Саха Өрөспүүбүлүкэтин Ат спордун федерациятыгар туһаайыы!

Бүгүн «Саха» НКИХ киэһээҥҥи сонуннарыгар Дьокуускай куоракка баар ипподром дьылҕатын туһунан кэпсииллэр диэн, анонс Саха сирин бүттүүнүн үрдүнэн тарҕаммыта. Сонуннары көрдүбүт да, ипподром эрэ туһунан кэпсээбэтилэр. Онон бэйэм тус санааларбын этэрбин көҥүллээҥ.

Бары билэрбит курдук, СӨ Ат спордун федерацията 1998 с. ыам ыйыгар, оччотооҕу Саха сиринээҕи тыа хаһаайыстыбатын академиятын көҕүлээһининэн тэриллибитэ. Федерацияны тэрийии киэҥ ыҥырыылаах мунньаҕар Дьокуускайдааҕы киин ипподром сирэ аны академияҕа бэрилиннэ диэн буолбута. Оччолорго ол үөрүү-дьол курдук этэ. Эбиитин 1999 с. сэтинньитигэр академия сылаас көнньүүһүнэни буруус маһынан тутан үлэҕэ киллэрбитэ. Сүүрүк аттаах хаһаайыстыбалар бука бары үөрүүлэрэ үрдээбитэ. Онтон ыла ат сүүрдүүтэ саҥа таһымҥа тахсыбыта. Бу барыта федерация уонна академия биир ситимнээх үлэлэрин түмүгэ!

Быйыл аата уларыйан, университет буолбут академиябытыгар уларыйыылар тахсан, ректор эбээһинэһин толорооччу улахан «өҥөтүнэн» сылаас көнньүүһүнэ сууллар туруктаах аатырда. Онон сылтаан сүүрүк сылгылаах хаһаайыстыбалары, ат спордунан дьарыктанааччылары көнньүүһүнэттэн кыйдааһын саҕаламмыта. Иллэрээ күн ууларын, уоттарын араарбыттар.

Бу иннинэ син хаста да Ат спордун федерацията уонна Тыа хаһаайыстыбатын Арктикатааҕы университета сирэй көрсөн мунньахтыы сатаабыттарын Ютуб, Инстаграм нөҥүө көрбүтүм. Ол мунньахтарга ректор эбээһинэһин толоро сылдьар Кривошапкин, мэлдьи Арассыыйа Тыатын хаһаайыстыбатын министиэристибэтинэн саптынар, ат сүүрдүүтэ ол дьон көҥүллээтэхтэринэ биирдэ ыытыллар диир. Бу сыллар тухары Дьокуускай куоракка, өрөспүүбүлүкэбит киинигэр ат сүүрдүүтэ ыытыллан кэлбитин улахаҥҥа уурбата олус хомолтолоох. Федерация уонна университет уопсай тылы булаллара уустугурбут курдук ылынным, мунньахтары көрөн, норуот санаатын истэн баран.

Маны этэн, суруйан тураммын билиҥҥи Саха Өрөспүүбүлүкэтин федерациятыгар туһаайабын.

Дьокуускай куоракка Саха сирин олохтоохторо сөбүлээн көрөр ат сүүрдүүлэрэ, конкурдара салгыы быстыбакка салҕана турарын туһугар, ипподрому университеттан арааран ыларга. Ол инниттэн бастаан 1998 с. СӨ Ат сүүрдүүтэ тэриллибит докумуоннарын СӨ борокуруоругар, СӨ Конституционнай суутугар сайабылыанньа суруйан сөхсүтэн, ипподрому хат өрөспүүбүлүкэ бас билиитигэр төннөрөрүгэр. Аны бары билэбит, билиҥҥи университет успуордун саалата, урукку ипподром көрөөччүлэрин трибунатын оннугар тутуллан турарын. Борокоротуура 1998 с. ипподром сирэ хайдах бэриллибитин быһаарыа, сирин мээрэйдээтэҕинэ университет успуордун саалата ипподромҥа кэлиэн сөп.

Иннокентий АММОСОВ, Арассыыйа суруналыыстарын Сойууһун чилиэнэ, СӨ Ат спордун 2016 с. бастыҥ сырдатааччыта.

2021 с, ыам ыйын 24 күнэ.

Добавить комментарий

Ваш адрес email не будет опубликован. Обязательные поля помечены *