Саха сирин хайыһардьыттарын ситиһиилэрэ

Сэтинньи 30 күнүгэр Сыктывкарга буолбут хайыһарга Бүтүн Россиятааҕы күрэхтэһии классическай сприҥҥэ сүүрүүтэ Саха сирин эдэр хайыһардьыттарын кыайыыларынан түмүктэннэ.

Квалификация кэнниттэн тута биһиги биир дойдулаахтарбыт, Ленскэйтэн сылдьар Владимир Рыбкин уонна Андрей Коконкин сприҥҥэ туһааннааҕынан иккис уонна төрдүс бириэмэни көрдөрүлэр. Салгыы финал чиэппэригэр уонна финалга тахсар иһин түһүмэхтэргэ эрэллээхтик кытыннылар. Оттон финалга тиийэн Владимир Рыбкин бастаата, Андрей Коконкин үһүстээтэ.

Манна даҕатан эттэххэ, Владимир Рыбкин бу ситиһиитинэн Россия сүүмэрдэммит хамаандатын састаабыгар киирдэ. Кини эһиил олунньу ыйга Сараево куоракка (Босния уонна Герцеговина) ыытыллар эдэрдэргэ спорт кыһыҥҥы көрүҥнэригэр Европатааҕы бэстибээлгэ кыттыаҕа.

Егор ЧЕРОВ.

Добавить комментарий

Ваш адрес email не будет опубликован. Обязательные поля помечены *