Спорт маастардарын кэккэтэ хаҥыыр

Россия спорка министиэристибэтин сайта иһитиннэрэринэн, Бүтүн Россиятааҕы спортивнай классификацияҕа олоҕуран, ааспыт нэдиэлэҕэ “Россия спордун маастара” спортивнай ааттары иҥэрии бирикээһэ таҕыста. Ол курдук, Саха Республикатыттан уон биир спортсмеҥҥа – Россия спордун маастарын нуормата иҥэрилиннэ.

Пауэрлифтердар Ярослав Морозовка, Семен Поповка, Юрий Стучковка, буулдьанан ытааччылар Наина Гоголеваҕа, Уйусхаан Захаровка, Ян Цойга, тустууктар Айтал Захаровка, Алексей Захаровка, Алина Казымоваҕа, дуобатчыт Елена Кычкинаҕа, Анатолий Протодьяконовка – Россия спордун маастардара ааттар иҥэрилиннилэр. Онон сотору кэминэн бу спортсменнарга итини туоһулуур бэлиэлэр уонна дастабырыанньалар туттарыллыахтара. Түгэнинэн туһанан, спорт саҥа маастардарын уонна кинилэр тренердэрин эҕэрдэлиэҕиҥ! Манан дуоһуйан хаалбакка, өссө дьаныардаахтык дьарыктанан – төрөөбүт республикаларын ааһан, дойдуларын дорҕоонноохтук ааттаталларыгар баҕарыаҕыҥ.

Үөрүүлээҕэ диэн, Дьокуускай куорат 5 нүөмэрдээх спортивнай оскуолатын (дириэктэр А.Б. Слепцов) үс иитиллээччитэ: Ян Цой, Анатолий Протодьяконов, Елена Кычкина – бэйэлэрин бу ситиһиилэринэн үөрэммит кыһаларын үбүлүөйдээх сылыгар дьоһун бэлэх оҥордулар.

Хаартыскаҕа: Анатолий Протодьяконов – дуобакка бэйэтин саастыылаахтарыгар аан дойду, Европа, Россия хас да төгүллээх чемпиона. Тренердэрэ: М.Н. Бырдыннырова, В.Н. Кычкин.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *