“Сахаачча бары көрүҥҥэ дэгиттэр этэ”


Улуу тренер Дмитрий Петрович Коркин аатынан Чурапчытааҕы Албан аат спортивнай музейын дириэктэрэ – СР физическэй култуураҕа уонна спорка үтүөлээх үлэһитэ, Д.П. Коркин аатынан Государственнай бириэмийэ лауреата, Чурапчы улууһун Бочуоттаах гражданина Егор Васильевич Пудов:

— Сахаачча киһи быһыытынан олус холку, сайаҕас, мээнэ ону-маны саҥара сылдьыбат этэ. Тустуук быһыытынан олус чаҕылхай талаана көстөн ааста. Биир киһи кэрэхсиирэ баар, Коля бары көрүҥҥэ барытыгар дэгиттэр этэ. Ол курдук, волейболга, баскетболга, чэпчэки атлетикаҕа кылгас сүүрүүлэргэ, уһуну ыстаныыга, үрдүгү көтүүгэ, футболга уонна барытыгар инники буолан иһэрэ.

Көрүҥүнэн, быһыыта-таһаата ураты киһи сөҕөрө суох курдук, ол гынан баран, барыта бэйэ-бэйэтигэр сөп сайдыылах, көнө систээх, биллэр маадьаҕар, үмүрүччү үктээбит, сиэгэн курдук атахтаах. Тустар стилэ кимиэхэ да майгыннаабат, үксүн киһитигэр бэйэтэ кимэн атаакалаан тустааччы. Ханнык да түгэҥҥэ уолуйбат, уустук балаһыанньаҕа төттөрү албаһы булан оҥорон кыайыылаах тахсара.

Утарылаһааччытын хамсатан, түөрэҥнэтэн тустарын сөбүлүүрэ. Киһини кытта туһуннаҕына, хаһан да ыбылы тута сатаан, күүһүнэн мадьыктаан тустубат этэ. Ол оннугар албас оҥороору гыннаҕына, эмискэ күүрэн кэлэрэ уонна сыалын ситэрэ…

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *