Сахаачча туһунан ахтан-санаан аастылар

Улуу тренер Дмитрий Петрович Коркин төрөөбүтэ 90 сылыгар араас улахан тэрээһиннэр ыытылыннылар. Оннук биир кэрэхсэбиллээх тэрээһининэн Саха Республикатын култууратын үтүөлээх үлэһитэ, “Хотугу сулус” араадьыйанан-тэлэбиисэринэн биэрии агентствотын дириэктэрэ Т.А. Гоголева тэрийиитинэн “Строительнай” Атыы-эргиэн киинин Быыстапкалыыр саалатыгар “Коркинныы олоруохха! Коркинныы айыахха!” республикатааҕы быыстапка буолла. 

Быыстапка нэдиэлэни быһа үлэлээтэ, тыһыынчанан киһи сылдьан музейдар, биирдиилээн коллекционердар, аатырбыт спортсменнар сэдэх экспонаттарын кэрэхсии көрдө.

Быыстапка аҥардас экспонаттары эрэ көрдөрүүнэн муҥурдаммата. Манна, Д.П. Коркин үбүлүөйдээх сылынан сибээстээн спортивнай суруналыыс, “Дьулурҕан” хаһыат редактора Петр Павлов “Тустууга таптал хайдах үөскүүрүй?” диэн айар быыстапкатын сүрэхтэниитэ; республикатааҕы национальнай библиотека үлэһиттэрэ Саха сиригэр бэчээттэнэн тахсыбыт тустуу туһунан кинигэлэри ырытыылара; Чурапчытааҕы оҕо спортивнай интернат-оскуолатын араас сылларга үөрэнэн бүтэрбит дьон “Оҕо сааспыт томторо, өрүү биһиги сүрэхпитигэр” көрсүһүүлэрэ; “Саха тустуутун сайдыытын кэрдиис кэмин ырытыы, инники кэскилин түстээһин” диэн тустуу бэтэрээннэрин кытта көрсүһүү; биллиилээх суруналыыс, суруйааччы, “Киин куорат” хаһыат редактора Иван Ушницкай “Оо, Сахаачча, Сахаачча…” кинигэтин тула кэпсэтии – тэрээһиннээхтик ыытылыннылар.

Кинигэни ырытыһыыга элбэх киһи тоҕуоруста. Манна улуу тренер Дмитрий Петрович Коркин огдообото, педагогическай үлэ бэтэрээнэ Александра Семеновна Коркина, Николай Захаров-Сахаачча бииргэ төрөөбүт балта Анна Семеновна Новгородова, Сахаачча доҕоро Спиридон Иванович Борисов, аймаҕа, Дьокуускай куорат 3 №-дээх спортивнай оскуолатын дириэктэрин солбуйааччы, спорт маастара Николай Петрович Иванов кыттыыны ыллылар. Кинилэр Сахаачча олоҕуттан аҕыннылар, киһи истэ олоруох курдук, олоххо буолбут араас түгэннэри кэпсээтилэр уонна кинигэ иитэр суолтата улаханын ыйдылар.

Ааптар И.П. Ушницкай кинигэ хайдах быһыылаахтык сыралаахтык суруллан тахсыбытын, кимнээх хайдах көмөлөспүттэрин, Сахаачча билиҥҥи оҕолорго сүгүрүйүү бэлиэтэ буолуохтааҕын туһунан бэрт ылыннарыылаахтык билиһиннэрдэ.

,,Оо, Сахаачча, Сахаачча…” кинигэм бэчэттэнэн тахсыбыта уон сыл буолла, — диир, кинигэ ааптара Иван Петрович Ушницкай. — Ол да буоллар, Сахаачча бэйэтин курдук норуокка таптаппыт эбит. Доруобай да эрдэҕинэ тэрээһиннэргэ мээнэ сылдьыбат, тыл этэртэн үксүгэр аккаастанар, Д.П. Коркин огдообото Александра Семеновна кэлбитэ даҕаны ону итэҕэттэ. Бастаан быыстапка аһыллыытыгар, онтон презентацияҕа иккитэ төхтүрүйэн тыл эттэ. Кини сааһа 82-тэ. Ыалдьан сыппыта сыл курдук буолбут, миэхэ оҕотугар курдук көмөлөһө сатыыр. Бэһис кылааска үөрэнэ сылдьан Дмитрий Петровичка суруйбут сурукпун архыыбыттан булан биэрдэ. Сахаачча оҕом буоллаҕа дии, диэн Александра Семеновна илэ бодотун тардынан кэлбитэ да иэйии, бастакы ситиһии этэ. Ити курдук, дьоҥҥо-сэргэҕэ соччо көстүөн баҕарбат, Сахаачча баар-суох доҕоро, сэмэй киһи — Спиридон Борисов Дьокуускайга маннык дьаһалга аан бастаан кытынна. Сахаачча бииргэ төрөөбүт балта Анна Семеновна кылгастык да буоллар, истиҥник эттэ. Бэйэм маннык үчүгэй кинигэни суруйдум диэм дуо? Сахаачча туһунан суруйаары, киинэ оҥороору Көҥүл Государстволар Түмсүүлэрин (КГТ) араас куораттарыгар сылдьан, аан дойду улууларын дьиэлэригэр тиийэн, 50 сыл анараа өттүгэр, ол 20 сааһыгар күлүм гынан ааспыт сулуһу өйдүүллэрин сураспыппын кэпсээтим. Киһи сөҕөрө, “Коля” диэн курутуйаат, көрсүһүүгэ кыттыбыт дьон, бу көрөн олорор курдук кэпсээн, ахтыы оҥорон, улаханнык сэргэхситтилэр.


Биллиилээх суруналыыс Иван Ушницкай эдэр сааһыгар, саамай күөгэйэр күнүгэр сылдьан олохтон олус хомолтолоохтук туораабыт, дьоҥҥо-сэргэҕэ Сахаачча диэн элэккэй аатынан биллибит, номоххо киирбит Николай Семенович Захаров туһунан “Оо, Сахаачча, Сахаачча…” диэн кинигэтэ саха тустуутун туһунан тахсыбыт кинигэлэртэн биир бастыҥнара дии саныыбын. Манна суруналыыс эрдэттэн сыал-сорук туруоран, хас эмэ сылы быһа дириҥник хасыһан, кинигэни сэдэх докумуоннарынан, чахчыларынан уонна хаартыскаларынан киэргэтэн таһаарбыта хайҕаныан эрэ сөп. Кырдьык, улахан үлэ. Иван Петрович маннык, биир киһиэхэ анаан саха биллиилээх бөҕөстөрүн туһунан кинигэлэри салгыы таһаара турара буоллар, диэн баҕа санаалаахпын. Ол эрээри, иллэҥэ суоҕун билэбин. Кини төһө да билигин хараҕынан моһуогурдар, сахаттан бастакы олимпийскай чемпион Роман Дмитриев туһунан кинигэни бэчээккэ бэлэмнии сылдьар. Эрэнэбин, ол кинигэ син эмиэ Сахаачча кинигэтин курдук табыллан, арыллан тахсарыгар, ааҕааччылар киэҥ сэҥээриилэрин уонна биһирэбиллэрин ыларыгар.

Бэйэбит инф.

Добавить комментарий

Ваш адрес email не будет опубликован. Обязательные поля помечены *