Станислав Свинобоев бастаан туроктыын тустуоҕа

Сарсыҥҥыттан, атырдьах ыйын 16 күнүттэн Башкортостан киин куоратыгар Уфаҕа, 21-гэр диэри саастаах тустууктар аан дойду үрдүнэн биирдиилээн уонна хамаанданан бастыыр иһин күрэхтэһиилэрэ саҕаланар. Оттон бүгүн, бары ыйааһыннарга ким кими кытта тустарын быһаарар сэрэбиэй ыытылынна.

Эрдэ иһитиннэрбиппит курдук, бу күрэхтэһиигэ биһиги биир дойдулаахпыт, Мэҥэ Хаҥалас улууһун ыччата, быйыл саас Иркутскайга ыытыллыбыт Россия эдэрдэргэ түһүлгэтин кыайыылааҕа, Р.М. Дмитриев аатынан Олимпийскай эрэл училищетын студена Станислав Свинобоев кыттар.

Кини тустар 70-ҥа диэри киилэтигэр барыта 21 бөҕөс сэрэбиэйи ааста. Уолбут үөһээ бөлөххө, төрдүс киһинэн киирдэ. Кини бастакы утарсааччыта – турок Мевлют Оздемир, быйыл эдэрдэргэ Европа күрэхтэһиитин үһүс призера.

Бу хапсыһыыга ким хоппут, салгыы эргииргэ, финал чиэппэригэр Джайдип (Индия) – Монц (Германия) пааратын кыайыылааҕар тахсыаҕа.

Өссө бу бөлөххө, эдэрдэргэ Европа быйылгы чемпиона, саас Дьокуускайга ыытыллыбыт Роман Дмитриев аатынан норуоттар икки ардыларынааҕы турнир кыайыылааҕа Джабраил Гаджиев (Азербайджан) баар. Станислав этэҥҥэ туһуннаҕына, Гаджиевтыын финалга тахсар иһин киирсиигэ көрсүөн сөп.

Уолбутугар ситиһиилээх кыттыыны баҕарабыт!

Бу күрэхтэһиини Россия спортивнай тустууга сайтыгар wrestrus.ru быһа көрүөххэ сөп. Хапсыһыылар сарсын биһиги бириэмэбитинэн күнүс 15:00 чаастан саҕаланаллар.

Ковер А — https://wrestlingtv.ru/stream/LHUjCcmWDhmfuKfuE1Of_A
Ковер Б — https://wrestlingtv.ru/stream/GJxXMVqTIxHuGqZuoKAlkA
Ковер С — https://wrestlingtv.ru/stream/C4EuPVTSlcMc-8-G3aVHyA
Ковер Д — https://wrestlingtv.ru/stream/sSsq1eraMsAlRBCiuPkuVg

«Дьулурҕан».

Добавить комментарий

Ваш адрес email не будет опубликован. Обязательные поля помечены *