Табаарыстыы көрсүһүү: кыайыыны олохтоохтор ситистилэр

Бүгүн, алтынньы 12 күнүгэр В.П. Керемясов аатынан Дьокуускай куорат 3 №-дээх спортивнай оскуола 20 сыллаах үбүлүөйүгэр анаммыт көҥүл тустууга табаарыстыы көрсүһүү ыытылынна. Көбүөргэ ДЮСШ-3 (тренердэр М.Каженкин, И.Соркомов) уонна Саха сирин сүүмэрдэммит хамаандалара (тренердэр В.Уваров, П.Капитонов) күөн көрүстүлэр. Барыта тоҕус хапсыһыы ыытылынна.

Көбүөргэ күөн көрсүү иннинэ оскуола дириэктэрэ, СР физическэй култуураҕа уонна спорка үтүөлээх үлэһитэ, РФ уопсай үөрэхтээһиҥҥэ бочуоттаах үлэһитэ, көҥүл тустууга бэтэрээннэргэ аан дойду чемпиона Федот Архипович Соловьев уонна олимпийскай чемпион, Ил Түмэн депутата Павел Павлович Пинигин мустубут дьону эҕэрдэлээтилэр, эдэр тустууктарга ситиһиини баҕардылар. Үөрүүлээх түгэҥҥэ бу спортивнай оскуола үлэтигэр өрүү көх-нэм, өйөбүл буолар төрөппүттэргэ, тренердэргэ уонна суруналыыстарга Махтал суруктар туттарылыннылар.

Дьэ, ол кэнниттэн тустуу саҕаланна. Хара бастакыттан сытыы хапсыһыылар буоллулар. Ол курдук, 2004-2005 сс. төрөөбүттэргэ 50 киилэҕэ Дальнай Восток-2017 чемпиона Кирилл Дорожкин (Саха сирин сүүмэрдэммит хамаандата) – Казахстаҥҥа ыытыллыбыт норуоттар икки ардыларынааҕы турнир уонна Боотур оонньууларын кыайыылааҕа Коля Охлопковы (ДЮСШ-3) сытыы киирсиигэ судьуйалар быһаарыыларынан, 4:3 ахсаанынан кыайда.

Салгыы 2003-2004 сс. төрөөбүттэргэ 70 кг ыйааһыҥҥа Дальнай Восток чемпиона, Боотурдар оонньууларын кыайыылааҕа Айсен Жирков (ДЮСШ-3) – республика чемпиона, П.Пинигин турнирын кыайыылааҕа Айтал Белолюбскайы (Саха сирин сүүмэрдэммит хамаандата) 2:0 ахсаанынан хотто.

Үһүс көрсүһүүгэ комментатор Валериан Неустроев, 2004 с. төрөөбүттэр 76 киилэлэригэр Артур Дьяконовы (ДЮСШ-3) уонна Ньургун Малышевы (Саха сирин сүүмэрдэммит хамаандата) ыҥырда. Бу хапсыһыыга Дьяконов утарсааччытын партерга охторон баран, араастаан эргитэн кулахычытан, киирсиини очукуонан ыраастык кыайда (10:0).

Онтон 2002-2003 сс. төрөөбүттэргэ 51 киилэҕэ Россия күрэхтэһиитин кыайыылааҕа Айсен Алексеев (ДЮСШ-3) Дальнай Восток иккис призера, В.Гоголев бирииһигэр республикатааҕы турнир кыайыылааҕа Рома Николаевы (Саха сирин сүүмэрдэммит хамаандата) 6:0 ахсаанынан эрэллээхтик кыайда. Онон олохтоохтор, көбүөр хаһаайыттара табаарыстыы көрсүһүүгэ 3:1 ахсаанынан чорбойон таҕыстылар.

 

Бэһис киирсиигэ эмиэ ити саастаахтар 65 киилэлэригэр республика күрэхтэһиитин уонна Боотурдар оонньууларын призера Уйгулан Протодьяконов (Саха сирин сүүмэрдэммит хамаандата) Арман Бекболиевы (ДЮСШ-3) тыҥааһыннаах тустууга 6:5 ахсаанынан баһыйда. Онон уопсай ахсааны 2:3 оҥорор.

65 киилэҕэ иккис киирсиигэ Дальнай Восток федеральнай уокурук чемпиона Айтал Уйгуров (ДЮСШ-3) утарсааччытын Сандар Кривошапкины (Саха сирин сүүмэрдэммит хамаандата) очукуонан ыраастык хотон, бастатан туран, төрөппүт аҕатын – көҥүл тустууга Россия, хапсаҕайга Саха сирин спордун маастара, ДЮСШ-3 тренерэ Василий Васильевич Уйгуровы үөртэ.

Салгыы тустууга, 2000-2001 сс. төрөөбүттэр 57 киилэлэригэр Россия түһүлгэтин призера Айаал Белолюбскай (ДЮСШ-3) Дальнай Восток чемпиона Айсен Никифоровка (Саха сирин сүүмэрдэммит хамаандата) бастакы түһүмэххэ 1:6 ахсаанынан хотторон иһэн иккискэ киирэн утарсааччытын партерга охторон баран, “кыптыыйдааһын” диэн албаһы туттан, ыраас кыайыыны ситистэ. Манна даҕатан эттэххэ, Айаал – Дыгын оонньуутун сэттэ төгүллээх муҥутуур кыайыылааҕа Иван Белолюбскай төрөппүт уола.

Бу киирсии ханнык хамаанда кыайарыгар быһаарыылаах буолла диэххэ сөп. 5:2 ахсаанынан олохтоохтор кыайыыны чиҥэттилэр. Бу кыайыытынан Айаал Белолюбскай ДЮСШ-3 хамаандатыгар кыайыыны аҕалла.

Эмиэ ити саастаахтар 57 киилэҕэ тустууларыгар Алдантан төрүттээх бэрт киппэ көрүҥнээх Максим Егоров (Саха сирин сүүмэрдэммит хамаандата) Россия уолаттарга күрэхтэһиитин кыайыылааҕа, Европа түһүлгэтин кыттыылааҕа Егор Вензели (ДЮСШ-3) 5:3 ахсаанынан кыайа тутта.

Бүтэһик киирсии эр дьоҥҥо диэн ыытылынна. Онуоха 57 киилэҕэ көбүөргэ ДЮСШ-3 иитиллээччитэ, кадеттарга Россия чемпиона, аан дойду күрэхтэһиитин призера Петр Константинов уонна уолаттарга Россия түһүлгэтин икки төгүллээх кыайыылааҕа Уйгулан Иванов (Саха сирин сүүмэрдэммит хамаандата) таҕыстылар. Бу тустууга Константинов утарсааччытын баһыйа тутан 6:0 ахсаанынан кыайда. (Бу хапсыһыыны “Дьулурҕан” сайт Видео рубрикатыгар көрүөххүтүн сөп). Онон түмүккэ ДЮСШ-3 хамаандата көрсүһүүнү 6:3 ахсаанынан хотто.

Табаарыстыы көрсүһүү түмүгүнэн кыайыылаахтарга кыһыл көмүс, хотторуулаахтарга үрүҥ көмүс мэтээллэри дириэктэр Ф.А. Соловьев бэйэтэ туттартаата. Оттон көрсүһүү кылаабынай судьуйата – норуоттар икки ардыларынааҕы категориялаах судьуйа, педагогическай наука кандидата Владимир Торговкин кыайыылаах хамаандаҕа өйдөбүнньүк кубогы туттарда.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *