“Спартак” кэтэһэр, күүтэр турнира

Кулун тутар 1 күнүгэр Дагестан Өрөспүүбүлүкэтин Хасавюрт куоратыгар быйыл иккис сылын Илья Анатольевич Солдатов аатынан 2004-2005, 2006-2007, 2011-2012 уонна онтон кыра төрүөх уолаттарга көҥүл тустууга аһаҕас турнир буолан ааста.

Көҥүл тустууну, чөл олоҕу көҕүлүүр, эдэр тустууктар маастарыстыбаларын үрдэтэр, Россия регионнарын ортолоругар доҕордуу сыһыаны күүһүрдэр сыаллаах-соруктаах ыытыллар турнир Хасавюртааҕы «Спартак» оҕо спортивнай оскуолатын базатыгар буолан ааста.

Илья Анатольевич тренер быһыытынан үлэтин биир ураты хайысхата – Дагестаны кытта ситимнээх үлэ этэ. 10-тан тахса сыл кини Хасавюрт куорат «Спартак» оҕо спортивнай оскуолатын кытта ыкса сибээстээхтик үлэлээбитэ. Төһө да Илья Анатольевич олохтон туораабытын, биһиги кэккэбитигэр суоҕун иһин, кини саҕалаабыт, олохтообут сибээһэ билигин үлэлии сылдьар тренердэргэ сүрүн тирэҕинэн, өйөбүлүнэн буолар. «Спартак» оҕо спортивнай оскуолатын коллектива биир дойдулаахпыт Илья Анатольевич Солдатов туһунан олус истиҥ өйдөбүллээхтэр. Ол да иһин быйыл иккис сылын кини аатынан ыытыллар турнир тэрээһинин өйөөн, үлэ былааныгар киллэрэн, үрдүк таһымнаахтык ааста.

Быйылгы турнирга «Спартак» спортивнай оскуола филиалларыттан – Октябрьскай, Нурадилово, Адильянгиюрт, Тотурбийкала, Ботаюрт бөһүөлэктэртэн, Ленинградскай уобаластан, олунньу 10 күнүттэн Хасавюрт куоракка эрчиллэ сылдьар Амматааҕы оҕо спортивнай оскуолатыттан уонна Уус Алдантан (старшай тренер И.П. Пантилов) – барыта 130 эдэр бөҕөс 15 ыйааһыҥҥа кыттыыны ылла.

Турнир үөрүүлээх арыллыытыгар ”Амма уонна Дагестан” диэн Илья Анатольевич Солдатов олохтообут сибээһэ салҕанан бара турарыгар, үрдүк таһымҥа тахсыбытыгар махталбытын биллэрэн туран, Амма улууһун көҥүл тустууга федерациятын уонна физическай культураҕа, спорт управлениетын Махтал суруктарын Хасавюрт куорат дьаһалтатын физическэй култуураҕа уонна спорка кэмитиэтин салайааччытыгар, Россия үтүөлээх тренеригэр, Аан дойдутааҕы кылаастаах спорт маастарыгар Магомедали Газимагомедовка, «Спартак» оскуола дириэктэригэр Мухтар Джамалдиновка, интернат дириэктэригэр Мурад Джамалдиновка, дириэктэри иитэр үлэҕэ солбуйааччыга Заира Зубаироваҕа, тренердэргэ: Султанбий Хайдаковка, Абдул Биярслановка, Артур Галасхановка, Арсен Бийбулатовка туттардыбыт. Төрөөбүт Эмиһин нэһилиэгин дьаһалтатын баһылыга Прокопий Бубякин – Илья Анатольевич Хасавюртааҕы доҕотторугар «Спартак» оскуола дириэктэригэр Мухтар Джамалдиновка, тренер Абдул Биярслановка анаан ыыппыт Махтал суругун туттардыбыт.

Турнира үрдүк таһымнаахтык ыытылынна. «Доҕорбут Илья Анатольевич аатынан турнир сылтан сыл таһыма үрдээн иһэр. “Спартак” иитиллээччилэрэ, тренердэрэ кэтэһэр, күүтэр турнирдарын таһымыгар таҕыста“, — диэн олохтоохтор өттүлэриттэн үрдүк сыанабылы иһиттибит. Бу үрдүк сыанабыл – турнир тула түмсүүбүт түмүгэ. Төһө да Илья Анатольевич биһиги кэккэбитигэр суоҕун иһин, кини аата-суола Амма тустуутун түмэр. Быйылгы турнир тэрээһинин уопсай үбэ-харчыта – 90 тыһыынча. Бу үлэни сүрүннээбит Илья Анатольевич дьиэ кэргэнигэр, Н.С. Ивановка, К.И. Павловка, кыттыспыт дьоммутугар Амма улууһун тустууктарыгар, тустууну өйөөччүлэригэр, бииргэ үлэлээбит коллегаларыгар, Амма орто оскуолатын 1988 с. бииргэ үөрэнэн бүтэрбит доҕотторугар, Эмис нэһилиэгин баһылыгар П.П. Бубякиҥҥа, биирдиилээн көмөлөспүт төрөппүттэрбитигэр Ф.Ф. Григорьевка, Н.Е. Гаврильеваҕа уонна Илья Анатольевич дьиэ кэргэнигэр, бииргэ төрөөбүттэригэр, чугас дьонноругар, аймахтарыгар дириҥ махталбытын тиэрдэбит.

Турнир бастыҥнара – Кубогынан, мэтээллэринэн, харчынан бириэмийэлэри туттулар. 1985 с. Илья Анатольевич 12 саастааҕар 38 киилэҕэ Алма-Ата куоракка Бүтүн Союзтааҕы турнирга миэстэлэһэн турар. Оҕо сылдьан ситиспит биир чаҕылхай ситиһиитин бэлиэтээн туран, Эмис нэһилиэгин дьаһалтата (баһылык П.П. Бубякин) 38 кг чемпионнаабыт эдэр бөҕөскө, «Спартак» оскуола Тотурбийкала бөһүөлэгин филиалын иитиллээччитигэр Ахмед Алсултановка харчынан бириэмийэни олохтоото. Маны таһынан чаҕылхай тустууну көрдөрбүт эдэр бөҕөстөр Андрей Мидловец, Миша Нестеров, Дархан Каримов, Арби Эльдарбиев (Спартак), Джабраил Исаков (Нурадилово), Абдурахман Мухтаров (Интернат) Амма орто оскуолатын 1988 с. үөрэнэн бүтэрбиттэр харчынан бириэмийэлэрин туттулар.

Турнир түмүгүнэн бэйэбит оҕолорбут 2004-2005 с.т. уолаттарга Андрей Мидловец 48 киилэҕэ чемпионнаата, Миша Нестеров (110 кг) иккис миэстэ, 2006- 2007 с.т. Лука Данилов (35 кг), Дархан Каримов (44 кг), Арылхан Гаврильев (48 кг), 2008- 2009 с.т.  Айаал Григорьев (38 кг), Артем Винокуров (48 кг), 2011- 2012 с.т. Ваня Павлов (35 кг) үһүс миэстэ буоллулар.

Хасавюрка «Спартакка» спортивнай оскуолаҕа тренер Степан Михайлович Скрябины кытта олунньу 10 күнүттэн 11 оҕону аҕалан эрчийэ сылдьабыт. Айаммыт ороскуотун өйөөбүт Амма улууһун баһылыгын бастакы солбуйааччытыгар, тустуу федерациятын бэрэссэдээтэлигэр И.С. Климентовка, оскуолабыт дириэктэригэр Д.П. Неустроевка, улуустааҕы физическай культура уонна спорт управлениетын начальнигар В.В. Капитоновка дириҥ махталбытын тиэрдэбит.

Биир сыл иһигэр тустуу эйгэтигэр, оҕолору кытта үлэҕэ, дьарыкка элбэх уларыйыылар, саҥа хайысхалар киирбиттэрин көрдүбүт. Биллэн туран, бу тренер үлэтигэр улахан уопут. Коллегабыт, доҕорбут Илья Анатольевич Солдатов сөптөөх суолу-ииһи тэлэн, Хасавюрт куораты кытта доҕордуу сыһыаны олохтоон хаалларбыта үлэбит сүрүн хайысхата буолар.

Афанасий АДАМОВ, Н.С. Захаров-Сахаачча аатынан Амматааҕы оҕо спортивнай оскуолатын старшай тренерэ.

 

Добавить комментарий

Ваш адрес email не будет опубликован. Обязательные поля помечены *