Спортивнай оскуола үбүлүөйүн бэлиэтиир

Бу күннэргэ РФ физическэй култуураҕа уонна спорка үтүөлээх үлэһитэ, СР үтүөлээх тренерэ В.П. Керемясов аатынан Дьокуускай куораттааҕы 3 №-дээх оҕо спортивнай оскуолата тэриллибитэ 20 сыллаах үбүлүөйүн бэлиэтиир.

Үбүлүөйдээх тэрээһиннэр тустарынан оскуола дириэктэрэ, СР физическэй култуураҕа уонна спорка үтүөлээх үлэһитэ, РФ уопсай үөрэхтээһиҥҥэ бочуоттаах үлэһитэ, көҥүл тустууга бэтэрээннэргэ аан дойду чемпиона Федот Архипович Соловьев маннык билиһиннэрэр:

— Үбүлүөйдээх дьаһаллары тэрийэн ыытыыга биһиги, алтынньы 1-13 күннэригэр диэри былаан ылыммыппыт. Ол былааммытыгар, тэрилтэлэри кытта көрсүһүүлэр буолуохтара, онно анаан презентациялаахпыт. “Саха” көрдөрөр-иһитиннэрэр компания “Саҥа күн” уонна “Спорт-клуб” биэриилэригэр таҕыстыбыт. Кадетскай оскуолаҕа номнуо сылдьан бэйэбит үлэбитин билиһиннэрдибит уонна икки өттүттэн көмөлөсүһэн бииргэ үлэлииргэ кэпсэттибит.

Бу күннэргэ Олимпийскай эрэл училищетыгар тиийиэхтээхпит. Итиэннэ манна үөрэх оскуолаларыгар сылдьыахпыт. Ону таһынан, алтынньы 9 күнүгэр Дьокуускайдааҕы педколледж актовай саалатыгар киэһэ 18:00 чаастан улахан тэрээһини ыытабыт. Төрөппүт мунньаҕын курдук тэрийэн, онно туох баар түмүкпүтүн таһаарыахпыт.

Сарсыныгар, алтынньы 10 күнүгэр Саха Республикатын көҥүл тустууга федерациятын салалтатын кытта көрсөргө былааннанабыт. Алтынньы 12 күнүгэр бэйэбит саалабытыгар биһиги оскуолабыт оҕолорун хамаандата – республика сүүмэрдэммит хамаандатын кытта табаарыстыы тустууга көрсүһүүтүн тэрийиэхпит.

Түмүккэ, алтынньы 13 күнүгэр төрөппүттэр күүстэринэн оһуохай тэрийэбит. Онно түөрт төрөппүт бириис туруоран, оһуохай тылын таһаарааччыларга туттарыахтара. Биһигини кытта ситимнээхтик үлэлэһэн кэлбит куорат түөрт оскуолатын дириэктэрдэригэр Оҕо дыбарыаһыгар тэриллэр көрсүһүүгэ анал кубок туттарыахпыт.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *