Саха дьоно «Дьулурҕаны» күндүтүк саныыр

//»Дьулурҕан» 20 сыла

«Саха сирэ» хаhыат «Дьулурҕан» спортивнай сыһыарыытыгар 2007 сыллаахха редактор Петр Семенович Павлов ыҥырыытынан үлэлии сылдьыбытым. Бүөтүрдүүн үгүс күрэхтэһиилэри, ол иһигэр Сунтаарга ыытыллыбыт Саха сирин спортивнай оонньууларын, Красноярскайга буолбут мас тардыһыытыгар Россия чемпионатын, Дьокуускайга тэриллибит боксаҕа Россия чемпионатын… сырдаппыппыт.

«Дьулурҕаҥҥа» үлэлээбит кэммэр Саха сирин спордугар, чуолаан, көҥүл тустуу сайдыытыгар ис сүрэхтэриттэн ыалдьар тыһыынчанан киһи баарын билбитим. Саха дьоно хас биирдии күрэхтэһиини көтүппэккэ, спортсменнар кыттыыларын кыраҕытык кэтиир, ким тугу ситиспитин билэ-көрө сылдьар.

Миигин Бүөккэ Баабылапка күннэтэ, тиһигин быспакка, өрөспүүбүлүкэ араас муннуктарыттан уонунан спорду сэҥээрээччилэр субуруһан кэлэ тураллара сөхтөрөрө. Бэчээт дьиэтин иккис этээһигэр баар хоспут өрүү ыалдьыттаах буолара. Бүөккэ хас биирдиилэрин кытта хайаан да быыс булан кэпсэтэрэ, суруйууларын ханнык нүөмэргэ батарарын, санааларын истэрэ. Ол быыһыгар итийэн-кутуйан туран күрэхтэһиилэр түмүктэрин ырытыылар буолаллара. Ааҕааччылар, “Саха сирэ” хаһыаты сурутааччылар элбэх суругу аҕалаллара, онтон үксэ сыһыарыыга баппата буолара. Бүөккэ дьэ, ону дьонун хайдах эрэ алы гынар, суруйууларын саатар кэлиҥҥи нүөмэрдэргэ таһаарар кыһалҕалааҕа. Ол бэйэтэ туспа уустук үлэ эбит этэ.

Спорду сэҥээрэр саха дьоно «Дьулурҕан» сыһыарыыны оннук үрдүктүк туталлар, күндүтүк саныыллар. Бүгүн “Дьулурҕан” сыһыарыы республикатааҕы «Забота-Арчы» хаһыат иһинэн тахсар буолбута улахан үөрүүлээх.

Саха боотурдара кыайыы-хотуу көтөллөннүннэр, “Дьулурҕаҥҥа» сахабыт тылынан бэчээттэнэр бэртээхэй суруйуулар өрөспүүбүлүкэ олохтоохторун үөрдэ-көтүтэ турдуннар, саха дьонун үрдүккэ-сырдыкка сирдээтиннэр!

Сергей МУКСУНОВ, Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспатын үлэһитэ.

 

Добавить комментарий

Ваш адрес email не будет опубликован. Обязательные поля помечены *