Россия чемпионатыгар уон тустуукпут ыҥырылынна

Россия спортивнай тустууга федерациятын президенэ Михаил Мамиашвили Саха сирин спорка министерствотыгар анал официальнай сурук ыытта.

Онно этиллэринэн, Нарофоминскайга буолаары турар Россия чемпионатыгар биһиги республикабытыттан Арыйаан Тютрин, Айаал Белолюбскай, Петр Константинов, Петр, Алексей Копыловтар, Георгий Окороков, Ньургун Александров, Дмитрий Аксенов, Петр Павлов, Виктор Рассадин ыҥырыллалларын туһунан суруллубут. Итиэннэ хамаандаҕа биир бэрэстэбиитэл, үс тренер ыҥырыллыбыт. Сурукка, кинилэр бары ковидка анализтара үчүгэй эрэ буоллаҕына, чемпионакка кытталлара этиллибит.

Эрдэ сырдаппыппыт быһыытынан, Нарофоминскайдааҕы чемпионакка Россия спортивнай тустууга федерациятын быһаарыытынан ыйааһын ахсын 16-лыы эрэ бөҕөс былырыыҥҥы Россия чемпионатын, аан дойду Кубогын, “Аланнар” турнир уонна быйылгы “Иван Ярыгин” турнир, Россия эдэрдэргэ күрэхтэһиитин түмүгүнэн талыллан кыттыахтаахтара. Маннык балаһыанньаҕа биһигиттэн аан дойду Кубогын кыайыылаахтара Арыйаан Тютрин, Виктор Рассадин, Россия чемпионатын призера Михаил Иванов уонна дойду эдэрдэргэ күрэхтэһиитигэр үһүс миэстэлээх Айаал Белолюбскай эрэ киириэхтээхтэрэ.

Ол эрээри, республика спорка салалтата Россия спортивнай тустууга федерациятын кытта кэпсэтии ыытан, өссө эбии хас да тустууга киллэрэллэригэр көрдөһүү сурук ыыппыта. Онно, үөһээ бэриллибит испииһэктэн ураты өссө Семен Владимиров баара. Кинини тоҕо эрэ ыҥырбатахтар. Оттон, Михаил Иванову Москваттан кыттар диэтэхтэрэ, тоҕо эрэ Мамиашвили суругар кини суох.

Дьэ, бу күҥҥэ балаһыанньа итинник. Саха сирин хамаандатын састаабыгар уларыйыылар өссө даҕаны киириэхтэрэ дии саныыбын.

Санатан эттэххэ, Россия көҥүл тустууга чемпионата алтынньы 16-18 күннэригэр ыытыллыаҕа.  

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *