоретическай базаны туhанан инники хардыы оноро охсуохха наада.

Бэйэбит оннугар атыттар кэлэн биhигини өрө тардыахтара диэн – утопия, туhата суох. Владимир Модосян кэлэн барбыта, республика тренердэрин сайыннарбакка, соҕотох В.Лебедевынан сылдьыбыта.

Онон түмүктээн эттэххэ, бу саҥа тахсар, урукку дьыллар теоретик тренердэрин идеяларыгар олоҕурбут научнай үлэни үчүгэйдик ырытан, үөрэтэн – эрчиллиигэ туһаныахха диэн ыҥырабын.

Петр КРИВОШАПКИН, педагогическай наука кандидата.

Добавить комментарий

Ваш адрес email не будет опубликован. Обязательные поля помечены *