Спорт дыбарыаһыгар — кикбоксиҥҥа Дальнай Восток чемпионата

“Кыайыы 50 сыла” аатынан Спорт дыбарыаһыгар кикбоксиҥҥа Дальнай Восток федеральнай уокурук чемпионата саҕаланна. Чемпионат, спорт бу көрүҥэр ССРС-тан бастакынан аан дойду чемпионун үрдүк аатын ылбыт Александр Иванов кэриэһигэр ыытыллар. Тэрийээччилэр биллэрбиттэринэн, бу чемпионат – муус устар ыйга Воронеж куоракка буолар Россия чемпионатыгар сүүмэрдиир сыаллаах. Чемпионакка улахан дьону тэҥэ, эдэрдэргэ эмиэ туспа күрэхтэһии тэриллэр. Ол курдук, дыбарыаска туруоруллубут рингэҕэ Хабаровскай, Приморскай, Камчатскай кыраайдар, Амурскай уобалас уонна Саха Республикатын бастыҥ байыастара, барыта 116 спортсмен тахсан, ким күүстээҕин быһаарсар.

Чемпионат үөрүүлээх аһыллыытыгар СР Правительствотын председателин бастакы солбуйааччы Алексей Колодезников, СР Физическэй култуураҕа уонна спорка миниистирэ Иннокентий Григорьев, РФ кикбоксиҥҥа федерациятын вице-президенэ Александр Березкин, СР кикбоксиҥҥа федерациятын бастакы вице-президенэ, боксаҕа норуоттар икки ардыларынааҕы кылаастаах спорт маастара Александр Михайлов, аан дойду чемпиона Александр Иванов бииргэ төрөөбүт балта Наталья Егоровна кыттыыны ыллылар.

Кинилэр, бу күрэхтэһии биллиилээх спортсмен Александр Иванов аатын үйэтитэр сыаллааҕын санаттылар, ким үчүгэй бэлэмнээх – ол кыайарыгар баҕардылар итиэннэ эһиил Дьокуускайга Россия кикбоксиҥҥа чемпионатын ыытарга үлэ бара турарын туһунан үөрүүлээх сонуну иһитиннэрдилэр.

СР Спорка миниистирэ, бу чемпионат кылаабынай судьуйатынан үлэлиир Руслан Саввиновка – Бүтүн Россиятааҕы категориялаах судьуйа аата иҥэриллибит докумуонун уонна бэлиэтин туттарда.

Дьэ, ол кэнниттэн бастакы күн киирсиилэрэ 2004-2005 сс. уолаттарга, 2002-2003 сс. ыччаттарга уонна эр дьоҥҥо саҕаланнылар. Саха сирин хамаандатыгар бастакы кыайыыны Тиит Босиков (57 кг) аҕалла. Кини Владивостоктан Егор Утенкову кыайа-хото тутта. Ити курдук, ыччаттарга Данил Егоров (54 кг), Игорь Глушак (63,5 кг) кыайдылар. Оттон улахан дьоҥҥо бастакы киирсиилэргэ Иван Захаров (51 кг), Павел Банников (54 кг), Иван Ле (54 кг) уо.д.а. кыайыы көтөллөннүлэр.

Бырагыраама быһыытынан, бүгүн олунньу 15 күнүгэр күнүс 14:00 чаастан – финалга тахсар иһин киирсиилэр.

Санатан эттэххэ, былырыыҥҥы маннык чемпионакка Саха сирин хамаандата 12 ыйааһынтан – алтатыгар кыайыыны ситиспитэ. Быйыл да ити көрдөрүүнү намтаппат соруктаахтар.

Петр ПАВЛОВ.

Ааптар хаартыскаҕа түһэриилэрэ.

 

Добавить комментарий

Ваш адрес email не будет опубликован. Обязательные поля помечены *