Сөҕөн-махтайан, үөрэн, астынан кэллилэр

Кавказ курдук тустуу сайдыбыт сиригэр биһиги оҕобут – Чурапчы улууһун Мугудай орто оскуолатын 6-с кылааһын үөрэнээччитэ Потапов Андрей тренировочнай сборга Жирков Виталий Николаевич салайааччылаах иккис сырыытын сылдьан кэллэ.

Тохсунньу саҥатыттан бастаан Чечняҕа Гудермес куоракка, онтон Дагестаҥҥа Хасавюрт куоракка уонна бүтэһик Хотугу Осетияҕа Владикавказ куоракка – чулуу тустууктар тахсыбыт оскуолаларыгар тустуу албастарыгар, уопсай физическэй дьарыкка аатырбыт тренердэр сүбэлэригэр-амаларыгар мастер-класстарга уһуйуллан, сүүрэн-көтөн, сөҕөн-махтайан, үөрэн, астынан аҕай кэллэ.

Эт-хаан, өй-санаа, тулуурдаах, бэйэни көрүнүү, элбэх доҕор, мужской характердаах буоларга иитэр. Тустуук буолуом диир уол оҕону маннык сборга сырытыннарар, сайыннарар ордук дии саныыбыт.

Жирков В.Н. туһунан эттэххэ, кини сатабыллаах салайааччы, энтузиаст, оҕолору спорт өттүн өрө тутан маннык сборга илдьэ сылдьан элбэх төрөппүт Махталын ылыан ылар. Элбэх оҕону атын сиргэ, дойдуга маннык илдьэ сылдьар манан аҕай буолбатах буолуохтаах. Эппиэтинэһэ улаханын өйдүүбүт. Барыларын көрөн-истэн, аҕалыы бүөбэйдээн…

Аны сынньалаҥнарыгар атын омук культуратын, сирин-уотун, кэрэ миэстэлэрин билиһиннэрэр-көрдөрөр. Онон оҕо билиитэ-көрүүтэ кэҥииригэр, сайдыытыгар улахан оруоллаах.

Сайын эмиэ сборга барарга былааннанан кэлбиттэр, сылдьыбыт оҕолор бары барабыт дэһэллэр. Биһиги уолбут Андрей эмиэ барабын диир. Түгэнинэн туһанан, Виталий Николаевичка өссө төгүл улахан Махталбытын биллэрэбит!

Михаил ПОТАПОВ, төрөппүт.

Чурапчы, Мугудай.

Добавить комментарий

Ваш адрес email не будет опубликован. Обязательные поля помечены *