Саха аатырбыт бөҕөһө, дуулаҕа бухатыыра Захар Чукров кинигэтин туһунан санаа

Захары оҕо эрдэҕиттэн, ол эбэтэр, 1971 сылтан билэбин. Кини оччолорго спорт оскуолаҕа мин бииргэ төрөөбүт убайбын Степаны кытары 10-с кылааска бииргэ үөрэнэллэрэ, мин 9-с кылааска үөрэнэр этим. Оскуола кэннэ, 1974-75 сылларга, Читаҕа спортротаҕа биир бириэмэҕэ сулууспалаабыппыт. Ол кэннэ күрэхтэһиилэргэ, ДЮСШ-3 көрүстэхпитинэ өрүү үөрэ-көтө эдэр саастарбытын истиҥник санаһааччыбыт.

Кинигэ тахсарын истэн, ити кэмнэри ахтан ыстатыйа суруйбутум. Онтон бу соторутааҕыта Захар улахан уола Николай кинигэни туттаран үөрүүм муҥура суох. Кинигэ туһунан бэйэм санаабын этэргэ сананным. Олус үчүгэй, киһи биир тыынынан ааҕар кинигэтэ тахсыбыт дии санаатым. Ол курдук, Чукровтар халыҥ аймах төрүттэрин туһунан, ордук Захар ийэтин, аҕатын туһунан аймахтара үчүгэйдик сырдаппыттар, төрүччүлэрэ  дьоһуннук суруллубут. Төрөппүт, соҕотох хаалан киһи оҥортообут оҕолоро аҕаларын олус истиҥник ахтыбыттар, олус убаастыыллара, суохтууллара арылхайдык көстөр.

Бииргэ спорт оскуолаҕа, университекка үөрэммит, армияҕа бииргэ сулууспалаабыт, бииргэ көбүөргэ элбэх көлөһүннэрин тохпут тустуук атастарын-доҕотторун, биир дойдулаахтарын дьоһун ахтыыларын ааҕарга олус интэриэһинэй. Захар туһунан, улахан тустуук эрэ быһыытынан буолбакка, хайдах курдук эрэллээх табаарыс, доҕор, амарах истиҥ аҕа, бүгүрү үлэһит, сорсуннаах булчут, байанайдаах балыксыт, дойдутун Орто Халыма туһугар бүтүннүү сүрэҕинэн, дууһатынан ыалдьарын туһунан бары ахталлар. Олоҕор араас ыарахаттары чиэстээхтик тулуйбутун сөҕө-махтайа ааҕаҕын, чахчы даҕаны Хоту дойду хоһууна киэн көҕүстээҕэр, модун күүстээҕэр итэҕэйэҕин.

Сүрдээх элбэх, дьоһун ахтыылар хомуллубуттар, арай бэйэм санаабар, хас ахтыы биэрбит киһи хаартыската киирбитэ буоллар, кинигэ өссө силигин ситиэ эбит дии санаатым. Кылгас кэм иһигэр сүрдээх авторитетнай эрэдээксийэлиир бөлөх, республика биллэр учуонайдарыттан, үтүөлээх үлэһиттэриттэн түмүллэн, дьоһун кинигэни бүтүн саха дьонугар, спорду таптааччыларга бэлэх уунна. Биир интэриэһинэйэ, бу кинигэ – научнай үлэ курдуга буолар дии санаатым. Ол курдук, учуонайдар «Уол оҕо Эр хоһуун буола улаатарыгар Захар Чукров аҕа быһыытынан оруола» диэн ырытыы оҥорбуттара, хас түһүмэх аайы педагогическай наука доктора, профессор Николай Дмитриевич Неустроев түмүк санаалары суруйбута буолаллар.

Маннык санаабын суруйан туран, бу Захар Чукров кинигэтэ бэйэтин ааҕааччытын хайаан да булуо диэн бүк эрэллээхпин.

Валерий ЛЫТКИН, Чурапчытааҕы спортивнай интернат-оскуола 1973 с. выпуснига.

Добавить комментарий

Ваш адрес email не будет опубликован. Обязательные поля помечены *