Саха тустуутун өрөгөйүн күнүн олохтуурга!

Спорт бэтэрээнэ Роман Егоров саха спордугар бэлиэ суолу-ииһи хаалларбыт дьон ааттарын үйэтитиигэ анаан суруйууларын биһириибин. Сөптөөх уонна сиэрдээх дии саныыбын. Маны тустаах салайааччылар болҕомтоҕо ылан, олоххо киллэрэллэрэ буоллар…

Кырдьык, 2021 сыл – Саха сирин спорка олоҕор ураты сыл. Олортон биирдэстэрэ, Монреаллааҕы Олимпийскай оонньууларга саха тустуутун өрөгөйүн 45 сыла. Манан сибээстээн, ааптар – 70 сааһын туолбут Александр Николаевич Ивановка уонна Монреаллааҕы Олимпиада чемпиона Павел Павлович Пинигиҥҥэ – “Саха Республикатын бочуоттаах гражданиннара” диэн үрдүк ааттары иҥэриэххэ диирин кытта сөбүлэһэбин. Бу кэрэ бэлиэ түгэн – ССРС, РСФСР, Саха АССР үтүөлээх тренерэ Дмитрий Петрович Коркин улууканнаах кыайыыта! Манна сыһыары тутан эттэххэ, улуу тренербит олоҕун аргыһа Александра Семеновна Коркинаны ханнык да түгэҥҥэ умнарбыт табыллыбат. Ытыктабыллаах кырдьаҕаһы куруук көрө-истэ, көмөлөһө сылдьыахха.

Кимтэн да, ханнык даҕаны киһититтэн тутулуга суох, төрөөбүт республикаларыгар, дойдуларыгар сүҥкэннээхэй үтүөнү оҥорбут дьоммутун умнуо суохтаахпыт. Кинилэри кэриэстиир, чиэстиир, бэлиэтиир, ааттарын үйэтитэр ытык иэстээхпит. Онон ити Роман Романович Егоров этиитин мин өйүүбүн. 1976 сыллааҕы, Монреаллааҕы Олимпиадаҕа бөҕөстөрбүт кыайыыларын сыл аайы от ыйын 31 күнүгэр чиэстиир, бэлиэтиир өйдөбүнньүк күн оҥорор сөптөөх дии саныыбын.

Дьэ, ол хайдах буолуохтааҕын сүбэлэһиэххэ сөп. Өйдөбүнньүк миитин дуу, ахтыы киэһэтэ дуу, биитэр атын ханнык эмэ тэрээһин. Хаһыаттарга ахтыылар, санаалар, оттон радиоҕа, телевизорга онно сыһыаннаах биэриилэр баар буолуохтарын сөп.

Биирдэ ылан көрдөххө, олимпиецтарбыт туһунан элбэхтик суруллар-кэпсэнэр, кинилэр тустарынан кинигэлэр тахсаллар даҕаны, эдэр ыччаттарбыт Роман Дмитриеви үчүгэй аҕайдык билбэттэриттэн киһи хомойор. Итини мин үөһэттэн мээнэ ойутан ылан эппэппин. Олимпиецтар Александр Иванов, Леонид Спиридонов уо.д.а. ити туһунан хаста да этэн тураллар. Ол курдук, хас оскуола, хас спортивнай саала ахсын саха омугу аан бастаан аан дойдуга дорҕоонноохтук биллэрбит биһиги аатырбыт тустууктарбыт уонна улуу тренербит Дмитрий Петрович Коркин хаартыскалара, мэтириэттэрэ баар буолалларын ситиһиэхтээхпит. Оҕолорго, ыччаттарга кинилэр тустарынан өссө күүскэ сырдатыахтаахпыт, көрдөрүөхтээхпит.

Аны билигин саха киинэтин таһыма үрдээн иһэр. Манан сибээстээн, бастакы олимпийскай чемпиоммут Роман Михайлович Дмитриев аатынан уус-уран киинэ оҥоһуллан тахсара буоллар дии саныыбын. Маны биир эмэ режиссер ылсан үлэлиэ этэ. Уопсайынан, маннык кэскиллээх, инникилээх этиилэри Саха Республикатын салалтата, Спорка уонна Үөрэххэ министиэристибэлэрэ, Тустууга федерацията өйүөхтэрин, көҕүлүөхтэрин баҕарабын.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *