Сорук ыарахан даҕаны, ситиһиллиэн сөп

Дьэ, тустууктарга, Олимпиадаҕа кыттарга быраабы ылыы иһин бүтэһик быһаарыылаах түһүлгэ саҕаланна. Бөөлүүн, программа быһыытынан, бары ыйааһыннарга сэрэбиэй ыытылынна.

57 кг барыта 23 бөҕөс сэрэбиэйи ааста. Аны кинилэр ыйааһыннаныыны уонна медицинскэй бэрэбиэркэни барыахтаахтар. Онно баҕар туох эмэ уларыйыылар тахсыахтарын эмиэ сөп.

Манна японец Юки Такашины уонна монгол Бехбаяр Эрдэнэбаты, бастыҥнар быһыытынан атын-атын бөлөхтөргө араарбыттар. Биһигиттэн Владимир Егоров уонна Владислав Андреев иккиэн үөһээҥҥи бөлөххө түбэспиттэр.

Владимир Егоров Испанияттан тустар грузин Леван Метревелины кытта тустар. Онно хайалара кыайбыта сэрэйдэххэ Юки Такахашига тахсара буолуо. Оттон Владислав Андреев кубинец Андреу Ортеганы кытта киирсиэ5э. Кубинец – 23-гэр диэри саастаахтарга аан дойду чемпиона. Манна, иллэрээ сыл Аан дойду кубогар кэлэн туста сылдьыбыта. Онно Арыйаан Тютрин кинини кыраһыабайдык кыайан турар.

Иккис бөлөххө Георгий Эдишерашвили (Азербайджан), Тарас Маркович (Украина), Эрдэнэбат Бехбаяр (Монголия) курдук урукку өртүгэр биллэр, опыттаах бөҕөстөр бааллар.

65 кг – 28-лар. Манна эмиэ икки уоллаахпыт иккиэн биир бөлөххө түбэспиттэр. Ньургун Скрябины уонна турок Селахаттин Килисчалаяны, рейтиннэрэ үрдүгүн быһыытынан, атын бөлөхтөргө араарбыттар.

Румынияттан кыттар Николай Охлопков бастаан Доминиканскай республикаттан  Рудесиндо диэн бөҕөһү кытта тустар. Кыайыылаах салгыы Ломтадзе (Грузия) – Вильямс (Канада) хапсыһыытын кыайыылааҕар тахсыаҕа. Манна даҕатан эттэххэ, дьиҥэ бу ыйааһыҥҥа Грузияттан олимпийскай чемпион Владимир Хинчегашвили кэлиэхтээҕэ, ковид дьаҥар хаптаран, хамаандаҕа кинини 61 кг аан дойду чемпиона Бека Ломтадзе солбуйда.

Ньургун Скрябин бастакы эргииргэ сынньанар. Онтон финал 8/1-гэр Магомедрасул Гаджиевтыын (Польша) тустуон сөп.

Уолаттарбыт бөлөхтөрүгэр өссө Гор Оганесян (Украина), Джордан Оливер (АХШ), Ильяс Бекбулатов (Узбекистан) курдук биллэр-көстөр тустууктар бааллар.

125 кг кыттааччылар 20-лэр. Манна поляк Бараны уонна молдован Романовы күүстээхтэр диэн, бөлөхтөргө араарбыттар. Биһиги Айаал Лазаревпыт бастакы эргииргэ индус Сумиты кытта тустар. Онно ким кыайбыта салгыы күрэхтэһиигэ Александр Романовы кытта тустуоҕа. Өссө бу бөлөххө азербайджанец Галаев, венесуэлец Диас, румын Рарес, финн Хейно диэн тустууктар бааллар.

Онон, сэрэбиэйи хаһан баҕарар мыыммаппыт. Уолаттарбытыгар күүстээх утарсааччылар түбэспиттэр. Ол эрээри, киирсиэхтээхтэр. Ким бүгүҥҥү күҥҥэ үчүгэй бэлэмнээх, ким кыайыыга ордук дьулуурдаах кыайыаҕа. Манна урукку аат-суол, ситиһии тугу да быһаарбат. Санатан эттэххэ, олимпийскай путёвканы – ыйааһын ахсын икки бастакы миэстэлээхтэр, финалистар эрэ ылыахтара. Сорук ыарахан даҕаны, ситиһиллиэн сөп. Уолаттарбытыгар ыалдьабыт!

Тустуу бүгүн биһиги бириэмэбитинэн киэһэ 16:00 чаастан саҕаланар.

Петр ПАВЛОВ.                      

Добавить комментарий

Ваш адрес email не будет опубликован. Обязательные поля помечены *