Спорт историятын биир сыллааҕы түмүгүн үйэтитии

Биллиилээх спортивнай комментатор Ылдьаа Скрябин кэлиҥҥи сылларга бэчээтинэй бородууксуйаны таһаарыынан дьарыктанар. Ол курдук, хас да сыл спортивнай календардары, саха төрүт көрүҥнэригэр улахан таһымнаах күрэхтэһиилэр кыайыылаахтарын ааттарын үйэтитэн элбэх хаартыскалаах өҥнөөх буклеттары бэйэтэ бэлэмнээн, бэчээттэтэн таһааттарда.

Спорду таптыыр, спордунан олорор, спорт историятын сэҥээрэр дьоҥҥо бу наһаа туһалаахтар. Ким, ханна, хаһан бастаабыта. Туох, ханна, хаһан ыытыллара барыта интэриэһинэй. Онтон сорохтор маннык сэдэх таһаарыылары анаан мунньаллар.

Илья Ильич аны “2020 сыл чулуулара” диэн сурунаал-буклет оҥотторон таһааттарда. Манна, ааспыт сыл түмүгүнэн – олимпийскай, адаптивнай, национальнай, олимпийскайа суох көрүҥнэргэ уонна үөрэнээчилэргэ Саха Республикатын чулуу спортсменнара бары хаартыскаланан киллэрилиннилэр. Биир кэрэхсэбиллээҕэ диэн, сурунаалга 1962 сылтан ыла Саха сирин бастыҥ спортсменнарынан кимнээх буолбуттара барыта киллэриллибит. Эһиги санааҕытыгар саамай элбэхтик бастыҥ спортсменынан ким буолбута буолуой?

Сардаана Трофимова, Айаал Лазарев, Василий Егоров, Матрена Ноговицына, Айаал Макаров, Леонид Филиппов, Ньургун Скрябин, Татьяна Жиркова – тустарынан биирдии балаһанан матырыйааллар бэриллибиттэр. Ону тэҥэ киһи биир интэриэһиргиирэ диэн, сыл түмүгүнэн республика улуустарын бастыҥ спортсменнара ааттаммыттар. Холобура, Өлүөхүмэ улууһун бастыҥ спортсменынан ким буолбутун билэҕит дуо?

Билэргит курдук, төһө да уустук сыл буоллар, ат спордугар былааннаммыт улахан сүүрдүүлэр ыытылыннылар. Ону, телевизорынан быһа биэриигэ элбэх киһи көрөн астынна, сэргэхсийдэ. Сурунаалга ат сүүрдүүтүн күрэхтэһиитин түмүк көрдөрүүлэрэ, быһый атахтаах, уҥмат тыҥалаах сылгылар бириэмэлэрэ толору бэриллибит.

Быһата, спортпут историятын биир сыллааҕы түмүгүн үйэтитиигэ бэртээхэй үлэ буолбут. Ону бэйэҕит илиигитигэр туттаххытына сыаналаарыҥ.

XXI үйэ 2021 сылын тохсунньу 21 күнүттэн тирэхтээх сурунаалбын үүммүт Саҥа дьылынан эҕэрдэлээн, спортивнай сылы көрсө бэлэхтиибин, — диир Илья Ильич. — Ол күн бэчээккэ ыытаары ыксаллаахтык оҥорон ыыппытым. Бэлиэ күҥҥэ бэлиэ туруораары, бэлиэ күнтэн тирэхтэнээри.

Спортивнай суруналыыс Илья Ильич Скрябин маннык үлэни, сыл түмүктэринэн бастыҥнар тустарынан сурунаалы үгэс быһыытынан уонна 1962 сылтан ааттаммыт бары сыл чулууларын түмэн бэлэмнээн таһаарарга былаанныыр. Киниэхэ айымньылаах үлэтигэр ситиһиини баҕарыахха. Дьиҥэ маннык, суруналыыс киһи бэйэтинэн ылсан үлэлии сатыырын туһааннаах тэрилтэлэр туһаныахтарын сөп эбит. Араас улахан тэрээһиннэргэ бэлэххэ биэрэргэ бэртээхэй сурунаал диэн сыаналаатым.

Петр ПАВЛОВ.       

Добавить комментарий

Ваш адрес email не будет опубликован. Обязательные поля помечены *