Тарскай чөмпүйэнээтэ: Сытыы хапсыһыылары көрүөхпүт

Көҥүл тустууга Саха сирин чөмпүйэнээтин иккис күнүгэр – 61, 70, 79, 92 уонна 125 кг ыйааһыннаахтар күөн көрсөллөр. Кылгастык ыйааһыннарынан кимнээх кытталларын ырыттахха, 61 киилэҕэ 25 бөҕөс сэрэбиэйи ааста. Аны кинилэр сарсыарда ыйааһыннаныыны барыахтаахтар. Бэлиэтээн эттэххэ, бастакы күн хас да бөҕөс сэрэбиэйи ааһаат, ыйааһыннаныыны сатаан барбакка, күрэхтэһиигэ киллэриллибэтэхтэрэ. Онон туох баҕарар буолуон сөп.

Бу ыйааһыны чурапчылар олох ыларга санаммыттар, ол эбэтэр, кинилэр манна алта кыттааччылаахтар. Ити атын ханнык да хамаандатааҕар элбэх. Үөһэ бөлөххө Бүлүүттэн Петр Константиновы, Чурапчыттан Александр Захаровы чорботуохха сөп. Өссө манна, эчэйии кэнниттэн хас да сыл көбүөргэ тахсыбатах Европа эдэрдэргэ кыайыылааҕа Георгий Окороков (Амма) тустуутун көрүөхпүт.

Оттон иккис бөлөххө Македония чөмпүйүөнэ, спорт маастара Владимир Егоров кыттыытын сыаналыахпыт. Кини бастакы эргииргэ Томпо ыччата Яков Павловы утары тахсар. Биир тыҥааһыннаах киирсиинэн Айтал Захаров (Чурапчы) – Виталий Эспек (Уус Алдан) буолуо диэн сэрэйэбит. Соторутааҕыта, олимпийскай чөмпүйүөн Роман Дмитриев турнирын кыайыылааҕынан тахсыбыт Айсиэн Винокуров (Мэҥэ Хаҥалас) – Михаил Васильев (Горнай) тустуулара даҕаны интэриэһинэй буолуоҕа. Бу бөлөххө өссө Тааттаттан күүстээх бөҕөс Семен Владимиров баар.

70 киилэҕэ эмиэ 25 кыттааччы сэрэбиэйи ааста. Бу ыйааһыҥҥа үөһэ бөлөххө успуорт маастара Айсен Потапов (Дьааҥы), норуоттар икки ардыларынааҕы кылаастаах успуорт маастара Владимир Флегонтов (Чурапчы), спорт үтүөлээх маастара Василий Стрекаловскай (Уус Алдан) күөн көрсүөхтэрэ. Оттон аллараа бөлөххө – Револий Самсонов (Сунтаар), Дьулустаан Булатов (Хаҥалас), Василий Шалугин (Уус Алдан) курдук күүстээх тустууктар бааллар.

79 киилэ 20 кыттааччылаах. Маныаха үөһэ бөлөххө норуоттар икки ардыларынааҕы кылаастаах успуорт маастара Герман Устиновы (Амма) чорботуохха сөп. Иккис бөлөххө Рустам Машарипов (Дьокуускай), Роберт Сидоров (Дьааҥы), Игорь Аммосов (Чурапчы), Айсен Копырин (Уус Алдан), Ларион Андреев (Мирнэй) курдук тэҥ баайыылаах бөҕөстөр утарыта көрсүөхтэрэ.

92 кг ыйааһыҥҥа 18 кыттааччы суруйтарбыт. Манна Дьокуускайтан Николай Алексеев, Горнайтан Антон Константинов, Чурапчыттан Семен Аммосов, Намтан Василий Винокуров бириистээх миэстэ иһин киирсиэхтэрэ диэн сылыктыыбын.

Ыарахан ыйааһыҥҥа 21 бөҕөс сэрэбиэйи ааста. Үөһээ бөлөххө сүрүннээн успуорт маастардара Ион Болтунов, Сергей Семенов (иккиэн – Намтан), Алексей Николаев (Дьокуускай) финалга тахсар иһин киирсэллэрэ күүтүллэр.

Оттон аллараа бөлөххө – Томпоттон Виталий Тимофеев, Горнайтан Эдуард Максимов уонна Эрчим Максимов, Намтан Василий Кутуков, Амматтан Степан Гаврильев курдук күүстээхтэр бааллар.

Дьэ, кылгастык билиһиннэрдэххэ ити курдук. Киһи үөрэрэ баар, ыйааһын аайы кыттааччы элбэх. Холобур, чугастааҕы кэмҥэ норуоттар икки ардыларынааҕы да, өрөспүүбүлүкэтээҕи даҕаны түһүлгэлэргэ көрдөххө, ордук ыарахан ыйааһыннарга кыттааччы аҕыйах буолан, күрэхтэһии эргиир систиэмэтинэн ыытыллыбыт түгэннэрэ баара. Ити, күрэхтэһиини киэргэппэт. Онно холоотоххо, Саха сирин чөмпүйэнээтигэр ыйааһын ахсын кыттааччы элбэҕэ киһи санаатын көтөҕөр диэххэ сөп.

Санатан эттэххэ, субуота күн чөмпүйэнээт сарсыарда 10:00 чаастан саҕаланар. Киирии – босхо. Күн иккис аҥаарыгар – биэс ыйааһыҥҥа өрөспүүбүлүкэ чөмпүйүөннэринэн кимнээх буолалларын билиэхпит. Онон куорат олохтоохторун уонна ыалдьыттары “Триумф” Спорка бэлэмнэнии киинигэр кэлэн, тустууну илэ көрөргүтүгэр ыҥырабыт.  

Петр ПАВЛОВ.  

Добавить комментарий

Ваш адрес email не будет опубликован. Обязательные поля помечены *