Таһаарыылаах үлэлээх үтүө үлэһит

Элбэх спортивнай сулустар төрөөн, иитиллэн тахсыбыт маанылаах Ньурба улууһуттан төрүттээх, көҥүл тустууга ССРС спордун маастара, Саха Республикатын үтүөлээх тириэнэрэ, Саха Республикатын физическэй культураҕа уонна спорка үтүөлээх үлэһитэ, норуоттар икки ардыларынааҕы үрдүк кылаастаах судьуйа, Саха АССР, РСФСР үтүөлээх тириэнэрэ Н.Н. Волков үөрэнээччилэриттэн биирдэстэрэ Николай Егорович Степанов самаан сайыммыт үтүөтүгэр 75 сааһын толору туолан бэлиэтиир.

Түгэнинэн туһанан арыый аҕа саастаах убай, атас, доҕор киһибитин сырдатан кэпсээн ылыах.

Николай Егорович Советскай Казахстан Алма-Ататааҕы судаарыстыбаннай физическэй культураҕа үрдүк үөрэҕин ситиһиилээхтик үөрэнэн бүтэрбитэ. Дипломнаах эдэр үлэһит Саха судаарыстыбаннай университетыгар физическэй иитии-үөрэтии кафедратыгар үлэҕэ киирэр. Эдэр киһи тириэнэр, үөрэтээччи быһыытынан буһар-хатар. Кини үлэлээбит сылларыгар университет сүүмэрдэммит хамаандата Н.Н. Тарскай бирииһигэр республиканскай турнирга хаста даҕаны субуруччу бастаан, көһө сылдьар Куубагы букатыннаахтык илдьэ хаалбыта. Аны дьарыктыыр тустууктарын түмэн, студеннар тутар этэрээттэрин тэрийэн, сайыҥҥы ыйдарга сопхуостар хотоннорун, гаражтарын тутууларыгар ситиһиилээхтик үлэлииллэр. Бу саҥа, сонун хамсааһыны тэрийэн үлэлэтэн, Николай Егорович университет салалтатын уонна Саха АССР тыатын хаһаайыстыбатын министиэристибэтин үрдүк сыанабылларын ылбыта.

Тустар студент уолаттар араас факультеттарга, идэлэргэ үөрэнэллэрэ. Соҕуруу уһун кэмнээх дьарыктыыр түмсүүлэргэ, турнирдарга сылдьан үөрэх программатыттан быстан хаалаллара, үөрэхтэригэр ыарырҕаталлара кистэл буолбатах этэ. Онон спортсменнарга анаан эбии үөрэх чаастара, консультациялар тэриллэр буолбуттара. Бу, дэбигис, биир киһи ылла даҕаны кыайбат үрдүк тэрээһини эрэйэр үлэ көрүҥэр университет үөрэҕин чааһын проректора, профессор, сахалартан көҥүл тустууга бастакы Россия чемпиона Николай Антонович Гоголев, СГУ партийнай тэрилтэтин секретара, көҥүл тустуу дьиҥнээх сүгүрүйээччитэ Петр Павлович Лимонов, үгүс деканнар, преподавателлэр быһаччы көмөлөрүн иһин махтал тылларынан ахтан ааһар тоҕоостоох. Маны барытын балаһыанньаны үрдүттэн көрө сылдьан сөпкө өйдөөн, таба сыаналаан саҕалааччы, кэпсэтээччи, туруорсааччы эмиэ Николай Егорович Степанов буолара. Бу курдук дьарыктыыр уолаттарын кэнэҕэс олохторугар, үлэлэригэр-хамнастарыгар үтүө дьайыылаах тэрээһиннэри олоххо киллэрэннэр элбэх ахсааннаах үтүөкэн тустууктарбыт, маастардарбыт үрдүк анал үөрэхтээх, идэлээх дьон буолан тахсыбыттара. Кинилэр ортолоругар Алексей Стручков, Валерий Керемясов, Захар Чукров, Илья Григорьев, Валерий Скурихин, Леонид Попов, Михаил Каженкин, Николай Коркин, Александр Тимофеев, Петр Бурцев, Вячеслав Климовскай уо.д.а. бааллар.

Николай Егорович уонунан сылларга тустуу судьуйатын быһыытынан үрдүк таһымҥа тахсыбыта. Үгүс ахсааннаах республика, спортивнай обществолар, Россия, олус үрдүк ирдэбиллээх Союз, аан дойдутааҕы таһымнаах турнирдарга үтүө суобастаахтык үлэлээбитэ, туйгун судьуйа аатын мэлдьи ылара. Бу курдук кини саҥа судьуйалар көлүөнэлэрэ үүнэн, сайдан тахсалларыгар сүҥкэн оруоллаах. Кэлиҥҥи сылларга Саха сириттэн, Уһук Илин уонна Сибиир куораттарыттан маннык судьуйалар бэлэмнэнэн таҕыстылар: Петр Платонов, Николай Старостин, Гаврил Троев, Семен Окоемов, Николай Николаев, Владимир Альков (Новосибирскай), В.Райков (Красноярскай), А.Ковалев (Благовещенскай), В.Секлецов (Кемерово) уо.д.а.

Аны туран, Николай Егорович армия спортивнай кулууптарын кытта сибээс олохтоон, Дьокуускай куоракка филиал баар буола сылдьыбыта. Холобура, СКА-19 Забайкальетааҕы байыаннай уокурук ыһыллыбытын кэннэ, СКА-Хабаровск Уһук Илин байыаннай уокуругун филиала. Бу эмиэ сүрдээх уустук кэпсэтиилэр, үлэ-хамнас, үп-ас боппуруостарын быһаарсыы кэннилэриттэн ситиһиллибит дьыала этэ. Сүрүн соругунан буолбута – армия кэккэтигэр ыҥырыллыбыт тустар эдэр ыччат маннааҕы дьарыгын ситимин быспакка, үрдүк таһымнаах түмүктэри көрдөрөллөрүгэр олук уурааһына этэ.

Ити этиллибит холобурдарга олоҕуран, биһиги Николай Егорович дириҥ билиилээх тириэнэр, педагог, спортивнай тэрийээччи, салайааччы, үрдүк таһымнаах тустуу судьуйата, үтүөкэннээх ыал аҕата, эһэтэ, эрэллээх убай, доҕор-атас диэн толору бигэргэтэр кыахтаахпыт.

Өрөгөйдөөх күҥҥүнэн чэгиэн туругу, айымньылаах үлэни-хамнаһы, дьоллоох олоҕу баҕаран сахалыы алгыспытын этэбит.

Семен Сергеевич ОКОЕМОВ, ССРС спордун маастара, аан дойду таһымнаах судьуйа.

Добавить комментарий

Ваш адрес email не будет опубликован. Обязательные поля помечены *