Сүүрэр суолга – 13856 киһи таҕыста


Үгэс быһыытынан сыллата тэриллэр Бүтүн Россиятааҕы “Нациялар кросстара” Сүүрүү күнэ республикабыт киинигэр – Дьокуускай куоракка бүгүн, балаҕан ыйын 15 күнүгэр ыытылынна. Төһө да былыттаах, ардах кэнниттэн сииктээх күн буоллар, сүүрэр суолга элбэх киһи таҕыста. Үксүлэрэ оскуола үөрэнээччилэрэ, устудьуоннар.

Балаһыанньа быһыытынан, “Нациялар кросстарыгар” кыргыттар уонна уолаттар – 1000, салайааччылар – 2000, обургу кыргыттар уонна уолаттар итиэннэ дьахталлар уонна эр дьон 2000 миэтэрэҕэ сүүрдүлэр. Тэрийээччилэр эппиттэринэн, Дьокуускайга Сүүрүү күнүгэр барыта 13856 киһи кыттыыны ылла. Бу, саастарынан араарыллыбыт бөлөхтөргө үс бастыҥ көрдөрүүлээхтэр мэтээллэринэн уонна грамоталарынан наҕараадаланнылар. Син эмиэ чугастааҕы сылларга курдук, улахан дьон “Юность” стадионтан, оттон оҕолор “Чолбон” бассейнтан — “Туймаада” стадиоҥҥа диэри сүүрдүлэр.

“Нациялар кросстарын” үөрүүлээхтик аһыыга Саха Республикатын Спорка миниистирин солбуйааччы Александр Бугаев, Дьокуускай куорат баһылыгынан талыллыбыт Сардаана Авксентьева, Хотугулуу-Илиҥҥи федеральнай университет проректора Михаил Федоров уонна “Нациялар кросстарын” кылаабынай судьуйата Альберт Трофимов мустубут дьону эҕэрдэлээтилэр.
Ол кэнниттэн тута хайыһар роллерынан сырсыыга Дьокуускай куорат аһаҕас күрэхтэһиитэ саҕаланна. Дьэ, онтон, кылаабынай судьуйа хамаандатынан, саастарынан араарыллыбыт бөлөхтөр сүүрүүлэрэ биир-биир ыытыллан барда.

Бырагыраама быһыытынан, сүүрүүлэр түмүктэринэн “Туймаада” стадиоҥҥа кыайыылаахтары уонна миэстэлэспиттэри наҕараадалааһын буолла. Холобур, эр дьоҥҥо салайааччылар бөлөхтөрүгэр “Туймаада-Лизинг” тэрилтэ бухгалтера Петр Захаров бастакы, СР Спорка министрин солбуйааччы Александр Бугаев иккис, Дьокуускай куорат физическэй култуураҕа уонна спорка управлениетын начаалынньыга Константин Бурцев үһүс миэстэлэри ыллылар. Оттон салайааччы-дьахталлар бөлөхтөрүгэр Оксана Желлаева (“Виктори клиник”), Гульжан Огонерова, Ирина Дегтярева (“Триумф”) туһааннааҕынан бастакы-иккис-үһүс миэстэлэри үллэһиннилэр. Дьахталларга биллэр сүүрүүк, республика хас даҕаны төгүллээх чемпионката, Ис дьыала министиэристибэтин үлэһитэ Ирина Осипова сэрэйиллибитин курдук биэтэккэ бастакынан кэллэ. Полина Слободчикова иккис, Белла Аржакова үһүс миэстэлэри ыллылар.

Үөрүүлээх түгэн кэмигэр ГТО Бүтүн Россиятааҕы физкултурнай-спортивнай комплексын туйгуннарыгар уонна сарсыардааҥҥы чэбдигирдэр дьарыктары салайан ыытааччыларга анал бэлиэлэр, махтал суруктар туттарылыннылар. Кыттыбыт дьон бары санаалара көтөҕүллэн, чэбдигирэн тарҕастылар.

PS: Дьокуускай куоракка «Нациялар кросстарын» түгэнин «Хаартыскалар» рубрикаҕа киирэн көрөргүтүгэр. 

Добавить комментарий

Ваш адрес email не будет опубликован. Обязательные поля помечены *