Станислав Свинобоев: “Спорка улахан сыалы-соругу ситиһэргэ бэлэммин”

Иркутскайга ыытыллан түмүктэммит көҥүл тустууга эдэрдэргэ (21-гэр диэри саастаахтарга) Россия түһүлгэтигэр биир дойдулаахпыт, уон аҕыс саастаах Станислав Свинобоев орто ыйааһыҥҥа бэрт кыахтаахтык тустан, кыайыылаах аатын эрэллээхтик ылла. Бу ситиһиинэн сибээстээн кини Россия сүүмэрдэммит хамаандатын састаабыгар киирэн, быйыл бэйэтин саастыылаахтарыгар улахан күрэхтэһиигэ кыттарга суоттанар.

“Триумфка” тэриллибит пресс-конференция кэнниттэн Станислав Свинобоевтан аҕыйах ыйытыыга хоруйдууругар көрдөстүм.

-Финалга Дагестан уолун кытта туһуннум уонна эрдэттэн кыайыам диэн эрэллээх этим. Бастаан бэйэм тустуубун тустан испитим. Салгыы киирсиигэ тренерим, киһим төбөтүн умса тардыалаан үлэлиирбэр, тустарбар сүбэлээбитэ өссө табыгастаах буолбута.

Станислав, баһаалыста төрүттэрин, төрөппүттэрин туһунан билиһиннэр эрэ. Кимнээхтэрий, спорка сыһыаннара хайдаҕый?

-Аҕам Свинобоев Егор Васильевич, ЖКХ-ҕа сварщик, слесарь. Онтон ийэм Анна Николаевна, Хорообут Бугаевтарыттан төрүттээх. Физкультура учууталынан үлэлиир. Бииргэ төрөөбүттэр үһүөбүт: убайдаахпын уонна эдьиийдээхпин. Убайым Егор Свинобоевы баҕар билэргит буолуо, национальнай многоборьеҕа уонна мас-рестлиҥҥэ спорт маастарыгар кандидат. Дыгын оонньуутугар кыттыбыта. Эдьиийим ыал буолбута.

Спорка сыһыаннарын туһунан эттэххэ, аҕам урут биатлонист, хайыһардьыт. Онтон ийэм – волейболист. Онон спорка сыһыаннаахпыт диэххэ сөп. Тустууга бастаан тренер Николай Прокопьевич Сивцевкэ дьарыктаммытым. Убайым тустар этэ, кини миигин секцияҕа аҕалбыта. Ол күнтэн ыла спорт бу көрүҥүнэн сөбүлээн эрчиллэбин, күрэхтэһэбин. Онтон бэһис кылааска үөрэнэрбэр Иван Алексеевич Белолюбскай кэлэн дьарыктаабыта. Онон кини эмиэ мин тустуук быһыытынан үүнэн-сайдан тахсыыбар сыһыаннаах. Алтыс кылаастан Төҥүлүгэ интернакка ылбыттара.

-Билиҥҥи тренериҥ Василий Петрович Уваров туһунан тугу этиэҥ этэй? Хайдах быһыылаахтык эрчиллэҕит?

-Тренер быһыытынан олох үчүгэй. Туох да диэн эппэппин. Үчүгэйдик дьарыктыыр хайыыр, көрөр-истэр, элбэҕи сүбэлиир-амалыыр. Миэхэ, спортсмен киһиэхэ ол наада буоллаҕа дии уонна туох наада буолуой.

Василий Петрович, эйиэхэ эрэнэн, спорка улахан сыалы-соругу туруоран үлэлиирин туһунан эттэ. Ол улахан сыралаах үлэ буолуохтаах. Онно эн бэлэмҥин дуо?

-Бэлэммин!

Санатан эттэххэ, Пресс-конференцияҕа эдэр чемпиоҥҥа тыл биэрбиттэригэр, Станислав бэрт сэмэйдик бары киниэхэ ыалдьыбыт, күүс-көмө, өйөбүл буолбут дьоҥҥо махтанна. Ордук Мэҥэ Хаҥалас улууһун баһылыга Николай Прокопьевич Старостиҥҥа уонна тренердэригэр.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *