Садулаев сахалар албастарынан кыайда!

Көҥүл тустууга аан дойду чемпионатын эрдэттэн саамай көһүтүллүбүт хапсыһыытынан – Абдулрашид Садулаев американец Кайл Снайдердыын киирсиитэ этэ диэтэхпинэ сыыстарбатым буолуо. Бу икки, билиҥҥи кэм аатырбыт тустууктарын киирсиилэрэ, син эмиэ бэлиитикэҕэ курдук, Россия уонна Америка Холбоһуктаах штаттарын икки ардыларыгар күөнтэһиигэ кубулуйбута. Садулаевы американецтар бэйэлэрэ “Нуучча таанката” диэн ааттаабыттара. Көрсүһүү инниттэн Снайдер хайдах эрэ Садулаев хааныгар оонньоон, кыһыл тылынан кыынньаан, буолуохтаах хапсыһыыны өссө сытыырхаппыта.

Дьэ, онон, Садулаев – Снайдер тустууларын биһиги эрэ буолбакка, эрдэттэн күүркэтиллибитин быһыытынан аан дойду барыта күүппүтэ. Оннооҕор, аан дойду чемпионатын тэрийээччилэр ону билбиттии, кинилэр кыттар ыйааһыннарын – көҥүл тустуу күрэхтэһиитигэр бүтэһигинэн ыыппыттара. Этэргэ дылы, ол былааннара туолбута. Көҥүл тустууга аан дойду чемпионата Садулаев – Снайдер хапсыһыытынан түмүктэммитэ. Бу киирсии туһунан өссө алтынньы 21 күнүгэр “А на десерт – противостояние “Снайдер-Садулаев” диэн ааттаан суруйбуппун, сайт иккис страницатыттан булан ааҕыҥ. Онно этиллибити хатылыы барбаппын. Быһата, бу сырыыга россиянин кыайарыгар бүк эрэнэр этим.

Хапсыһыыны телевизорынан “Матч!Боец” каналга түүннэри кэтэһэн көрдүбүт. Көбүөргэ бастакынан, хайдах эрэ кими баҕарар тырыта-хайыта тыытыах айылаахтык туттан-хаптан Кайл Снайдер сүүрэн таҕыста. Онтон Садулаевы ыҥырбыттарыгар, аа-дьуотук, бэйэтигэр эрэллээхтик туттан хааман киирдэ. Утарсааччылар көбүөргэ үктэнээт харахтарынан уун-утары көрсүһүүлэригэр, мин санаабар, американец эрэлэ суох, долгуйбут курдуга, хараҕа сүүрэкэлии сылдьара. Оттон Садулаев – кыайарыгар эрэллээх. Ол аата, өйүн-санаатын барытын түмпүт, сыаллаах-соруктаах уонна дьулуурдаах буолан көстүбүтэ.

Хапсыһыы саҕаланар. Икки өттүттэн бэрт сытыы хамсаныылар, көрдөххө көннөрү курдук буолан баран, күүстээх тардыалаһыы буолар. Чочумча буолаат, Садулаев имигэстик хамсанаат, американеһы уҥа атаҕыттан харбаан ылар. Бу кэмҥэ Снайдер туох баар күүһүнэн, ыйааһынынан баттаары ыксатар. Оттон Садулаев киһитин атаҕын туппутунан умса баттата сылдьан, быыс булан утарсааччытын хаҥас илиитин кыбытан имигэс баҕайытык намыһах стойкаттан эргичис гынан албастаан – тиэрэ быраҕар. Тута кулахаччыппытынан, аны партерга үөһэттэн баттыы сылдьан икки илиитин кыбытан киһитин ууга-уокка түһэрэр. Снайдер, били тиргэҕэ иҥнибит кус курдук араастаан мөхсөн төлө куота сатаата да, “Нуучча таанкатын” тимир ытарчатыттан куоппата. Сотору, кыаҕын былдьатан олох да налыс гынан хаалла. Итиэннэ хобдохтук хотторбутуттан илиитинэн сирэйин саба туттан өр баҕайы таалан сытта. Оттон Садулаевка үөрүү өрөгөйө буолла…

Онон сыл инниттэн күүркэтиллибит киирсиибит баара эрэ 72 сөкүүндэ ыытылынна. Сорохтор астыммакка хаалбыттар, түргэнэ бэрдиттэн. Хайдах эрэ, аатырбыт профессиональнай боксер Майк Тайсон киирэн аҕыйах мүнүүтэ иһинэн кыайан тахсарын курдук буолла.

Кыайыы үөрүүтүүттэн бэл биһиги, төрдүс түүммүтүн харахпытын саппакка наар телевизорынан тустууну манаабыт дьон – сэргэхсийэ түстүбүт. Нуктаабыппыт ааһа быһыытыйда. Билгэлээбит бөҕөспүт кыайыытыттан үөрэн, аны хас эмэ чааһы быһа ону ырытыстыбыт. Санаабытыгар, Садулаев сахалар туттар албастарынан кыайыыны ситиспитин санатыстыбыт. Хапсыһыыны өссө төгүл видеотын көрөөрүҥ эрэ, ити Садулаев бастаан, тустуу эйгэтигэр “Карповтааһын” диэн, сахалартан бастакынан уолаттарга ССРС чемпиона буолбут Вячеслав Карпов сөбүлээн туттар албаһынан охтордо, онтон салгыы аны “Махсыым колодкатыгар” ылан, олох даҕаны ыраас кыайыыны ситистэ. Ити саха тустуутун бастакы көлүөнэтин бэрэстэбиитэлэ, көҥүл тустууга ССРС, хапсаҕайга Саха АССР спортарын маастара, Уус Алдан, Чурапчы, Амма улуустарын Бочуоттаах гражданина, Үлэ Кыһыл Знамята, Бочуот Знага уонна Партияҕа килбиэнин иһин уордьаннар кавалердара Максим Николаевич Сибиряков сөбүлээн туттар албаһа.

Ону бигэргэтэн бу суруйууга Максим Сибиряков бэйэтин сөбүлээн туттар албаһынан кыайыыны ситиһэн эрэр хаартыскатын уонна Вячеслав Карпов албаһын — албан аатырбыт Арсен Фадзаев үөһээттэн (стойкаттан) оҥорон эрэрин көрөҕүт.

Көр, тустуу хайдах курдук умсугутуулааҕый, бэйэтэ туспа историялааҕый?! Снайдер – Садулаев хапсыһыыларыгар сыһыаран бэйэбит бэтэрээн бөҕөстөрбүтүн санаан ыллыбыт, кинилэргэ өссө төгүл сүгүрүйдүбүт.

Петр ПАВЛОВ.

PS: Хаартыскалар Интернет ситимиттэн ылылыннылар итиэннэ ааптар архыыбыттан туһанылыннылар.

Добавить комментарий

Ваш адрес email не будет опубликован. Обязательные поля помечены *