Семен Исаков бирииһигэр дуобакка турнир ыытылынна

Бэҕэһээ Бэрдьигэстээххэ, өбүгэлэртэн кэлбит Саха сирин төрут олохтоох норуоттарын икки ардыларыгар ыытыллыбыт 21-с Манчаары аатынан национальнай оонньууларга туһуланан, өй-санаа өттүнэн сайдыыга анаан Горнай улууһун олохтооҕо Семен Спиридонович Исаков 85 сааһын туолбут үбүлүөйдээх республиканскай күрэхтэһиитэ үрдүк таһымнаахтык буолан ааста.

Онуоха эр дьоннор ортолоругар Колесов — Гуляев очколара тэҥнэһэн, Чурапчыттан Гаврил Колесов  коэффициента ааҕыытыгар ордук буолан бастаата. Таатта дуобатчыта Николай Гуляев иккис, үһүс миэстэҕэ Күөх ньуурдаах Ньурбаттан Иван Токусаров тиксэн, билигин да оонньуур тэтимин түһэрбэккэ сылдьар диэн үчүгэй сыанабылы ылла. Төрдүс-бэһис миэстэҕэ Амматтан Андрей Федотов, Дьокуускайтан Николай Стручков, алтыска урут эдэрдэргэ аан дойду чемпионун чыпчаалыгар тахса сылдьыбыт Станислав Контоев тигистилэр.

Кыргыттар ортолоругар олус тыҥааһыннаах оонньуулар буоллулар. Алтыс туур түмүктэниитэ лидерскэй састаапка биэс кэрэ куобут инники тахсыбыта. Биэтэккэ утарылаһааччыларын кыайан Намтан Сайыына Попова инники таҕыста. Иккис миэстэҕэ Горнайтан Тунаара Федорова тиксэн, олохтоохтору үөртэ. Дьокуускайтан Сандаара Апросимова үһүс буолла.

Бу күрэхтэһии таһыма Россия чемпионаттарын кытта оонньуур, киирсэр таһым үрдүгүнэн ордук буолла. Биэс международнай гроссмейстердар, аҕыс арааһынай таһымнаах маастардар уонна сэттэ маастар нуорматыгар чугаһаан баран сылдьар маастарга кандидаттарбыт кыттыыны ыллылар.

Санатан эттэххэ, Семен Спиридонович Исаков Петр Афанасьевич Самойловтыын, Сахабыт сиригэр үһүс инники маастардарынан буолаллар. Семен Спиридонович – ССРС дуобакка спордун маастара, педагогическай үлэ уонна спорт ветерана, РСФСР норуотун үөрэҕириитин туйгуна, Горнай улууһун бочуоттаах гражданина.

Оттон баҕа санаа курдук эттэххэ, саха норуота өбүгэ саҕаттан толору чэгиэн-чэбдик сылдьарга, өйдөрүн-санааларын сайдыытыгар болҕомто уураллара. Дуобат оонньуута спорт көрүҥүн быһыытынан уонна биһиэхэ, сахаларга толкуйдуурбутугар чугаһынан, атын улахан улуу омуктар билинэллэринэн, дуобаты аныгыскы буолуохтаах «Манчаары оонньууларыгар» киллэрэллэрин туһугар диэн сүҥкэн улахан көрдөһүүлээхпит!

Гаврил ВИНОКУРОВ, дуобат оонньуутугар международнай арбитр, Бүтүн Россиятааҕы категориялаах судьуйа.

Добавить комментарий

Ваш адрес email не будет опубликован. Обязательные поля помечены *