Саха дуобаччыттарыгар Уруй!Айхал!

Нуучча дуобатыгар Россия, аан дойду чемпионаттара буолан ааспыттарын, кинилэр түмүктэрин “Дьулурҕан”, “Спорт Якутии” хаһыаттар сайтарыгар спортивнай суруналыыстар Петр Павлов уонна Александр Посельскай олус суһаллык, хойутаппакка, өссө, элбэх сонун хаартыскалардаах таһааран толору сырдаттылар. Онон дуобаты сэҥээрээччилэр, дуобакка ыалдьааччылар күрэхтэһиилэр хаамыыларын күн аайы көрө-билэ олордубут, үөрдүбүт, дуобаччыттарбыт ситиһиилэриттэн астынныбыт. Махтал буоллун суруналыыстарга!   

Икки сыллааҕыта Россия Нижневартовскай куоратыгар ыытыллыбыт чемпионакка классикаҕа финалга Андрей Федотов тренерин, аан дойду 7 төгүллээх чемпиона, супер-гроссмейстер Гаврил Колесовы баһыйан аан дойдуга чемпионнаан бастакы кыһыл көмүс мэтээлин ылбыта. Элбэх билэр дьонум бу кыайыыны быстах, дэҥҥэ тахсыбыт түбэлтэ курдук сыаналаабыттара.

Андрей уол, бу чемпионат быһаарыылаах иккис этабыгар кыайыыга дьулуурун, дьиҥнээх чемпион характердааҕын көрдөрөн, аан дойду элбэх төгүллээх чемпионнарын – супер-гроссмейстердары Сергей Белошеевы, Александр Георгиевы, бу иннинэ турнир бастакы этабын бэһис тууругар сирэй көрсөн хотторбут доҕорун, аан дойду гроссмейстера Николай Гуляевы итэҕэтиилээхтик хотуталаан, үрдүк кылаастаах гроссмейстердар кэккэлэригэр киирбитин арылхайдык дакаастаата, улахан бааттааҕын көрдөрдө.

Өйдүүбүн ээ, кыракый Андрей уолчаан 20-чэ сыллааҕыта өрөспүүбүлүкэ кыра уолаттарын турнирыгар бастакы ситиһиитин, атаһым Александр Васильев-Көрдүгэн, кыраҕы хараҕа бэлиэтии көрөн, киниттэн интервью ылан “Кэскил” хаһыакка таһаарбытын. Ол интервьютугар уолчаан: ”Улааттахпына гроссмейстер буолуом!” — диэн ыра санаатын эппитин толорбута, өссө, аһары баран, аан дойдуга субуруччу иккитэ бастаабыта, киһини сөхтөрөр.

Өссө биири бэлиэтиэм этэ: Андрей финалга 100 харахтаах дуобат чулуутун, аан дойду 10 төгүллээх чемпиона А.Георгиевы хотон, нуучча дуобатын чулууларын, ол иһигэр, саха гроссмейстердарын чиэстэрин көмүскээтэ. А.Георгиев бастаабыта буоллар, дуобаты үчүгэйдик билбэт дьоҥҥо, соччо бөрүкүтэ суох санаа үөскүөн сөп этэ.

Кэрэхсэбиллээҕэ диэн, кини биир саастыылаахтара гроссмейстердар Николай Гуляев уонна Николай Гермогенов эмиэ үрдүк таһымнаах оонньууну көрдөрбүттэрэ үөрдэр, саха дуобата инникитэ сырдыгын, кэскиллээҕин кэрэһэлиир.

Николай Гуляев турнир устатын тухары чаҕылхайдык оонньоото, арай быһаарыылаах түгэннэргэ арыый кэдэйэн биэрбитэ хомотто. Коля уйулҕатын кыайа туттарга болҕомтотун ууруо, анаан дьарыктаныа этэ диэн сүбэлиибин.

СГУ геологоразведочнай факультетыгар үөрэппит устудьуонум Николай Гермогенов уолун Коляны кыра оҕо сааһыттан билэбин, уолаттарбын Коляны уонна Германы кытта бииргэ СӨ үтүөлээх тренерэ, маастар В.И. Кононовка дьарыктаммыта. Коля, уһулуччу талааннаах уол, быйыл бэлэмэ ситэтэ суоҕа, бу иннинэ Москва уобалаһын Прокопьевск куоратыгар ыытыллыбыт Россия чемпионатыгар кыттыбатаҕа таайда дии саныыбын. Николай күүһүн-уоҕун, физическэй туругун чочуйдаҕына иннигэр кинини дуобат икки көрүҥэр чаҕылхай кыайыылар көһүтэллэр диэн эрэнэбин.

Лидердэрбит, гроссмейстердар Гаврил Колесов уонна Николай Стручков бүгүҥҥү күннээҕи бэлэмнэрин таһымыгар оонньоотулар, сорох түгэннэргэ бааттара биэрбэтэ дии саныыбын. Кинилэр үрдүк кылаастарын ыһыктыбакка тута сылдьаллара саарбахтаммат.

Дьахталларга нуучча дуобатыгар балаһыанньабыт соччо бэрдэ суох, тренер Варвара Захарова үөрэнээччитэ, гроссмейстер Степанида Кириллина улахан күрэхтэһиилэргэ кыттарын тохтоппутун кэннэ, көрдөрүүлэрбит сэмэйдэр. Махтал буоллун, 100 харахтаах дуобаччыт кыргыттарбытыгар Матрена Ноговицынаҕа уонна Наталья Шестаковаҕа, саха дуобатын аатын ааттата сылдьалларыгар! Тренердэр нуучча дуобатыгар саҥа эдэр чаҕылхай талааннары арыйаллара ирдэниллэр.

Аны, дуобаты сэҥээрээччилэргэ, Россия дуобакка Федерациятын shashki.ru сайтыгар тахсыбыт, биирдиилээн күрэхтэһии турнирдарын иннигэр Турцияҕа алтынньы 11–15 күннэригэр ыытыллыбыт нуучча дуобатыгар Аан дойду хамаанданан чемпионатын түмүктэрин билиһиннэрэбин. Бу турнирга эр дьоҥҥо 7 хамаанда састаабыгар 17 гроссмейстер кыттыбыттар, түргэн дуобакка уонна блицкэ күрэхтэспиттэр: биэс Россия федеральнай уокуруктарын сүүмэрдэммит хамаандалара, Украина уонна Турция. Манна Россия дуобаччыттара аҥаардастыы айбардаабыттар.

  Түргэн дуобат түмүктэрэ:

  1. Россия (Киин ФУО): Владимир Егоров, Юрий Королёв, Александр Гетманскай, Григорий Гетманскай, Арсений Цынов, Мария Гаврилкова.
  2. Россия (Приволжскай ФУО): Олег Дашков, Гаврил Колесов, Мурод Амриллаев, Александр Георгиев, Айнур Шайбаков, Фахретдин Канюкаев.
  3. Россия (Уһук Илин ФУО): Николай Стручков, Николай Гуляев, Андрей Федотов, Олег Болсохоев, Александр Халтагаров, Никита Безродных.

Блиц түмүгэ:

  1. Россия (ПФУО): Олег Дашков, Гаврил Колесов, Мурод Амриллаев, Александр Георгиев, Айнур Шайбаков, Фахретдин Канюкаев.
  2. Россия (УИФУО): Николай Стручков, Николай Гуляев, Андрей Федотов, Олег Болсохоев, Александр Халтагаров, Никита Безродных.
  3. Россия (КФУО): Владимир Егоров, Юрий Королёв, Александр Гетманскай, Григорий Гетманскай, Арсений Цынов, Дмитрий Гетманскай.

Ыалларбыт, Бурятия маастардара О.Болсохоев, А.Халтагаров, Н.Безродных уонна гроссмейстер Баир Ринчинов аан дойду чемпионатыгар эриэ-дэхси оонньууну көрдөрбүттэрэ, бу региоҥҥа дуобаты сэҥээрии күүһүрбүтүн көрдөрөр.

Дьахталларга биһиги кыргыттарбыт, хомойуох иһин, миэстэлэспэтэхтэр.

Түмүк. Дуобаччыттарбыт, сахалартан нуучча дуобатыгар аан бастакы Советскай Союз спордун маастара, Саха сиригэр дуобат спорда сайдарыгар, тарҕанарыгар ис сүрэҕиттэн ылсан үлэлээбит, дуобат теориятын ырытан отучча кинигэни суруйбут, Саха АССР үтүөлээх тренерэ, соторутааҕыта ыарахан ыарыыттан олохтон туораабыт Семен Семенович Николаев сырдык кэриэһигэр дьоһуннаах өйдөбүнньүк оҥордулар.

Константин СТРУЧКОВ, Дьокуускай.

Добавить комментарий

Ваш адрес email не будет опубликован. Обязательные поля помечены *