Россия чемпионун инники кыайыыларга көҕүлээтилэр

Бүгүн, кулун тутар 10 күнүгэр “Дмитриевскэй ааҕыылар” диэн Бүтүн Россиятааҕы научнай-практическай конференция чэрчитинэн ыытыллыбыт тустууга маастар-кылаас кэмигэр, соторутааҕыта Наро-Фоминскайга ыытыллыбыт көҥүл тустууга Россия уолаттарга биирдиилээн бастыыр иһин күрэхтэһиитин кыайыылааҕа Андрей Мидловеһы чиэстээһин тэрилиннэ.

Бу бэлиэ күҥҥэ сөп түбэһиннэрэн, чиэстээһини Р.М. Дмитриев аатынан Олимпийскай эрэл училищетын дириэктэрин солбуйааччы, норуоттар икки ардыларынааҕы кылаастаах спорт маастара Александр Степанович Контоев тэрийдэ. Кини, Андрей Мидловец бу кыайыытынан дуоһуйан хаалбакка, өссө дьаныһан туран дьарыктанарыгар, үрдүктэн үрдүк кирбиилэри ыла турарыгар баҕарда уонна эрчиллиигэ кэлбит эдэр тустууктарга туйааһан сыал-сорук туруорунан, ситиһиилээхтик кыттар түгэннэригэр маннык чиэстээһиннэр тэриллэ туралларыгар угуйда.

Ол курдук, училище доҕотторо, өрүү күүс-көмө, өйөбүл буолар дьон: Гоял Кришан – быһахтаах швейцарскай чаһыы бэлэх-комплегын, “Майтона” хампаанньа (бырааттыы Ушницкайдар) – харчынан бириэмийэ, “Теплый край” тэрилтэ (Ньургустан Иванов) – “Самсунг” суотабай телефон, “Комфорт” автосервис (Карен Вигенович Икиликян) – харчынан бириэмийэ туттардылар.

Маннык үөрүүлээх тэрээһиннэр Саха сирин спордугар, чуолаан биһиги инники эрэллэрбитигэр – Олимпийскай эрэл училище иитиллээччилэригэр инникитин даҕаны үксүү, элбии туралларыгар баҕарабыт.

Петр ПАВЛОВ.

Ааптар хаартыскаҕа түһэриитэ.

 

Добавить комментарий

Ваш адрес email не будет опубликован. Обязательные поля помечены *