Спорт кыһыҥҥы көрүҥнэригэр Саха сирин 4-с спартакиадата саҕаланна!

Республикабыт киин куоратыгар, “Эллэй Боотур” Муус дыбарыаһын иннигэр спорт кыһыҥҥы көрүҥнэригэр Саха сирин 4-с спартакиадатын үөрүүлээх аһыллыыта буолла. Бу, түөрт сылга биирдэ тэриллэр Олимпиадаҕа хабааннаах спартакиада быйыл Дьокуускай, Алдан, Нерюнгри куораттарга ыытыллыаҕа.  

Спартакиада үөрүүлээх аһыллыыта, маннык бэлиэ түгэн сиэрин-туомун ситэрэн ыытылынна. Дьэрэкээн, сиэдэрэй оҥоһуулаах, кыһыҥҥы спортивнай көстүүмнээх хамаандалар уонна судьуйалар парадтаан киириилэрэ, Россия уонна Саха Республикатын судаарыстыбаннай былаахтарын тэлимнэтии, Спартакиада былааҕын көтөҕүү, спортсменнар уонна судьуйалар ааттарыттан андаҕар, эдэр хоккеистар ырыалара, “Гулун” ансаамбыл кыттыылаахтарын үҥкүүтэ… барыта, бу тэрээһини бырааһынньыктыы өрө көтөҕүллүүлээх оҥордо.

Үрдүк сололоохтортон, СР Бырабыыталыстыбатыттан спорка уонна физическэй култуураҕа сыһыарыылаах – СР Бырабыыталыстыбатын бэрэссэдээтэлин солбуйааччы, спорт кыһыҥҥы көрүҥнэригэр Саха сирин 4-с Спартакиадатын тэрийэр кэмитиэтин салайааччы Ольга Балабкина кыттыыны ылан, Спартакиаданы аһыллыбытынан аахта.

Спартакиада былааҕын көтөҕөр үрдүк чиэс Россия чемпионугар уонна призеругар Владимир Ковалевка, хотугу многоборьеҕа Россия чемпионатын абсолютнай чемпиона Алексей Сазоновка, Дальнай Восток чемпиона Арина Рязановаҕа уонна хотугу многоборьеҕа Россия чемпионатын призера Алена Луковцеваҕа тигистэ.

Спорт уонна физическэй култуура миниистирэ Иннокентий Григорьев эппитинии, 1926 сыллаахха аан бастаан хайыһарга республика чемпионата тэриллиэҕиттэн, спорт кыһыҥҥы көрүҥнэригэр чемпионаттар ыытыллан киирэн барбыттар. Бүгүн биһиги хайыһардьыттарбытынан, хоккеистарбытынан киэн туттабыт. Аны шорт-трекистар, биатлонистар ситиһиилэннилэр. Бу спартакиадаттан кынат үүннэринэн, спортсменнарбыт араас күрэхтэһиилэргэ ситиһиилээхтик кытталларыгар эрэл улахан.

Спартакиада кылаабынай судьуйата Альберт Трофимов иһитиннэрбитинэн, бырагыраама быһыытынан, олунньу 26 – кулун тутар 1 күннэригэр диэри Дьокуускайга спартакиада суотугар киирсэр хотугу многоборьеҕа уонна шорт-треккэ республика чемпионаттара ыытыллыахтара. Хоккеистар кулун тутар 23-28 күннэригэр “Эллэй Боотур” Муус дыбарыаһыгар күөн көрсүөхтэрэ. Хайалаах сиртэн түһүү уонна сноуборд күрэхтэһиилэрэ кулун тутар 26-30 күннэригэр Нерюнгрига, хайыһарынан спортивнай ориентирование кулун тутар 27-29 күннэригэр Чочур Мырааҥҥа, оттон хайыһар уонна биатлон муус устар 7-12 күннэригэр итиэннэ Спартакиаданы үөрүүлээхтик түмүктээһин муус устар 12 күнүгэр Алдаҥҥа ыытыллыахтара.

Спортсменнарга ситиһиилээх кыттыыны баҕарабыт!

Петр ПАВЛОВ.

Ааптар хаартыскаҕа түһэриитэ.

Добавить комментарий

Ваш адрес email не будет опубликован. Обязательные поля помечены *