Станислав Свинобоев – Румыния турнирын кыайыылааҕа!

Бухарест куоракка сылын аайы үгэс быһыытынан ыытыллар, бу дойду урукку биллиилээх бөҕөстөрө Думитру Пырвулеску уонна Василе Йорга ааттарынан эдэрдэргэ спортивнай тустууга (көҥүл, гректии-римнии, кыргыттар тустуулара) норуоттар икки ардыларынааҕы турнир түмүктэннэ.

Бу түһүлгэҕэ көҥүл тустууга Россия хамаандата (кылаабынай тренер Абдусалам Гадисов) быйылгы Россия чемпионнарын кытыннарда. Түмүк үчүгэй диэххэ сөп, алта киһиттэн – биэһэ бастаата! Арай, 57 киилэҕэ кыттыбыт дагестанец Багаутдинов барыллааһын хапсыһыыга Украина уолун 6:0 ахсаанынан кыайан иһэн, соһуччу ыраастык баран хаалла. Салгыы күрэхтэһиигэ украинец хотторон кэбиһэн, Багаутдинов мэтээл иһин тустууттан матта.

Бу турнирга биһиги биир дойдулаахпыт, Мэҥэ Хаҥалас ыччата, бу саас Иркутскай ыытыллыбыт эдэрдэргэ Россия күрэхтэһиитин кыайыылааҕа Станислав Свинобоев эрэллээхтик кытынна.

Кини бастакы күн утуу-субуу Финляндия, Украина, Румыния бөҕөстөрүн хапсыһыы болдьоҕун иннинэ очукуонан ыраастык кыайталаата. Оттон иккис күн финалга, Европа кадеттарга 2018 сыллааҕы түһүлгэтин үрүҥ көмүс призера, спорт маастара Станислав Новагы 12:10 ахсаанынан кыайан, 70 киилэҕэ бастакы миэстэни ылла.

Молдован уола киппэ көрүҥнээх, хорсун тустуук эбит. Икки төгүл уолбутун переводтаан кэннигэр тахсан уонна хаста да атахтаан охторон, ыксата сырытта. Ол эрээри, бэлэмэ ситэтэ суох буолан, хапсыһыы бүтүүтэ быста быһыытыйда. Станислав киирсии тухары холку көрүҥнээҕэ. Бэйэтигэр эрэллээҕэ көстөр, биллэр этэ. Киһитэ очукуо ыллаҕын ахсын, кимээһиннээхтик тустан, очукуону тэҥнээн истэ. Өссө санаабар, биһиги уолбут утарсааччытын атахтаан партерга охторон баран, саҥардыы үөһэттэн үлэлээн истэҕинэ, судьуйа свистоктаан туруоран кэбистэ. Итиннэ накатка эргитэлиир түгэннэр бааллара ээ. Чэ, буоллун…

Уопсайынан көрдөххө, Станислав – норуоттар икки ардыларынааҕы көбүөргэ, тас дойдуга тахсан үчүгэй сүрэхтээһини ааста диэххэ сөп. Манна даҕатан эттэххэ, кини утарсааччылара, ордук ити Украинаттан тустар Погосян, Новак даҕаны, маннык таһымнаах түһүлгэлэргэ элбэхтэ кыттыбыт, син көрдөрүүлээх, үөрүйэхтээх, биһиги уолбутуттан саастарынан аҕа тустууктар буолалларын санатар тоҕоостоох.

Бу турнирга Станислав тустууларын көрдөххө, кини ис кыахтаах эбит дии санаатым. Төһө баҕарар эбэн биэрэр кыахтаах эбит. Итиэннэ атыттарга холобур буолар гына эттэххэ, утарсааччыларын наар хамсатан, араастаан түөрэҥнэтэн, этэргэ дылы, сүнньүлэригэр ыйана, ноҕуруускалыы сылдьан, түҥ-таҥ ыыталаата. Наар кимээһиннээх тустууну ыытар, эрэллээх эбит. Ити барыта — аан дойду чемпиона Герман Контоевы, олимпиецтар Владимир Торговкины уонна Артур Федоровы, Алексей Варламовы уо.д.а. элбэх үрдүк ситиһиилээх тустууктары иитэн-такайан таһаарбыт улахан опыттаах тренер Василий Петрович Уваров өҥөтө диэххэ сөп.

Кырдьык, кэккэ сылларга Свинобоев-Уваров күүстээх, ситимнээх үлэни, дьарыгы ыытаннар, маннык ситиһиилэр кэлэн эрэллэрэ киһини астыннарбат буолуон сатаммат. Били, Василий Петрович бэйэтэ эппитигэр дылы, үрдүк кирбиигэ тахсыыга сыал-сорук барыта аһаҕас, киэҥ уонна дьэҥкэ буолуохтаах. Бэйэни сэнэммэккэ, кэмчиэрийбэккэ, аһаҕастык, наар кыайыыга-хотууга, ситиһиигэ эрэ суоттаныахтаахпыт. Оччоҕо кырдьык, бэйэ иннигэр туруоруллубут улахан сыаллар-соруктар кирбии, кэм быһыытынан ситиһиллэн иһиэхтэрэ.

Аны Станислав Свинобоев – атырдьах ыйыгар Башкортостан киин куоратыгар Уфаҕа ыытыллар эдэрдэргэ аан дойду күрэхтэһиитигэр кыттарга бэлэмнэнэр. Уолбутугар бары өртүнэн күүс-көмө, өйөбүл буолан, бу эппиэттээх түһүлгэҕэ үчүгэйдик бэлэмнэнэн, ситиһиилээхтик кыттарыгар баҕарыаҕыҥ!

Санатан эттэххэ, Бухарест көбүөрүгэр россияннартан Федор Балтуев (61 кг), Шамиль Мамедов (65 кг), Станислав Свинобоев (70 кг), Идар Хатанов (74 кг), Алик Бадтиев (79 кг), Ислам Картоев (86 кг), Иван Кириллов (92 кг) бастаатылар.

Петр ПАВЛОВ.

 

Добавить комментарий

Ваш адрес email не будет опубликован. Обязательные поля помечены *