Спортсменнарбыт ханна, хайдах эрчиллэ сылдьалларый?

Аан дойдуну атыйахтаах уулуу аймаабыт коронавирус пандемията биһиги олохпутугар көһүтүллүбэтэх уларыйыылары киллэрдэ. Ханан даҕаны дьиэҕэ олоруу, карантин биллэриллибитэ сыл аҥаара буолан эрэр. Маныаха спортсменнарбыт ханна, хайдах эрчиллэ сылдьалларын интэриэһиргиир киһи элбэх буолуохтаах.

Үөскээбит уустук балаһыанньаҕа тренердэрбит уонна спортсменнарбыт бириэмэлэрин кураанахха ыыппакка, бэйэлэрин кыахтарынан эрчиллиилэри, дьарыктары ыытыыларын быспаттар диэххэ сөп.

Эһиги болҕомтоҕутугар Саха сирин сүүмэрдэммит хамаандаларын спорка бэлэмнэниилэрин республикатааҕы киинин дириэктэрин бастакы солбуйааччы Михаил Пахомов аҕыйах хонуктааҕыта “Саха” национальнай көрдөрөр-иһитиннэрэр хампаанньа “Саҥа күн” биэриитигэр кэпсээбитин билиһиннэрэбит:

Тустууктарбыт Арыйаан Тютрин, Петр Константинов, бырааттыы Алексей, Петр Копыловтар, Владимир Егоров (Македония) уонна да атын бөҕөстөрбүт «Роспотребнадзор» туох баар ирдэбиллэрин тутуһан, коронавируска анализ туттаран — сабыылаах түмсүүгэ, биһиги Аллараа Бэстээххэ баар спортивнай базабытыгар от ыйын саҥатыттан саҕалаан эрчиллэ сылдьаллар. Кинилэр, Россия көҥүл тустууга чемпионатыгар бэлэмнэнэллэр. Билэргит курдук, ити чемпионат календарьга барыллааһын быһыытынан Хотугу Осетия киин куоратыгар Владикавказка алтынньы ыйга буолара былааннанар. Чопчу ыытыллар күнэ-дьыла бакаа биллибэт. Эдэр тустууктарбыт эмиэ, балаҕан ыйын ортотугар Нарофоминскайга буолуохтаах Россия күрэхтэһиитигэр бэлэмнэнэллэр. Легионердарбытын эттэххэ, Владислав Андреев, Ньургун Скрябин уонна Андрей Бекренев Белоруссияҕа, оттон Айаал Лазарев Дьокуускайга эрчиллэллэр.

Ити курдук, «Манньыаттаах» спортивнай базатыгар тустууктары тэҥэ кикбоксердар, оҕунан ытааччылар, боксердар, гректии-римнии тустааччылар эрчиллиини бардылар. 

Атын спортсменнары билиһиннэрдэххэ, дзюдоисткалар Ньургуйаана Никифорова Россия сүүмэрдэммит хамаандатын кытта Сочи, оттон Аина Моисеева Екатеринбург куоракка эрчиллэ сылдьаллар. Билиҥҥи кэмҥэ бастыҥ боксербут Василий Егоров Москва уобалаһын Серпухов куоратыгар Россия сүүмэрдэммит хамаандатын үөрэтэр-эрчийэр түмсүүтүгэр кыттыһар. Владимир Балынец (паурлифтинг), Степанида Артахинова уонна Николай Новгородов (оҕунан ытыы), Алена Дмитриева (олорон эрэн волейбол) Россия хамаандатын кытта Алексин куоракка эрчиллэ сылдьаллар.

Василий Егоров балаҕан ыйын саҥатыгар Россия Кубогар кыттыахтаах. Василийы кытта ити күрэхтэһиигэ өссө боксердар Михаил Варламов уонна Николай Григорьев кыттыахтаахтар. Биир бастыҥ спортсмеммыт, чэпчэки атлет Сардаана Трофимова Кисловодскай куоракка сбордана барбыта. Кини Москва куоракка балаҕан ыйын 20 күнүгэр буолуохтаах марафоҥҥа кыттыахтаах. Манна кини олимпийскай квалификацияны толоруохтаах.

Ити ааттаммыт биһиги бастыҥ спортсменнарбыт соҕуруу эрчиллиилэрин сүрүннээн от ыйыттан саҕалаабыттара. Оттон күрэхтэһиилэр уопсай балаһыанньаттан көрөн,  балаҕан ыйыттан саҕаланан киирэн барыахтаахтар.

Спортивнай базалар тустарынан эттэххэ, биһиги Ил Дархаммыт ыйааҕынан билиҥҥитэ киин куоракка тренажернай саалалар уонна фитнес кулууптар итиэннэ аһаҕас салгыҥҥа — стадиоҥҥа дьарыктар ыытылла тураллар. Балаһыанньа хайдах көнөрүттэн көрөн, атын да спортивнай обьектар үлэлэрин саҕалыылларыгар бэлэмнэнэ сылдьабыт.

Итини таһынан, Михаил Дмитриевич этиитигэр эбэн эттэххэ, биллэр тустуукпут Виктор Рассадин билигин анал былаанынан үлэлии сылдьар, Новосибирскайга тиийэн гректии-римнии тустууга олимпийскай чемпион Роман Власовтыын эрчилиннэ…

Ити курдук, биирдиилээн энтузиаст-тренердэр көҕүлээһиннэринэн киин куоракка уонна улуустарга дьоҕус бөлөххө мустан, спортсменнар дьарыктарын тохтоппоттор. Биллэн турар, кинилэр билигин ирдэниллэр санитарнай нуорманы барытын тутуһаллар диэххэ наада. Ол түмүгэр дуобатчыттарбыт, ытааччыларбыт (спортинг), боксердарбыт, оҕунан ытааччыларбыт кэккэ күрэхтэһиилэргэ ситиһиилээхтик кыттыбыттарын санатар тоҕоостоох.

Петр ПАВЛОВ.    

Добавить комментарий

Ваш адрес email не будет опубликован. Обязательные поля помечены *