Спартакиада: дьиэ кэргэттэр “Көрдөөх стартара”


1-кы №-дээх спортивнай оскуолата саалатыгар Дьокуускай куорат уокуруктарын уонна чугастааҕы нэһилиэнньэлээх пууннарын комплекснай спартакиадатын бүтэһик көрүҥэр – дьиэ кэргэнинэн “Көрдөөх стартар” күрэхтэһии сүрдээх көхтөөхтүк ыытылынна.

Хас биирдии хамаанда 10-нуу киһилээх састаабы туруорда. Ол курдук, 30-гар диэри саастаах кэргэнниилэр, 11-гэр диэри саастаах оҕолоох ийэ уонна аҕа, 13-гэр диэри саастаах оҕолоох ийэ, аҕа уонна 50-тэн үөһээ саастаах кэргэнниилэр диэн бөлөхтөргө арахсан күрэхтэстилэр.

Хамаандалар балаһыанньа быһыытынан биэстии түһүмэхтээх эстафеталары аастылар. Онуоха биэс киһилээх дьиэ кэргэннэргэ куорат таһынааҕы нэһилиэнньэлээх пууннарга Табаҕаттан Степановтар бастаатылар, Пригороднайтан Афанасьевтар иккистээтилэр, Тулагыттан Атласовтар үһүстээтилэр. Оттон уокуруктарга бастакы үс бириистээх миэстэни Губинскайтан Курбановтар, Сайсаартан Егоровтар, Киинтэн Чемезовтар дьиэ кэргэннэрэ үлэһиннилэр. Үс киһилээх дьиэ кэргэннэргэ уокуруктарга Сайсаартан Гуляевтар, куорат таһынааҕы нэһилиэнньэлээх пууннарга Макаровтар кыайдылар. Икки киһиттэн састааптаах дьиэ кэргэттэргэ Николаевтар (Сайсаар), Поповтар (Тулагы) кыайыы үөрүүтүн биллилэр. Бастаабыттар уонна иккис-үһүс буолбуттар мэтээллэринэн, грамотанан наҕараадаланнылар.

Уопсай түмүккэ уокуруктарга – Сайсаар хамаандата бастаата, Губинскай иккистээтэ, Октябрьскай үһүстээтэ, оттон куорат кытыытынааҕы бөһүөлэктэргэ – Пригороднай инники таҕыста, Тулагы иккис буолла, Табаҕа үһүс миэстэлэннэ. Салгыы миэстэлэри Хатас уонна Марха ыллылар. Итиэннэ грамотанан, өйдөбүнньүк кубогынан наҕараадаланнылар. Кыайыылаахтар ахсынньы 14 күнүгэр ыытыллар Сыл бастыҥнарын чиэстиир-бочуоттуур үөрүүлээх тэрээһин кэмигэр спорка сыһыаннаах тэрил ылалларыгар харчынан сертификаттары тутуохтара.

Күрэхтэһии сүрдээх тыҥааһыннаахтык барда. Хамаандалар бэйэлэрин дьонноругар ыалдьан кыра оҕолуу өрүтэ ыстаныылара, кыайыыга күөттээн үөгүлээһиннэрэ, эҕэрдэлэһиилэрэ, ыһыы-хаһыы оргуйан, бэрт сэргэх күрэхтэһии буолла. Кыра оҕолорун көтөхпүтүнэн кэлэн кыттар эдэр дьиэ кэргэттэр бааллара киһини үөрдэр.

Дьокуускай куорат физическэй култуураҕа уонна спорка управлениетын начаалынньыга Константин Семенович Бурцев:

Дьиэ кэргэттэр “Көрдөөх стартарга” күрэхтэһиитэ сыллата ыытыллар спартакиада түмүктүүр түһүмэҕэ буоларын быһыытынан, сүрдээх тыҥааһыннаахтык, этэргэ дылы, биир сөкүүндэни, биир сантиметры аахсыылаах, быһаарсыылаах буолла. Ону таһымнаах судьуйалар тутатына быһааран, барытын сиэрдээхтик, туох да хом санаата суох эйэ-дэмнээхтик быһааран иһэллэр. Олох Олимпиада курдук! Тоҕо диэтэргит, кыайыылаах хамаандалар добуччу харчынан наҕараадаланаллар. Онон күрэхтэһии хара бастакыттан көхтөөхтүк, наһаа тыҥааһыннаахтык, илин-кэлин түсүһүүлээхтик ыытылынна.

Кырдьык, дьиэ кэргэн спартакиадатыгар араас саастаах дьон кытыннылар. Кинилэр кэккэлэригэр Тулагы бөһүөлэгин баһылыга Егор Гаврильевич Попов бэйэтинэн кэлэн, хамаандатыгар көх-нэм, өйөбүл буола сылдьара кэрэхсэбиллээх. Эбэтэр, В.П. Керемясов аатынан Дьокуускай куорат 3 №-дээх спортивнай оскуолатын дириэктэрэ Федот Архипович Соловьев уокуругун хамаандатыттан бэйэтинэн кыттан, тиритэ-хорута күрэхтэспитэ үтүө холобур буолар.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *