Спортсменнар киэҥ көхсүлэниҥ, эйэҕэс майгыланыҥ, чэгиэн туруктаныҥ!

Спортсменнар тустарынан. Сиэр майгы. Мин саныахпар киэҥ-холку майгылаах спортсменнар, титуллара өр кэмҥэ тулуһар. Холобура, бырааттыы Кличколар, Федор Емельяненко , Александр Поветкин, Денис Лебедев, Эдуард Трояновскай киһиргэһэ суохтар. Атыттар курдук мээнэ дьаллаҥалаан уруһуйдамматтар. Киэҥ көҕүстээхтэр. Үчүгэйдик дьарыктаналлар. Ол иһин өр кэмҥэ хотторбокко сырыттылар. Майк Тайсон өссө да өр кэмҥэ сылдьыах киһи, утарылаһааччыларын сэнээн, киһиргээн наркотигы да тардан – хотторуу хомолтотун билбитэ. Конор Макгрегор эмиэ бэйэтин аһары билинэн кэбиһэн, үчүгэйдик тахсан иһэн бүдүрүйдэ. Мээнэ киэбириҥниир дьону таҥара да көрөр курдук.

Владимир Кличко уонча сыл хотторбокко сылдьыбыта. Убайын Виталийы кытта киирсибит киһиргэс Дерик Чисора, Владимиры сирэйин уунан тыбыырбыта. Онуоха сирэйэ ибир гынан да көрбөтөҕө. Оннук холку дьон мэлдьи кыайыылаах тахсаллар. Кыйахаммыт киһи рингэҕэ киирсэрин саҕана дэлби күүрэн, илиитэ-атаҕа бааллыбыт курдук буолар.

Федор Емельяненконы да ылан көрүөххэ. Киирсэр кэмигэр таҥараттан көрдөһөр. Кириэс кэтэ сылдьар. Ырыата да оннук. Федор рингаҕа киирэн бу сиэх-аһыах курдук өтөрү-батары көрөр утарылаһааччытын өстүйэ көрбөт. Үксүн умса көрөн турар. Ону билбэт дьон: «Куттаммыт», “Тоһунна, умайда » — дии саныыллар. Федор тас көрүҥэ киирсээри буолбакка, бу кимиэхэ эрэ бэлэх биэрээри турар киһи курдук холку. Сирэйигэр мичээр хоммут.

Дьэ, онтон саҕаланна да тугу этиэҥ баарай?! Илиитэ-атаҕа күөрэйбитинэн барар. Эчи оҥорор албаһа элбэҕин. Охсоро түргэнэ, хотутара да бэрт. Кэнники сааһыран хотторор буолла. Уон сыл соҕотохтуу сураҕыран, аҥардастыы аатыран сылдьыбыта. Киниэнэ үксүтэ күүстээх утарылаһааччылар этэ. Оҕуһу туруору туппут курдук, сүүнэ бөҕөстөрү боҕутуннартаабыта.

Онтон бу кэнники ММА-ҕа киирсээччи Сергей Харитонов киэҥ көҕүстээҕин, холкутун, сэмэйин көрдөрдө.

Эмиэ быраабылата суох киирсиигэ охсуһааччы Адам Яндиев диэн байыас Харитоновы өмүтүннэрэн охсуолаата. Уоран киһини оҕустахха туймаарара биллэр буоллаҕа. Ол кэмҥэ дьэ охторон түһэрбитин дьон тохтоттулар. Яндиев үөхсэрэ, маатырыта тыла быдьара диэн сүрдээх. Яндиев эрдэттэн итинник дьон көрөрүгэр түһэммин аат-суол ылыам диэн дьарыктаммыт. Ол да иннинэ атын дьону өмүтүннэрэн охсон баран, интернеккэ киһиргэнэн кэпсэнэр идэлээх эбит. Сергей Харитоновтан харчы кыралаан иэс ыла сылдьыбыт. Мөлүйүөн курдугу ылан баран, сылы быһа төннөрбөтөх. Атын да дьонтон харчы иэс ылан баран, төлөөбөт идэлээх эбит. Онтон кэнники Сэргэй бэйэтэ харчыга наадыйан иэһин көрдөөбүтүгэр өһүргэммит: «Ханнык иэскинэн баайсаҕын?!» — диэн кыйаханар. Эбиитин өмүтүннэрэн сабы түһэн охсуоланар.

Харитонов холку муҥутаан «мин уулусса охсуһууга буолбатахпын», — диир. Оннук наадыйар буоллаҕына, рингэҕэ киирсэр кыахтаахпын диир.

Яндиев итии хааннаах илбис тыыннаах хапкаас киһитэ буолан, ханна баҕар үөҕүстүлэр да, түсүһэн кэбиһэр адьынаттаах. Кини ойохтоох, оҕолордоох. Кинилэри иитээри мэлдьи Харитоновтан атын да дьонтон харчы көрдүүр эбит. Сергей ону өйдөөн банкаттан кредит ылан туран биэрбит. Тутах санаалаах киһи: «Бу Харитонов миигиттэн куттанан көрдөөтүм да биэрэр эбит», — дии саныан син. Махтаныан билиминэ дьон көрөрүгэр эмискэ сабы түһэр. Яндиев харчы көрдүүрүн саҕана ньылбаарыҥнаан тыла барыта «брат» диэн эбит. Интернеккэ суруйара: «мин ол киһини онно дөйүппүтүм», — диэн кэпсэнэр. Билигин Харитонов туһунан эмиэ кэпсээн тарҕатан эрдэҕэ.

Яндиев орто ыйааһыҥҥа киирсэр, Харитонов сүүс сүүрбэ киилэ ыйааһыннаах. Рингэҕэ көрсөрө буоллар, атыннык кэпсэтиэ этэ.

Манан мин тугу этээри гынабын? Спордунан дьарыктанар буоллаххытына киэҥ көхсүлэниҥ, эйэҕэс майгыланыҥ, чэгиэн туруктаныҥ!

Бары үтүөнү кытта ОРОДЬУМААН.

Добавить комментарий

Ваш адрес email не будет опубликован. Обязательные поля помечены *