“Таҥас” фирма тустууктары таҥыннарда

Бүгүн, алтынньы 1 күнүгэр Саха сирин көҥүл тустууга сүүмэрдэммит хамаандатыгар, дьоҥҥо-сэргэҕэ киэҥник биллэн эрэр “Таҥас” тэрилтэ спортивнай көстүүмнэрэ туттарылыннылар. Үөрүүлээх бэлиэ түгэн “Триумф” иннигэр турар олимпиецтар Роман Дмитриев, Павел Пинигин, Александр Иванов пааматынньыктарын таһыгар буолбута, спортсменнарга өссө төгүл эппиэтинэһи сүктэрэр диэххэ сөп.

Бэлиэ түгэҥҥэ Саха Республикатын Спорка бэлэмнэнии киинин дириэктэрин бастакы солбуйааччы Михаил Пахомов, республика көҥүл тустууга сүүмэрдэммит хамаандатын кылаабынай тренерэ Александр Оконешников уонна “Таҥас” тэрилтэ салалтата кыттыыны ыллылар.

Манан сибээстээн, “Таҥас” хампаанньа тэрийээччитэ Александр Максимовтан санаатын үллэстэригэр көрдөстүм:

Биһиги хара тэриллиэхпититтэн ыла спортсменнарбытын өйүүбүт. Боксердары, тустууктары… Аан бастаан саҕалыырбытыгар тустууктары таҥыннарбыппыт. Ол үгэспитин салҕаан, быйыл эмиэ комплект бэлэхтээтибит. Уолаттарбытыгар ситиһиини баҕарабыт! Харысхалларбыт көмө буолуохтара диэн эрэнэбит. Бу, убайдарбыт курдук (пааматынньыгы ыйар), Саха сиригэр көмүс мэтээли аҕалыахтара диэн эрэнэбит.

Биһиги тэрилтэбит 2014 сылтан “Таҥас” диэн аатынан үлэтин саҕалаабыта. Сүрүннээн спорка уонна күннээҕи олоххо кэтиллэр көстүүмнэри тиктэрэн таһаарабыт. Онон номнуо алта сыл үлэлээн кэллибит.

Биһиги таҥаспытын ылан кэтиэн баҕалаахтар, “Туймаада”, “Апельсин” уонна ЦУМ атыы-эргиэн кииннэригэр баар маҕаһыыннарбытыттан ылыахтарын сөп.

Тустууктарбытыгар хаһан баҕарар Саха сирин спорка былааҕын өрүү күөрэччи тута сылдьалларыгар баҕарыаҕыҥ!

Петр ПАВЛОВ.

Ааптар хаартыскаҕа түһэриитэ.   

Добавить комментарий

Ваш адрес email не будет опубликован. Обязательные поля помечены *