«Юность» стадиоҥҥа хайыһардар дайдылар


Дьокуускай куорат хайыһарга федерациятын (бэрэссэдээтэл В.В. Тарскай) уонна Дьокуускай куорат физическэй култуураҕа уонна спорка управлениетын (начаалынньык К.С. Бурцев) көҕүлээһиннэринэн бүгүн, сэтинньи 10 күнүгэр “Туймаада киэһээҥҥи уоттара” диэн үгэскэ кубулуйбут хайыһарга күрэхтэһии ыытылынна.

Күрэхтэһии былааннаммытын быһыытынан Сайсары күөлгэ ыытыллыахтаах этэ, ону бүтэһик түгэҥҥэ «Юность» стадиоҥҥа көһөрүллэн, бэрт тэрээһиннээхтик буолбутугар тэрийээччилэр — М.К. Аммосов аатынан Хотугулуу-Илиҥҥи федеральнай университет Физическэй култуураҕа уонна спорка институтун дириэктэрэ Дмитрий Николаевич Платоновка махталларын тиэрдэллэр.

Онон күрэхтэһии «Юность» стадиоҥҥа киэһээ 18:00 чаастан саҕаланна. Күрэхтэһиигэ Дьокуускай куорат уонна республика күүстээх хайыһардьыттара Мэҥэ Хаҥаластан, Өлүөхүмэттэн, Намтан, Уус Алдантан, Горнайтан, Хатастан кыттыыны ыллылар. Эр дьон, дьахталлар уонна үөрэнээччилэр бары 1200 м дистанцияҕа көҥүл ньыманан сүүрдүлэр.

Күрэхтэһии үөрүүлээх аһыллыытыгар Саха Республикатын Спорка миниистирин солбуйааччы Александр Бугаев, Дьокуускай куорат физическэй култуураҕа уонна спорка управлениетын начаалынньыга Константин Бурцев, Дьокуускай куорат хайыһарга федерациятын бэрэссэдээтэлэ Василий Тарскай, күрэхтэһии кылаабынай судьуйата Альберт Трофимов кыттыыны ылан, хайыһардьыттары эҕэрдэлээтилэр.

Түмүккэ 2001-2002 сс. төрөөбүт уолаттарга Василий Сивцев (Дьокуускай-ОЭУ) дистанцияны 02:30,0 бириэмэнэн түмүктээн, бастакы миэстэни ылла. Иккис миэстэҕэ Иван Аржаков (Өлүөхүмэ), үһүскэ Павел Сивцев (Дьокуускай, ОЭУ) таҕыстылар. Бу саастаах кыргыттарга Мира Павлова (Мэҥэ Хаҥалас) кыайда.

2003-2004 сс. төрөөбүт уолаттарга 03:20 бириэмэлээх Гаврил Алексеев (Нам) бастаата. Никита Санников (ДЮСШ-5) киниттэн алта дэһээтэйинэн хаалан, иккистээтэ. Оттон Петр Эверстов (Нам) үһүстээтэ. Кыргыттарга Катя Перова (Мэҥэ Хаҥалас) биэтэккэ бастакынан кэллэ. Хатастан Левана Мордосова иккис буолла. Горнайтан Жанна Максимова үһүс миэстэлэннэ.

2005 сыллаахтарга Матвей Захаров (Өлүөхүмэ) бастакы, Денис Дегтярев (Уус Алдан) иккис, Иван Федоров (ДЮСШ-5) үһүс миэстэлэри ыллылар. Кыргыттарга Майя Софронова (Мэҥэ Хаҥалас) кыайыы үөрүүтүн биллэ. Иккис, үһүс миэстэлэри Хатастан Айыы-Куо Михайлова, Мария Гуляева ыллылар.

Эр дьоҥҥо Никита Шестаков (Амма-ОЭУ) дистанцияны 02:17,2 бириэмэнэн түмүктээн, пьедестал үрдүкү үктэлигэр таҕыста. Итинэн Дьокуускай куорат хайыһарга федерациятын бэрэссэдээтэлэ Василий Тарскайтан МР-18 ЕМ-М булт саатынан наҕараадаланна. Өлүөхүмэттэн Евгений Янков киниттэн үс эрэ дэһээтэйинэн хаалан, иккис миэстэни ылла. Үһүс бириистээх миэстэҕэ Дьокуускайтан Николай Зыков тигистэ.

Дьахталларга Анюта Попова (Дьокуускай-ХИФУ) бастакы, Наталья Новгородова (Нам) иккис, Анна Бугаева (ХИФУ) үһүс миэстэлэри ыллылар.

Кыайыылаахтар уонна иккис, үһүс миэстэлэммиттэр – мэтээлинэн, грамотанан уонна анал бирииһинэн наҕараадаланнылар.

Петр ПАВЛОВ.

 

Добавить комментарий

Ваш адрес email не будет опубликован. Обязательные поля помечены *