Тарскай чөмпүйэнээтэ: Бастакы кыайыылаахтарынан кимнээх буоллулар?

Бүгүн, “Триумф” Спорка бэлэмнэнии киинигэр – Н.Н. Тарскай кэриэһигэр көҥүл тустууга Саха сирин хамаанданан уонна биирдиилээн бастыыр иһин чөмпүйэнээтин бастакы кыайыылаахтара быһаарылыннылар.

57 киилэҕэ Чурапчы хамаандатын чиэһин көмүскүүр Таатта ыччата, успуорт маастара Федор Постников син эмиэ былырыыҥҥытын курдук кыайыы көтөллөнөн, өрөспүүбүлүкэ икки төгүллээх чөмпүйүөнүнэн буолла. Кини биэстэ тустан – биэстэ кыайда. Ылан көрдөххө, финалга тахсар иһин киирсиигэ Петр Копыловы 2:1 ахсаанынан хотуута, саамай ыарахан киирсиитэ буолуохтаах, атыттары тулуталаабата. Манна даҕатан эттэххэ, бэҕэһээ Постниковтан эрэ хотторуу хомолтотун билбит Копылов бүгүн боруонса мэтээл иһин тустуохтаах этэ да, сарсыарда ыйааһыннаныыга кэлбэккэ, күрэхтэһииттэн туораабыта хомолтолоох.

 

65 кг ыйааһыҥҥа бүтэһик быһаарыылаах хапсыһыыга эрдэттэн сэрэйиллибитин курдук, Арассыыйа сүүмэрдэммит хамаандатын чилиэннэрэ Петр Павлов уонна Эдуард Григорьев көрүстүлэр. Биллэрин курдук, кэнники кэмҥэ бу бөҕөстөр хардары-таары кыайсыылаах буоланнар, бу да сырыыга кинилэр икки ардыларыгар тустуу хатыһыылаах буолара күүтүллүбүтэ. Оннук даҕаны буолла. Сэрэхтээх соҕустук саҕалаан баран, биир түгэҥҥэ Григорьев хапсыһыыны сытыырхатан биэрээри бэйэтэ киирэн биэрбитин, Павлов бырастыы гыммата. Партерга тустууга хаста даҕаны “накат” диэн албаһы туттан, бастакы түһүмэххэ таблоҕа ахсааны биирдэ 9:2 оҥорон кэбистэ.

Кэлин санаатахха, ити сыыһа туттуу Григорьевка охсуулаах буолла. Төһө даҕаны иккис түһүмэххэ киирэн хапсыһыыны сытыырхата сатаабытын үрдүнэн, түмүккэ 7:9 ахсаанынан хотторон кэбистэ. Онон кини былырыын чөмпүйүөннээбит эбит буоллаҕына, быйыл ол аатын-суолун былдьатарга күһэлиннэ. Оттон 22 саастаах успуорт маастара Петр Павлов икки кэнники сыл өрөспүүбүлүкэ чөмпүйэнээтигэр үһүстээбит буоллаҕына, бу сырыыга пьедестал үрдүкү үктэлигэр тахсан, бэйэтин аатын – успуорт, чуолаан көҥүл тустуу устуоруйатыгар чөмпүйүөн быһыытынан киллэрдэ.

Бу хапсыһыы – бүгүҥҥү финаллар саамай күүтүүлээх, хатыһыылаах хапсыһыыларынан буолла диэтэхпинэ сыыстарбатым буолуо. Итиэннэ “Бастыҥ хапсыһыы” диэн анал бириис баара эбитэ буоллар, чуолаан Павловтаан Григорьев тустуулара итинник аакка тиксиэҕин сөп этэ дии саныыбын.

Атын ыйааһыннарга кыайыылаахтар Константин Власов, Игорь Софронеев, Ньургун Сергин утарсааччыларыттан үрдүк таһымҥа туралларын быһыытынан, улахан утарсыыны көрсүбэккэ бастаатылар. Манна сыһыары тутан эттэххэ, быйыл иккис сылын бэйэтин төрөөбүт улууһун аатыттан кыттар Константин Власов төрдүс сылын субуруччу Саха сирин көҥүл тустууга чөмпүйүөнүнэн буолла.

Бүгүҥҥү күн түмүгэ:

57 кг (28 кыттааччы):1. Федор Постников, 2. Дьулус Федотов (иккиэн – Чурапчыттан), 3. Харысхал Григорьев (Сунтаар), Максим Заморщиков (Чурапчы).

65 кг (25): 1. Петр Павлов (Уус Алдан), 2. Эдуард Григорьев (Чурапчы), 3. Владислав Ефимов (Хаҥалас), Айхаан Антонов (Нам).

74 кг (15): 1. Константин Власов (Мэҥэ Хаҥалас), 2. Иван Барашков (Нам), 3. Прокопий Петров (Дьокуускай), Иван Ефремов (Горнай).

86 кг (15): 1. Игорь Софронеев, 2. Леонид Данилов (иккиэн – Намтан), 3. Алексей Некрасов (Дьокуускай), Петр Захаров (Чурапчы).

97 кг (15): 1. Ньургун Сергин (Сунтаар), 2. Арсентий Николаев (Уус Алдан), 3. Виктор Борисов (Мэҥэ Хаҥалас), Кузьма Сивцев (Нам).

Онон барыллааһын ааҕыынан бастакы финаллар түмүктэринэн биир чөмпүйүөннээх, икки – иккис, икки – үһүс миэстэлээх Чурапчы хамаандата билиҥҥитэ инники иһэр. Оттон Нам, Уус Алдан уонна Мэҥэ Хаҥалас тилэх баттаһа иһэллэр. Ханнык хамаанда кыайарын сарсыҥҥы күн быһаарар.

Биллэрээччи-судьуйа, биллиилээх суруналыыс Александр Васильев-Көрдүгэн биллэрбитинэн, сарсын күрэхтэһии сарсыарда 10:00 чаастан саҕаланар, оттон чөмпүйүөннэри быһаарар хапсыһыылар 13:00 чаастан ыытыллаллар. Бука бары “Триумфка”!

Петр ПАВЛОВ.

Ааптар хаартыскаҕа түһэриитэ.   

 

Добавить комментарий

Ваш адрес email не будет опубликован. Обязательные поля помечены *