Сэрэбиэй тугу түстээтэ?

Дьэ, сарсыҥҥыттан тустуу – Иван Ярыгин аатынан норуоттар икки ардыларынааҕы Гран-при турнир. Бүгүн киэһэ үс ыйааһыҥҥа сэрэбиэй оҥоһулунна. Кылгастык ону dzulurgan.ru сайтка билиһиннэрэн сырдатарга сананным.

Бастакы ыйааһын: сайаапкаттан көрдөххө, 15 кыттааччы баар. Итинтэн, балаһыанньа быһыытынан, маннык рейтиннээх турнирга биир ыйааһыҥҥа дойдуттан үстүү эрэ кыттааччы киирэринэн, прикидка түмүгүнэн икки бөҕөс көҕүрүүр.

Россияттан бу ыйааһыҥҥа “Аланнар” турнир кыайыылааҕа дагестанец Абасгаджи Магомедов бастакы нүөмэринэн сылдьар. Ол аата, атын хаалбыт бөҕөстөр: Хуреш Дондук Оол, Арыйан Тютрин, Амирхан Гуважаков, Муслим Садулаев сэрэбиэй быһыытынан киирсэн, ким турнир сүрүн сеткатыгар киирэрин быһаарсаллар.

Тютрин-Гуважоков, Дондук-Садулаев. Кинилэр сарсыарда бастакынан киирсэр буоллулар. Биллэрин курдук, буолан ааспыт Миндиашвили аатынан турнир финалыгар Тютрин Гуважоковтыын тустуохтаах этилэр. Ону Кабардино-Балкария бөҕөһө көбүөргэ тахсан илиитин утарсааччытыгар биэрэн, кыайыыны быһа биэрбитэ. Гуважоков улахан көрдөрүүтэ, уолаттарга Европа күрэхтэһиитин кыайыылааҕа. Оҕолорго Олимпиада кыттыылааҕа, бэһис миэстэлээх. Билигин сааһа 21-рэ.

Састаабы ырытан көрдөххө, ааттаах-суоллаах тустууктарынан буолаллар: аан дойду чемпионатын икки төгүллээх боруонса призера, Азия оонньууларын кыайыылааҕа Эрдэнэбат Бехбаяр (Монголия), аан дойду чемпионатын призердара Томас Гилман (АХШ), Тувшинтулга Тумэнбилег (Монголия). Манна даҕатан эттэххэ, үөһэ ахтыллыбыт Абасгаджи Магомедов уонна Тувшинтулга Тумэнбилег былырыыҥҥыга диэри 61 кг ыйааһыҥҥа тустар этилэр. Красноярскай көбүөрүгэр кинилэр бастакынан көрсөр буолбуттар. Дьэ, хайалара хоторун этэр уустук.

Сэрэбиэй тугу түстээтэ? Тютрин-Гуважоков кыайбыттара үөһэ бөлөххө монгол Н. Нармандахха тахсар. Өссө манна Садулаев-Дондук хапсыһыытын кыайыылааҕа 23-гэр диэри саастаахтарга аан дойду күрэхтэһиитигэр  үһүс миэстэлээх китаец Зу Ваньхаону кыттар киирсэр. Манна сыһыары тутан эттэххэ, Садулаев ити китаецка хотторон турар. Былырыын күһүн Бухарест көбүөрүгэр.

Ылан көрдөххө, аллараа бөлөххө Бехбаяр, Тумэнбилег, Магомедов, Гилман бииргэ түбэспиттэр.

Иккис ыйааһын: 14-лэр, мантан прикидка кэнниттэн икки бөҕөс туоруур. Прикидкаҕа Идрисов-Владимиров, Григорьев-Донгак диэн буолла. Санатан эттэххэ, аҕыйах хонуктааҕыта Миндиашвили турнирын финалыгар биһиги бөҕөспүт ити 22 саастаах тувинеһы 6:1 ахсаанынан эрэллээхтик хоппута. Бу да сырыыга кыайарыгар бүк эрэнэбит. Оттон иккис утарсааччыбыт — дагестанец Идрисов Россия чемпиона, 23-гэр диэри саастаахтарга аан дойду түһүлгэтин кыайыылааҕа…

Манна “Аланнар” турнир кыайыылааҕа Рамазан Ферзалиев (Дагестан) бастакы нүөмэринэн ааҕыллар. Кинини тэҥэ бу ыйааһыҥҥа былырыын Будапештка буолан ааспыт аан дойду чемпионатын боруонса призера Джозеф Колон (АХШ), 23-гэр диэри саастаахтарга аан дойду күрэхтэһиитин үһүс миэстэлээҕэ, биир дойдулаахпыт Николай Охлопков (Румыния) бааллар.

Сэрэбиэй быһыытынан, Охлопков бастаан Григорьев-Донгак хапсыһыыларын кыайыылааҕын кытта көрсөр. Ол хапсыһыыга ким хоппут, американецтар Д.Колон-К.Кларк кыайыылааҕар тахсар.

Оттон Владимиров Идрисовы кыайдаҕына, күрэхтэһиини Ферзалиевтыын саҕалыыр буолбут. Бу бөлөххө өссө Монголия, Туркмения бөҕөстөрө бааллар.

Чэ, ити курдук, ханныгын даҕаны иһин, биһиги бэйэбит уолаттарбытыгар мас-таас курдук эрэнэбит. Арыйан Тютрин, Эдуард Григорьев маннык састаапка төһө баҕарар ситиһиилээхтик тустар кыахтаахтар. Уолаттарбытыгар ыалдьыаҕыҥ!

Петр ПАВЛОВ.  

Добавить комментарий

Ваш адрес email не будет опубликован. Обязательные поля помечены *