Саахымат: Дьиэҕэ олорон кыайыылааҕы быһаарыстылар

 

Коронавирус киэҥник тэнийэн, аан дойду үрдүнэн спортивнай күрэхтэһиилэр тохтоон, көһөрүллэн турар кэмнэригэр арай дуобатчыттар уонна саахыматчыттар күрэхтэһиилэрин тохтоппоттор.

Ол курдук, Дьокуускай куорат физическэй култуураҕа уонна спорка управлениетын (начаалынньык К.С. Бурцев) көҕүлээһининэн Кыайыы 75 сылын көрсө түргэн саахымакка республика киин куоратын онлайн-турнира ыытылынна. Турнир тэриллиитигэр Дьокуускай куорат саахымакка федерацията күүс-көмө буолла. Турнир син эмиэ бу иннинээҕи күрэхтэһии курдук, “Шахматная планета” портал нөҥүө ыытылынна.

Күрэхтэһии швейцарскай систиэмэнэн 11 туур ыытылынна. Манна сааһыттан тутулуга суох ким баҕалаах барыта кытынна. Бу сырыыга кыайыыга дьулуурдаах 25 саахыматчыт дьиэлэригэр олорон гаджет көмөтүнэн күрэхтэстэ.

Турнир уопсай ыытыллан баран, түмүк үс бөлөххө таһаарылынна. Ол курдук, эр дьоҥҥо кыайыылааҕынан – ааспыкка Дьокуускай куорат кубогар үһүстээбит Ньургун Винокуров буолла. Кини 9 очукуолаах эрэллээхтик бастаата. Онтон Нариман Мустафин, Павел Бекетов уонна Айсен Местников 8,5-дыы очукуону хомуйдулар. Онуоха турнир кылаабынай судьуйатынан үлэлээбит Дуобат-саахымат республикатааҕы киинин инструктора Гаврил Винокуров уонна судьуйалыыр бөлөх быһаарыытынан, ФИДЕ быраабылатыгар олоҕуран, оонньуу хаачыстыбатынан көрөн  Мустафин иккис, Бекетов үһүс, Местников миэстэлэргэ тигистилэр.

Дьахталларга Галина Федорова бастаата. Оттон аҕам саастаахтарга син эмиэ Дьокуускай куорат кубогар курдук – Александр Кравченко кыайыылааҕынан ааттанна. Бөлөх кыайыылаахтара мэтээлинэн, грамотанан уонна өйдөбүнньүк бириистэринэн наҕараадаланнылар.

Маннык күрэхтэһии – оонньооччулар таһымнарын үрдэтиигэ уонна билиҥҥи, дьаҥ-дьаһах тэнийэн, дьиэҕэ олорор кэмҥэ бириэмэни туһалаахтык атаарарга төһүү буолара саарбахтаммат.

Дьиэҕитигэр олоруҥ! Бэйэҕитин уонна тулалыыр чугастааҕы дьоҥҥутун харыстаан! Чэгиэн-чэбдик буолуҥ!  

Петр ПАВЛОВ. 

Добавить комментарий

Ваш адрес email не будет опубликован. Обязательные поля помечены *