Судьуйаларбыт Бүтүн Россиятааҕы үөрэтэр-методическай семинарга кытыннылар

Благовещенскай куорат көҥүл тустууга чемпионатын чэрчитинэн Россия спортивнай тустууга федерациятын көҕүлээһининэн, Дальнай Восток федеральнай уокуругун спортивнай судьуйаларын Бүтүн Россиятааҕы үөрэтэр-методическай семинардара ыытылынна.

Онно биһиги республикабытыттан биэс судьуйа кыттыыны ылла: соторутааҕыта Нарофоминскайга ыытыллыбыт Россия чемпионатыгар үлэлээбит Николай Николаев, Степан Скрябин уонна Станислав Афанасьев, Владислав Кривошапкин, Антуан Харлампьев.

Кинилэр тустуу кэмигэр тахсар бөҕөстөр албастаһыыларын сөптөөхтүк сыаналааһыҥҥа тахсар түгэннэри үөрэттилэр, күрэхтэһии кэмигэр судьуйаластылар уонна хапсыһыы араас балаһыанньаларын ырытыстылар. Ити курдук, семинар үс күн ыытылынна. Үөрэтэр-методическай семинары норуоттар икки ардыларынааҕы категориялаах судьуйа Алексей Базулин салайан ыытта.

Түмүккэ, судьуйаларбыт – лекциялар курстарын истибиттэрин, практическай дьарыктарга кыттыбыттарын уонна квалификационнай зачеттары туттарбыттарын иһин – Россия спортивнай тустууга федерациятын президенэ Михаил Мамиашвили уонна Россия тустууга судьуйаларын коллегиятын председателин солбуйааччы Нонна Арустамян илии баттааһыннаах туоһу суруктары (сертификаттары) туттулар.

Санатан эттэххэ, кинилэр бу семинарга бэйэлэрин үптэригэр-харчыларыгар, бэйэлэрин массыыналарынан сырыттылар.

Петр ПАВЛОВ.  

Добавить комментарий

Ваш адрес email не будет опубликован. Обязательные поля помечены *