Саҥа састаабынан, саҥалыы…

Кэтэспит, күүппүт Россиябыт көҥүл тустууга түһүлгэтэ түмүктэннэ. Сахабыт сирин талыллыбыт хамаандата эдэр, эмэн саҥа састаабынан кытынна. Бастакы омуҥҥа дьэ хомойуу, оннооҕор кэлэйии холус  тыллара этилиннилэр, сурулуннулар. Онтон уоскуйан, ырыҥалаан көрдөххө, атын санаа сыыйа киирэр. 

Манна эдэр саастаахтар түһүлгэлэриттэн саҥа тахсыбыт, улахан дьоҥҥо холонууну саҥа барбыт эдэр уолаттарбыт кытыннылар. Улахан тустууну ааспыт, уопуттаах бөҕөстөр илиилэрин-атахтарын биллилэр, уот абытай эбитин биллилэр.  Бу улахан, туһалаах оскуола. Ону этэҥҥэ, кимиилээхтик, толлон-тостон турбакка сыралаһан, баар кыахтаахтарынан түһэн кииристилэр диэҕин. Кылаабынай тренербит да, саҥа анаммыт көмө тренербит да этиилэрэ, бэлиэтээһиннэрэ, сөптөөх, биир санааҕа киирбиттэрэ киһини астыннарар.

Уолаттарбыт туохха сыыспыттарын, туохтара тиийбэтин, бэлиэтээтибит ону туоратарга үлэлиэхпит диэтилэр. Билигин хамаанда тумус туттар тустууктара: Виктор Рассадин,  Дмитрий Аксенов, Герман Устинов салгыы тустан, эдэрдэри эккирэтиннэрэн иһиэхтэрэ диэн эрэниэҕиҥ, тустар ньымаларын, короннай албастарын тэҥҥэ үллэстэ сырыттыннар дуу.

Баҕарабын саҥа састаапка – ситиһиини, дьолуону, тулууру тустууга бэриниилээх буолууну! Ыйааһыннарынан саҥа эдэр тренердэр ананнылар, кинилэргэ тахсыылаах, айымньылаах, үчүгэй түмүктэрдээх үлэни баҕара, алгыы хаалабын. Барыта этэҥҥэ буолуо, хайаан да!

Юрий ЩУКИН-Манай. 

Дьокуускай.

Добавить комментарий

Ваш адрес email не будет опубликован. Обязательные поля помечены *