Ситиһиилээхтэргэ – сертификаттар!

“Триумф” Спорка бэлэмнэнии киинигэр, аҕыйах хонуктааҕыта Иркутскайга ыытыллыбыт көҥүл тустууга эдэрдэргэ Россия күрэхтэһиитин түмүгүнэн пресс-конференция тэрилиннэ. Санатан эттэххэ, бу күрэхтэһиигэ Р.М. Дмитриев аатынан Олимпийскай эрэл училищетын иитиллээччилэрэ Станислав Свинобоев 70 киилэҕэ кыһыл көмүс, Дархан Игнатьев 57 кг ыйааһыҥҥа боруонса мэтээллэри ылары ситиспиттэрэ.

Тэрээһини СР физическэй культураҕа уонна спорка миниистирин бастакы солбуйааччы Леонид Спиридонов салайан ыытта. Кини, бу саастаах эдэр тустууктарбыт ситиһиилэрэ уон икки сыл буолан баран кэлбитин санатта. Аны Станислав Свинобоев сайын Уфа (Башкортостан) куоракка буолар эдэрдэргэ аан дойду күрэхтэһиитигэр, оттон Дархан Игнатьев – ыам ыйыгар Красноярскайга ыытыллар Иван Ярыгин аатынан норуоттар икки ардыларынааҕы турнирга ситиһиилээхтик кытталларыгар баҕарда. Итиэннэ тустууктарга уонна кинилэр тренердэригэр Махтал суруктары туттарда.

СР спортивнай тустууга федерациятын бастакы вице-президенэ Виктор Лебедев – Станислав Свинобоевы уонна Дархан Игнатьевы, кинилэр тренердэрин эҕэрдэлээн туран, ситиһиллибиттэн уоскуйан хаалбакка, салгыы өссө кыайыылаахтык кытталларыгар баҕарда. Итиэннэ СР спортивнай тустууга федерациятын аатыттан харчынан бириэмийэлиир сертификаттары туттартаата.

Р.М. Дмитриев аатынан Олимпийскай эрэллэри бэлэмниир училище дириэктэрин бастакы солбуйааччы Александ Контоев:

Станиславтаах Дархан биһиги училищебытыгар бэһис сылларын үөрэнэллэр, дьарыктаналлар. Онон уолаттар ситиһиилэрин училище тэҥҥэ үллэстэр. Бу ситиһиинэн сибээстээн кинилэр тренердэрэ Василий Петрович Уваровы, Станислав Афанасьевич Захаровы уонна республика эдэрдэргэ хамаандатын сүрүн тренерэ Василий Неустроевы эмиэ эҕэрдэлиибит! Василий саҥа дуоһунаска ананаат, бастакы улахан сүрэхтэниитэ ситиһиилээх буолла. Ити курдук, ситиһиилэр салгыы кэлэ турдуннар, — диэн бэйэтин санаатын үллэстэн туран, эмиэ харчынан сертификаттары туттарда.

Салгыы, Аллараа Бэстээхтээҕи элбэх кыамталаах спортивнай комплекс дириэктэрэ Алексей Варламов, олимпийскай чемпион Павел Пинигин, СР эдэрдэргэ хамаандатын сүрүн тренерэ Василий Неустроев, Саха АССР үтүөлээх тренерэ Василий Уваров, СР эдэрдэргэ хамаандатын тренерэ Станислав Захаров, Россия эдэрдэргэ чемпиона Станислав Свинобоев, боруонса призера Дархан Игнатьев санааларын үллэһиннилэр.

Ол курдук, пресс-конференцияҕа биллибитинэн, бүгүн Станислав Свинобоевы уонна кини тренердэрэ Василий Уваровы, Николай Сивцевы чиэстээһин Мэҥэ Хаҥаласка тэриллэр эбит.

Биһиги хамаандабыт бу эппиэттээх күрэхтэһиигэ бэлэмнэнэн Дагестаҥҥа, Хотугу Осетияҕа уонна манна, “Триумф” Спорка бэлэмниир кииҥҥэ анал эрчиллиилэргэ кыттыбыта. Күрэхтэһии иннинэ тустаах тренердэр – икки кыһыл көмүс мэтээли ылар былаан-билгэлээһини ылыммыттар. Ол курдук, 57 киилэҕэ Дархан Игнатьевка, эбэтэр Харысхал Григорьевка, 70 кг ыйааһыҥҥа Станислав Свинобоевка эрэммиттэр.

Россия сүүмэрдэммит хамаандатын сүрүн тренерэ Абдусамад Гадисов эппитинэн, ыйааһыннарыгар чемпиоҥҥа хотторон иккис уонна үһүс буолбут бөҕөстөрү Ярыгин турнирыгар кытыннаран, эбии бэрэбиэркэлээн көрөн баран, Европа күрэхтэһиитигэр кытыннарыахпыт, диэбитэ. Онон Дархан Европаҕа кыттар кыахтаах диэххэ сөп. Оттон Станислав – аан дойду түһүлгэтин иннинэ Румынияҕа, эбэтэр Красноярскайга турнирга кыттарга былааннанар.

Үөрүүлээҕэ диэн, бу тэрээһиҥҥэ “Династия” швецарскай чаһы салона уонна “Теплый край” тэрилтэ (дириэктэр Ньургустан Иванов) – спонсор быһыытынан кыттан, уолаттарга бэйэлэрин бэлэхтэрин туттардылар.

Пресс-конференцияҕа ити уонна да атын сонуннары иһитиннэрдилэр. Ону, салгыы билиһиннэрии суруйуулары биһиги сайтпытыгар (dzulurgan.ru) ааҕаарыҥ.

Петр ПАВЛОВ.

Ааптар хаартыскаҕа түһэриилэрэ.   

Добавить комментарий

Ваш адрес email не будет опубликован. Обязательные поля помечены *