Студеннар спортивнай сойуустарын тустууга күрэхтэһиилэрэ

Сэтинньи 16-17 күннэригэр М.К. Аммосов аатынан Хотугулуу Илиҥҥи федеральнай университет Тустууга саалатыгар студеннар спортивнай сойуустарын тэрилтэтэ (бэрэссэдээтэл Дмитрий Николаевич Платонов, толорооччу дириэктэр Роман Иванович Оконешников) Үрдүк анал үөрэх (ВПО) устудьуоннарын көҥүл тустууга республикатааҕы хамаанданан бастыыр иһин күрэхтэһиилэрин тэрийэн ыытта.

Күрэхтэһиигэ Тыа хаһаайыстыбатын государственнай академиятын, Р.М. Дмитриев аатынан Олимпийскай эрэл училищетын, Чурапчытааҕы физическэй култуура уонна спорт институтун, ХИФУ физическэй култуураҕа уонна спорка институтун уонна ХИФУ институттарын хамаандалара күрэс былдьастылар.

Түмүккэ Р.М. Дмитриев аатынан Олимпийскай эрэл училищетын хамаандата (тренер Станислав Захаров) кыайыылааҕынан таҕыста. Хамаанда састаабыгар Айаал Белолюбскай (57 кг), Михаил Васильев, Юрий Сивцев (61 кг), Виталий Неустроев (65 кг), Айсен Потапов, Егор Захаров (70 кг), Роман Михайлов (74 кг), Ньургустан Брошев (86 кг), Харысхан Николаев (97 кг) уонна Никита Хабаров (125 кг) бааллар. Кинилэр бастаан Тыа хаһаайыстыбатын государственнай академиятын хамаандатын 6:2 кыайан баран, иккис киирсиигэ Чурапчытааҕы физическэй култуура уонна спорт институтун хамаандатыгар 2:6 хоттордулар. Салгыы ХИФУ институттарын хамаандатын 8:0, ХИФУ физическэй култуураҕа уонна спорка институтун хамаандатын 5:3 ахсааннарынан кыайан, бастакы миэстэни хааччынна.

Иккис миэстэни эмиэ үс кыайыылаах, биир хотторуулаах М.К. Аммосов аатынан Хотугулуу Илиҥҥи федеральнай университет хамаандата (тренер Егор Старостин) ылла. Хамаанда састаабыгар Василий Алексеев (57 кг), Виталий Эспек (61 кг), Ньургун Александров (65 кг), Петр Павлов (70 кг), Афанасий Афанасьев (74 кг), Софрон Софронов (86 кг), Алексей Ефимов (97 кг), Ион Болтунов (125 кг) киирдилэр.

Үһүс бириистээх миэстэҕэ эмиэ үс кыайыылаах, биир хотторуулаах эрээри, хаачыстыбанан сабырыйтаран, Чурапчытааҕы физическэй култуура уонна спорт институтун хамаандата (тренер Виталий Корякин) таҕыста. Хамаандаҕа Дьулус Неустроев, Александр Захаров, Владислав Кривошапкин, Револий Самсонов, Алексей Захаров, Николай Константинов, Семен Аммосов киирдилэр. Манна даҕатан эттэххэ, чурапчылар ыарахан ыйааһыҥҥа кыттааччылара суоҕа таайда. Ол аата, түөртэ киирсиилэригэр – биирдии кыайыыны бэйэлэрин утарсааччыларыгар эрдэттэн “бэлэхтээн” кииристилэр.

Төрдүс миэстэни Семен Громов, Федот Дьячковскай, Станислав Попов, Артем Аммосов, Айсен Копырин, Никита Валеев, Ньургун Сергин састааптаах Дьокуускайдааҕы Тыа хаһаайыстыбатын государственнай академиятын хамаандата (тренер Аркадий Уларов) ылла. Кинилэр эмиэ ситэтэ суох састаабынан кытыннылар, 74 киилэҕэ кыттааччылара суох. Кинилэр биирдэ кыайдылар, үстэ хоттордулар.

Итиэннэ бүтэһик бэһис миэстэҕэ наар хотторуулаах, аҕыс ыйааһынтан – биэс эрэ кыттааччылаах ХИФУ институттарыттан таҥыллыбыт хамаанда хаалла.

Итини тэҥэ “Саха” устудьуоннар спортивнай сойуустарын Орто анал үөрэххэ үөрэнэр (СПО) устудьуоннарын көҥүл тустууга биирдиилээн бастыыр иһин күрэхтэһиилэрэ буолла. Манна барыта уон хамаандаттан 73 бөҕөс күөн көрүстэ.

Түмүккэ бэйэлэрин ыйааһыннарыгар кыайыылаахтарынан буоллулар: Манчаары Ильинов – 57 кг, Сергей Спиридонов – 61 кг (иккиэн – Дьокуускайдааҕы коммунальнай-строительнай техникум), Павел Стручков – 65 кг (Дьокуускайдааҕы Тыа хаһаайыстыбатын техникума), Андрей Дмитриев – 70 кг, Михаил Вензель – 74 кг, (Илларион Рожин – 86 кг, Игорь Кондаков – 97 кг (төрдүөн — Дьокуускайдааҕы промышленннай техникум), Ньургун Диодоров – 125 кг (Дьокуускайдааҕы индустриальнай-педагогическай колледж). Оттон хамаанданан түмүккэ Промышленнай техникум (хамаанда бэрэстэбиитэлэ Г.Н. Христофоров) иккис сылын субуруччу бастаата, Индустриальнай-педагогическай колледж (С.Ф. Скрябин) иккис, Намнааҕы техникум (Л.А. Соловьев) үһүс миэстэлэри ыллылар.

Бу күрэхтэһиилэр кылаабынай судьуйаларынан – бастакы спортивнай категориялаах Семен Кимович Николаев, оттон кылаабынай сэкиритээринэн – норуоттар икки ардыларынааҕы категориялаах судьуйа Владимир Гаврильевич Торговкин үлэлээтилэр. Кыайыылаах хамаандаларга кубоктар, оттон биирдиилээн бастыҥнарга мэтээллэр, грамоталар туттарылыннылар.

Петр ПАВЛОВ.

2 thoughts on “Студеннар спортивнай сойуустарын тустууга күрэхтэһиилэрэ

  • 18 ноября, 2018 в 7:28 пп
    Permalink

    Дьокуускайдаагы промышленнай техникум уруй-айхал! 😍👍👏👏👏👏👏

    Ответ
  • 18 ноября, 2018 в 8:57 пп
    Permalink

    Кыайыылаахтарга Эҕэрдэ!

    Ответ

Добавить комментарий

Ваш адрес email не будет опубликован. Обязательные поля помечены *