Семен Владимиров дуу, Арыйаан Тютрин дуу?

Билэргит курдук сарсын, В.П. Керемясов аатынан Дьокуускай куорат көҥүл тустууга аһаҕас чемпионата ыытыллар. Бүгүн киэһэ ыйааһыннарынан сэрэбиэй оҥоһулунна. Уон ыйааһыҥҥа барыта 127 бөҕөс кыттыаҕа. Аны сарсын сарсыарда бөҕөстөр бастакы сүрүн түһүмэхтэрин – ыйааһыннаныыны барыахтара.

Кылгастык, биирдии ыйааһынынан сэрэбиэйи ырыттахха, 57 киилэҕэ 30 кыттааччы сэрэбиэйи ааспыт. Кыттааччылары көрдөххө, манна быйыл саас Чурапчыга ыытыллыбыт Н.Н. Тарскай аатынан республика чемпионатын кыайыылааҕа Федор Постников чорбойор. Уопсайынан ылан көрдөххө, бу ыйааһыҥҥа састаап тэҥ сыһа, ол аата, кыттааччылар таһымнара биир. Ол да буоллар, мин санаабар бириистээх миэстэ иһин сүрүннээн Максим Заморшиков, Уйгулан Иванов, Игорь Петров, Харысхал Григорьев тустуохтарын сөп.

61 кг ыйааһыҥҥа 23 кыттааччы баар. Манна таһымнаах соҕус хапсыһыылары көрөрбүт буолуо. Тус санаабар, үөһэ бөлөххө Юрий Сыромятников уонна Виталий Эспек финалга тахсар иһин киирсэллэрэ буолуо. Ол оннугар аллараа бөлөххө Семен Владимиров, Степан Соркомов, Арыйаан Тютрин икки ардыларыгар тыҥааһыннаах тустуулар күүтүллэллэр. Киһи дэбигис бу бөҕөс кыайыа диэн эрдэттэн эппэт. Барытын көбүөр көрдөрүө.

65 киилэҕэ 26-лар. Манна эмиэ таһымнаах тустууну көрөрбүт буолуо. Тоҕо диэтэргит, састаап күүстээх. Үөһээ бөлөххө норуоттар икки ардыларынааҕы кылаастаах спорт маастара Ньургун Александрову уонна Петр Павловы чорботуохха сөп. Манна өссө Христофор Потапов кутталлаах.

Оттон аллараа бөлөххө финалга тахсар иһин күөн көрсүү Эдуард Григорьев уонна Дмитрий Аксенов икки ардыларыгар буолара буолуо дии саныыбын. Айтал Захаров да күүтэн турбат буолуохтаах.

70 кг ыйааһыҥҥа 19 бөҕөс күөн көрсүө. Кинилэртэн уопуттаахтарын быһыытынан, Дьулустан Булатовы уонна Реворий Самсоновы чорботуохха сөп.

74 киилэҕэ сэттэ кыттааччы баар. Онон кинилэр икки бөлөххө хайдыһан, эргиир ньыматынан күрэхтэһиэхтэрэ. Манна Константин Власов, Иван Ефремов, Стив Попов, Иван Барашков курдук күүстээхтэр бааллар.

79 киилэҕэ эмиэ – сэттиэлэр. Манна сэрэбиэй обургу бастакы киирсиигэ, мин көрдөхпүнэ, бу ыйааһын саамай күүстээхтэрин, Герман Устиновы уонна Айсен Копырины көрүһүннэрбит. Дьэ, хайалара буолар?

Ити курдук, 86 кг – түөрт, 92 кг – биэс, 125 кг – үс кыттааччылаах, онон күөн көрсүү эргиир систиэмэтинэн ыытыллыа. Оттон 97 киилэҕэ кыттааччылар иккиэлэр: Сергей Семенов (Нам) уонна Виктор Борисов (ОЭУ).

Чэ, кылгастык, сэрэбиэйи ырыттахха итинник. Семен Владимиров дуу, Арыйаан Тютрин дуу? Ньургун Александров дуу, Дмитрий Аксенов дуу? Айсен Копырин дуу, Герман Устинов дуу? Дьэ, хатыһыылаах хапсыһыылары көрүөхпүт. Тустууну сэҥээрээччилэр бу күрэхтэһиини көтүтүмэҥ, бэйэҕит кэлэн илэ хараххытынан көрүҥ, сытыы хапсыһыылартан дуоһуйууну ылыҥ.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *