Станислав Свинобоев боруонса мэтээл иһин тустуоҕа

Уфа (Башкортостан). Манна, 21-гэр диэри саастаах бөҕөстөр көҥүл тустууга аан дойду үрдүнэн бастыыр иһин күрэхтэһиилэрэ буола турар. Бастакы күн түмүгүнэн биэс ыйааһыҥҥа финалга кимнээх киирсэллэрэ быһаарылынна.

Эрдэ иһитиннэрбиппит курдук, 70 киилэҕэ диэри финалга тахсар иһин хапсыһыыга биһиги уолбут Станислав Свинобоев – Джабраил Гаджиевтыын (Азербайджан) көрүстэ. Итиэннэ хомойуох иһин, 1:6 ахсаанынан хотторон кэбистэ.

Манна Гаджиев бөрүкүтэ суох быһыыламмытын санатар тоҕоостоох. Тустуу кэмигэр кини соруйан тарбаҕынан уолбутун харахха анньан эчэтэ, самнара сатаата. Маныаха көбүөр судьуйалара уонна биһиги бөҕөспүт секунданнара тутатына туох да дьаһал ылбатахтара хомолтолоох…

Гаджиев күүстээх тустуук, ол эрээри, итинник гынара сыыһа. Маннык быһыы кинини киэргэппэт.

Онон аны Станислав үһүс миэстэ иһин тустар буолла. Кини, «уоскутар» бөлөххө болгарин Стоянов уонна швед Макота кыайыылааҕын кытта боруонса мэтээли ким ыларын иһин тустуоҕа. Биһиги бэйэбит бөҕөспүтүгэр эрэнэбит!

Финалга тустуохтара:

57 кг Рамазан Багавудинов (Россия) — Мухаммет Каравус (Турция)

65 кг Зираддин Байрамов (Азербайджан) — Шамиль Мамедов (Россия)

70 кг Джабраил Гаджиев (Азербайджан) — Эрфан Мохаммад Элахи (Иран)

79 кг Мохаммад Нородиларими (Иран) — Ашраф Аширов (Азербайджан)

97 кг Али Реза Абдоллахи (Иран) — Бракстон Амос (АХШ).

Бу ыйааһыннарга кыһыл көмүс уонна боруонса мэтээллэр иһин хапсыһыылар бүгүн, атырдьах ыйын 17 күнүгэр биһиги бириэмэбитинэн киэһэ 22:00 чаастан саҕаланыахтара. Ону Россия спортивнай тустууга сайтыгар wrestrus.ru көрүөххүтүн сөп.

«Дьулурҕан».

Добавить комментарий

Ваш адрес email не будет опубликован. Обязательные поля помечены *