Спартакиада: ханнык уокурук кыайыай?

Сылбыт түмүктэнэрэ чугаһаата. Ону кытта тэҥҥэ олох бары эйгэтигэр бүтэһик быһаарыылаах дьаһаллар, тэрээһиннэр, күрэхтэһиилэр элбэхтик ыытыллаллар. Холобур, Константин Семенович Бурцев начаалынньыктаах Дьокуускай куораттааҕы физическэй култуура уонна спорт управлениетыгар билигин сылы түмүктүүр түбүктээх кэм үүннэ. Сыллааҕы календарьнай былаан быһыытынан бүтэһик күрэхтэһиилэр тэрээһиннэрэ, үгэскэ кубулуйбут ааһан эрэр сыл бастыҥнарын чиэстээһин дьаһала…

Управление көҕүлээһининэн сыллата ыытыллар Дьокуускай куорат уокуруктарын уонна куорат таһынааҕы нэһилиэнньэлээх пууннарын комплекснай спартакиадалара түмүктэнэрэ бу кэллэ. Сыл устата – буулдьанан ытыыга, мас тардыһыыга, хапсаҕайга, остуол тенниһигэр, баскетболга, дуобакка, волейболга, мини-футболга, саахымакка, бильярдка күрэхтэһиилэр ыытылыннылар. Аны, бу өрөбүлгэ, ахсынньы 9 күнүгэр сарсыарда 10 чаастан Дьокуускай куорат 1 №-дээх спортивнай оскуолатыгар саалатыгар – спартакиада бүтэһик көрүҥэр – дьиэ кэргэн “Көрдөөх стартар” күрэхтэһиитэ ыытыллыаҕа.

Санатан эттэххэ, уокуруктар күрэхтэһиилэригэр – аҕыс уокурук күрэс былдьаһар. Билиҥҥитэ, спорт уон көрүҥүн түмүгүнэн А.С. Бурцев салайааччылаах Губинскай уокурук инники иһэр. Октябрьскай уонна Сайсаар уокуруктара тилэх баттаһа иһэллэр. Сэрэйдэххэ, бу үс уокуруктартан биирдэстэрэ спартакиада кыайыылааҕынан буолуоҕа. Ону дьиэ кэргэн “Көрдөөх стартар” күрэхтэһиитэ быһаарыаҕа. Дьэ, ханнык уокурук кыайар эбитий?

Маны тэҥэ бу бөлөххө – Киин, Промышленнай, Гагаринскай, Автодорожнай, Строительнай уокуруктар спартакиадаҕа кытталлар.

Оттон куорат таһынааҕы нэһилиэнньэлээх пууннар спартакиадаларыгар сэттэ хамаанда күрэхтэһэр. Билиҥҥитэ Хатас, Тулагы, Пригороднай хамаандалара тэҥҥэ иһэллэр. Ханнык хамаанда бастакы, иккис, үһүс бириистээх миэстэни ыларын эмиэ спартакиада бүтэһик көрүҥэ – “Көрдөөх стартар” быһаарыахтара. Онон биһигини тыҥааһыннаах күрэхтэһии күүтэр.

Дьиэ кэргэнинэн “Көрдөөх стартар” күрэхтэһиигэ уокуруктар уонна нэһилиэнньэлээх пууннар 10-нуу кыттааччылаах үстүү хамаанданы туруораллар. Кинилэр биэстии эстафетаҕа ким бастыҥын, түргэнин, сымсатын быһаарсыахтара. Кыайыылаах хамаандалар – кубоктарынан уонна спортивнай тэрили ылар сертификатынан наҕараадаланыахтара.

Петр ПАВЛОВ.

Хаартыскаҕа: 2017 сыллааҕы комплекснай спартакиада кыайыылааҕа – Октябрьскай уокурук хамаандатын наҕараадалааһын. Октябрьскайдар бу сырыыга дьэ хайаһаллар?

Ааптар хаартыскаҕа түһэриитэ.

Добавить комментарий

Ваш адрес email не будет опубликован. Обязательные поля помечены *