Спорду өрө тутар Горнай кыыһа – Амма мааны кийиитэ

Муус устарга Алдан куоратыгар өрөспүүбүлүкэбит биир улахан, спортивнай тэрээһинэ түмүктэннэ. Ол курдук, түөрт сыл көтө-көтө буолар, Саха сирин кыһыҥҥы Спартакиадата үрдүк тэрээһиннээхтик ыытылынна.

Спорт кыһыҥҥы көрүҥнэрин күрэхтэһиитигэр хамаандалар түөрт бөлөххө арахсан илин-кэлин түһүстүлэр. Манна иккис бөлөххө Амма улууһа эрэллээхтик бастакы миэстэни ылла. Иккис-үһүс миэстэҕэ Чурапчы уонна Мэҥэ Хаҥалас спортсменнара таҕыстылар.

Аммаларга биһиги биир дойдулаахпыт Айталина Борисова (Осипова) хамаанда инники күөҥҥэ тахсарыгар бары кыһамньытын уурбутун үөрэ иһиттим. Сэмэн Данилов аатынан оскуолаҕа бииргэ үөрэммит кыыспын тутатына төлөпүөнүнэн эҕэрдэлээтим. Күннээҕи олох-дьаһах туһунан кэпсэтэн баран, спортивнай көрдөрүүлэрин интэриэһиргэстим.

Горнай кыыһа өрөспүүбүлүкэ бары улахан күрэхтэһиилэрин көтүппэт. Чаҕылхай ситиһиитинэн хайыһар спордугар сүгүрүйээччилэр ортолоругар ыытыллар, Бүтүн Россиятааҕы күрэхтэһии пьедесталын чыпчаалыгар тахсыбытынан киэн туттар.

Айталина Бэрдьигэстээххэ ааспыт оҕо сааһын олус күндүтүк саныыр. Төрөппүттэрэ Афанасий Тихонович, Вера Прокопьевна Осиповтар. Аҕата муусука учуутала. Ийэтэ ойуур хаһаайыстыбатыгар үлэлээбитэ. Айтаны кыра эрдэҕиттэн оттоон-мастаан, ньирэй аһатан, ынах ыан тыа сирин үлэтигэр-хамнаһыгар сыһыаран улаатыннарбыттара. Оҕо сааһыгар “Маай” сайылыгын алаастарын тэлэһийэ сүүрэрэ.

Оскуолаҕа үөрэнэр кэмнэригэр чэпчэки атлетиканан, хайыһарынан ордук үлүһүйэн туран дьарыктанара. Физкультура учууталларын Дмитрий Колесовы, Николай Колесовы спорка сыһыарбыт дьоннорунан ааҕынар. Бастакы тренердэрим диэн истиҥник ахтар.

1989 с. Сэмэн Данилов аатынан оскуолаҕа үөрэнэ сылдьан, ахсыс кылаас кэнниттэн уһуну-киэҥи толкуйдуу, ырыта барбакка физкультура учуутала буолуохтаахпын диэн соругу туруорунан, Дьокуускайдааҕы педогагическай училищеҕа туттарсан киирэр. 1993 с. исписэлиис киһи быһыытынан, тапталлаах оскуолатыгар физкультура учууталынан үлэтин саҕалыыр.

1994 с. үлэтин салҕыыр баҕалаах Аммаҕа көһөр. Онно олорон, олоҕун аргыһын Владимиры кытары көрсөн ыал буолаллар. Үс оҕолоохтор улахан кыыс Вера омук тылын учуутала, уол Евгений АГАТУ устудьуона, кыра уол Валера I-кы кылаас үөрэнээччитэ. Икки сиэннээхтэр. Күтүөттэрэ Одуну ыччата Степан Текеянов. Онон Горнайы кытары ситим быстыбат.

Айталина Афанасьевна төрөөбүт дойдутуттан төһө да ыраах олордор, Горнайын аатын мэлдьи үрдүктүк тута сылдьар. Хайыһар спордун аргыс оҥостубут спортсменнарбытын Степан Контоевы, Варя Текеянованы, Вера Федорованы, Мая Брызгалованы, Любовь Прокопьеваны, Мария Семенованы кытары сибээһин быспат. Улууһун аатыттан күрэхтэһиилэргэ ыҥырдахтарына үөрүүнэн сөбүлэһэр. Ситиһиини, хомолтону тэҥҥэ үллэстэр.

Биир дойдулаахтарбыт ханна да сырытталлар, төрөөбүт дойдуларын умнубаттарыттан, өйдүү-саныы сылдьалларыттан үөрэбит, киэн туттабыт!

Вячеслав АЛЕКСЕЕВ.

Горнай.

Добавить комментарий

Ваш адрес email не будет опубликован. Обязательные поля помечены *