Спорт бочуоттаах маастарын туһунан үтүө өйдөбүнньүк

Республика хапсаҕайга быйылгы чемпионата муус устар 3-4 күннэригэр Ньурбаҕа ыытыллар уонна үбүлүөйдээх кэрэ бэлиэ түгэннэргэ ананар. Ол курдук, чемпионат – ССРС, Саха АССР спортарын маастара Петр Алексеев үбүлүөйдээх сылыгар уонна Саха Республикатын хапсаҕайга федерациятын толорооччу дириэктэрэ Алексей Егорович Мостахов 75 сааһыгар ананар.

Манан сибээстээн Ньурба оройуонун дьаһалтата – чемпионат ыарахан ыйааһыҥҥа муҥутуур кыайыылааҕар сүрүн бириис быһыытынан массыына туруорарын биллэрдэ. Оттон 75 киилэҕэ диэри муҥутуур кыайыылаах – 100 тыһ. солк. харчынан бириэмийэлэниэ.

Чемпионат кылаабынай судьуйатынан Петр Бурцев, кылаабынай секретарынан Андриан Захаров үлэлиэхтэрэ.

Дьэ, маннык улахан таһымнаах түһүлгэни көрсө Саха Республикатын культуратын үтүөлээх үлэһитэ, 1998, 2005 сс. Саха сирин бастыҥ спортивнай суруналыыһа Александр Васильев – Көрдүгэн «Спорт бочуоттаах маастара Петр Алексеев» диэн кинигэни бэлэмнээн таһаарда.

Ааптар – кинигэ тахсарыгар харчынан көмөлөспүт Ньурба улууһун физическэй культураҕа, спорка управлениетыгар (Р.А. Алексеев, А.В. Иннокентьев), Петр Алексеев тустуутун бииргэ саҕалаабыт, сүрүн утарсааччы буолбут доҕоро, ССРС, РСФСР, Саха АССР спордун маастара, Саха сирин үтүөлээх тренерэ Иннокентий Халдеев уола А.И. Халдеевка уонна РФ үтүөлээх шахтёра, СР үтүөлээх горняга, Таатта улууһун бочуоттаах гражданина П.Д. Рахлеевка барҕа махталын тиэрдэр.

Кинигэҕэ Ньурба спорка историята, Петр Алексеев тустууга олоҕо сиһилии кэпсэнэр. Итиэннэ Петр Еремеевич олоҕун, тустуутун, Ньурба хапсаҕайын көрдөрөр-кэпсиир элбэх да элбэх хаартыскалар бэчээттэммиттэр.

Бу үлэ биир сүрүн түһүмэҕинэн, 1997 сылтан саҕалаан СР хапсаҕайга П.Е. Алексеев бирииһигэр чемпионатын түмүк көрдөрүүтүн биэрии буолар. Манна ыйааһыннарынан кимнээх бастаабыттара, иккис-үһүс буолбуттара барыта кырылаччы сурулла сылдьар. Ону тэҥэ сылларынан ханнык хамаандалар миэстэлэспиттэрэ, кылаабынай судьуйанан кимнээх үлэлээбиттэрэ ыйыллар.

Бу анал таһаарыыга эппиэттээҕинэн – Ньурба улууһун спорка управлениетын сүрүннүүр специалиһа, көҥүл тустууга РФ спордун маастара Андрей Иннокентьев үлэлэспитин санатар тоҕоостоох.

Кинигэ Дьокуускай куоракка ИП Троев Ю.А. 300 ахсаанынан бэчээттэнэн таҕыста.

Бу кинигэ – Петр Алексеев аатынан Саха сирин хапсаҕайга биирдиилээн уонна хамаанданан бастыыр иһин XXIV чемпионатын тэрийээччилэригэр уонна кыттыылаахтарыгар дьоһун бэлэҕинэн буолуоҕа.

«Дьулурҕан».

Добавить комментарий

Ваш адрес email не будет опубликован. Обязательные поля помечены *